ابىلقايىر تامابەك وبلىس اكىمدىكتەرىنىڭ دەرەكتەرىن كەلتىرىپ, جالپى ءتۇسىمنىڭ بولجامدى كولەمى 18,3 ملن توننا, ونىڭ ىشىندە بيداي 13,4 ملن توننادان اساتىنىن حابارلادى.
«1 تامىزداعى جاعداي بويىنشا رەسپۋبليكادا 3,1 ملن توننا كولەمىندە اۋىسپالى استىق قالدىعى بار, ونىڭ ىشىندە 2,5 ملن توننا بيداي بار», دەدى ۆيتسە-مينيستر.
ونىڭ ايتۋىنشا, اۋىسپالى قالدىقتاردى ەسكەرە وتىرىپ, جالپى استىق جيناۋدىڭ كۇتىلەتىن كولەمى رەسپۋبليكانىڭ ىشكى قاجەتتىلىگىن تولىق قامتاماسىز ەتۋ, سونداي-اق استىقتىڭ بەلگىلى ءبىر كولەمىن ەكسپورتقا وتكىزۋ جانە تيىسىنشە ءداستۇرلى نارىقتارداعى ساۋدا پوزيتسياسىن ساقتاۋ ءۇشىن جەتكىلىكتى.
«بيىلعى جىلدىڭ قولايلى جاعدايلارى ەگىن جيناۋ جۇمىستارىن ۋاقىتىلى باستاۋعا مۇمكىندىك بەردى جانە بۇگىنگى كۇنى رەسپۋبليكا بويىنشا بارلىعى 9,2 ملن گا ءداندى جانە ءداندى-بۇرشاقتى داقىلدار جينالدى. بۇل 57,8%-دى قۇرايدى. 12,0 تس/گا ورتاشا ونىمدىلىك كەزىندە 11,2 ملن توننا استىق باستىرىلدى», دەپ قوستى ابىلقايىر تامابەك.
ول وسى جىلى اۋىل شارۋاشىلىعى داقىلدارىنىڭ جالپى جيناۋ الاڭى 23,4 ملن گەكتاردى قۇراعانىن, ونىڭ ىشىندە ءداندى داقىلداردى جيناۋ الاڭى 16,1 ملن گەكتاردى قۇرايتىنىن اتاپ ءوتتى.
«جاپپاي ەگىن جيناۋ رەسپۋبليكانىڭ بارلىق وڭىرلەرىندە باستالدى. ەگىن جيناۋ جۇمىستارىن جۇرگىزۋ ءۇشىن رەسپۋبليكادا 147,7 مىڭ تراكتور, 38,1 مىڭ استىق جينايتىن كومباين, 13,3 مىڭ دەستەلەگىش, 73,4 مىڭ تراكتور تىركەمەسى بار. ەگىن جيناۋ جۇمىستارىن ۋاقىتىلى جۇرگىزۋ ءۇشىن شارۋالارعا 423,5 مىڭ توننا جەڭىلدەتىلگەن ديزەل وتىنى ءبولىندى», دەپ تولىقتىردى سپيكەر.
وپەراتورلاردىڭ شىعىندارىن ەسكەرە وتىرىپ, اگرارشىلار ءۇشىن ديزەل وتىنىنىڭ ورتاشا باعاسى ليترىنە 203 تەڭگەنى قۇرايدى, بۇل نارىقتىق باعادان 15-20%-عا ارزان.
