ورتالىق كوممۋنيكاتسيالار قىزمەتىندە وتكەن بريفينگتە وڭىرلەردەگى ءورتتىڭ الدىن الۋ ماسەلەسى ءسوز بولدى. ەڭ اۋەلى قوستاناي وبلىسىنداعى احۋال باياندالدى. توتەنشە جاعدايلار مينيسترلىگى ورتكە قارسى قىزمەت كوميتەتىنىڭ باسقارما باستىعى ەرلان تورەگەلديەۆتىڭ ايتۋىنشا, قىزىل جالىن تولىعىمەن سوندىرىلگەن. بىراق بوساڭسۋعا جول جوق. بۇگىندە تۇتانۋ قاۋپى جوعارى ۋچاسكەلەر باقىلاۋعا الىنىپتى. سونىمەن ەلدى ەلەڭ ەتكىزگەن قوستانايداعى ءورتتىڭ اۋماعى 43 مىڭ گەكتاردان اسقان. ءورت كەزىندە 91 ۇيگە زاقىم كەلگەن. ەكى مىڭعا جۋىق ادام قاۋىپسىز عيماراتقا كوشىرىلگەن. ءورتتى اۋىزدىقتاۋعا 224 تەحنيكا, 6 اۋە كەمەسى, 5 ءورت ءسوندىرۋ پويىزى, قۇزىرلى ورگان قۇرامىنان 2 مىڭنان استام ادام جۇمىلدىرىلعان. 11 ادام (6 تۇرعىن, ورمان شارۋاشىلىعىنىڭ 1 قىزمەتكەرى, اكىمدىكتىڭ 1 قىزمەتكەرى, تجم 3 قىزمەتكەرى) جەڭىل جانە ورتاشا دارەجەدەگى جاراقات (كۇيىك, ۋلانۋ) الدى. جاسى 80-نەن اسقان مۇمكىندىگى شەكتەۋلى قاريا كوز جۇمدى.
الماتى قالاسىنداعى كەڭساي ماڭىندا شىققان ءورت مەدەۋ اۋدانى سارسەنباەۆ كوشەسىندەگى ۇيلەرگە قاۋىپ توندىرگەن. كوك ءتۇتىندى اۋەلى كەڭساي-1 شاعىن اۋدانىنىڭ تۇرعىندارى بايقاپ, ءورت سوندىرۋشىلەرگە حابارلاسقان. ماماندار جەدەل جەتكەنىمەن بەتكەيلەردىڭ بيىكتىگى, جەردىڭ كۇردەلى رەلەفى جۇمىستى قيىنداتقان. ونىڭ ۇستىنە جەل سوعىپ, جانعان ءشوپتىڭ جالىنى بيىكتىگى 3 مەترلىك بۇتالارعا كوشكەن. ءتىلسىز جاۋدى اۋىزدىقتاۋعا توتەنشە جاعدايلار دەپارتامەنتىنەن 100-دەن استام ءورت ءسوندىرۋشى, 8 تەحنيكا جۇمىلدىرىلدى. كەڭساي-2 زيراتىنىڭ اۋماعىندا قۇرعاق ءشوپ ورتەنگەنمەن, قابىرلەر زاقىمدالمادى. توتەنشە جاعدايلار دەپارتامەنتىنىڭ وكىلدەرى الماتىلىقتارعا تاۋدا وت جاقپاۋدى, تەمەكى تۇقىلىن تاستاماۋدى ەسكەرتەدى. ايتپاقشى بۇل وقيعادان كەيىن الەۋمەتتىك جەلىلەردە بەلگىسىز ازاماتتىڭ قاساقانا ءورت قويىپ جاتقان ارەكەتتى جاريالانعان ەدى. الماتى پوليتسياسى كوكتوبەدەگى ءورت كەزىندە اعاشتاردىڭ ماڭىندا تۇرعان ەر ادامدى ۇستاعانىن مالىمدەدى. بوستاندىق اۋدانىنداعى ءورت ورنىندا بوي كورسەتكەن ەر ادام بەينەكامەرا مەن كۋاگەرلىك ايعاقتار كومەگىمەن انىقتالعان. «بۇل 1968 جىلى تۋعان ازامات. ول وت جاققانىن مويىندادى», دەپ حابارلادى ۆەدومستۆو. ەر ادامنىڭ سوزىنشە, ول ماس كۇيدە بولعان جانە كونسەرۆىلەردى جىلىتقىسى كەلگەن, بىراق ءورت بۇتالارعا وتكەن سوڭ قورىققاننان كەتىپ قالعان. وقيعانىڭ ءمان-جايى انىقتالۋدا.
بۇگىندە قىزىل جالىنعا ورانعان ايماقتاردا جاعداي تۇراقتى. ەندىگى جەردە ارنايى كوميسسيا وكىلدەرى شىعىن كولەمىن انىقتاۋعا كىرىسپەك. قۇقىق قورعاۋ ورگاندارى بولسا كىنالىلەردىڭ «سوڭىنا تۇسپەك». نە دەسەك تە, ورمان شارۋاشىلىقتارىنداعى, توتەنشە جاعدايلار مينيسترلىگىنە قاراستى قۇرىلىمدارداعى تەحنيكا پاركىنىڭ جاعدايى ءماز ەمەس. ونى مينيسترلىكتىڭ ءوزى دە جاسىرمايدى. بۇگىندە جەرگىلىكتى اكىمدىكتىڭ بالانسىنداعى ورمان شارۋاشىلىقتارىنىڭ قاجەتتى قۇرالدارمەن جابدىقتالۋ كورسەتكىشى 67 پايىز, ال ەكولوگيا, گەولوگيا جانە تابيعي رەسۋرستار مينيسترلىگىنىڭ قۇرامىنا ەنەتىن شارۋاشىلىقتارداعى كورسەتكىش 60 پايىزعا تەڭ ەكەن. كىنانى تابيعاتتىڭ توسىن مىنەزىمەن عانا بايلانىستىرۋعا بولماس. بۇل وقيعالاردان توتەنشە جاعدايلار مينيسترلىگى ساباق الىپ, كەشەندى جوسپارلارىن ۇسىنادى دەگەن سەنىم مول.
