قۇجاتتى ءماجىلىستىڭ جالپى وتىرىسىندا قر ادىلەت ءمينيسترى قانات مۋسين تانىستىرىپ ءوتتى. سونداي-اق بۇل زاڭ جوباسى 2022 جىلعى 16 ناۋرىزداعى مەملەكەت باسشىسىنىڭ «جاڭا قازاقستان: جاڭارۋ مەن جاڭعىرۋ جولى» جولداۋىن ىسكە اسىرۋ ماقساتىندا ازىرلەندى.
ونىڭ ايتۋىنشا, زاڭ جوباسىنىڭ ماقساتى - ادام جانە ازامات قۇقىقتارىن جۇزەگە اسىرۋدىڭ كەپىلى رەتىندە ادام قۇقىقتارى جونىندەگى ۋاكىلدىڭ كونستيتۋتسيالىق مارتەبەسىن قامتاماسىز ەتۋ بولىگىندە قازاقستان رەسپۋبليكاسىنىڭ كونستيتۋتسياسىنا ەنگىزىلگەن وزگەرىستەردى ىسكە اسىرۋ.
«وزدەرىڭىز بىلەتىندەي, كونستيتۋتسيانىڭ جاڭا 83-1-بابىنىڭ نورمالارى ونىڭ قىزمەتىنىڭ مىندەتتەرىن, تاۋەلسىزدىك كەپىلدىكتەرىن جانە كەز كەلگەن باسقا مەملەكەتتىك ورگاندار مەن لاۋازىمدى تۇلعالاردىڭ وكىلەتتىكتەرىن جۇزەگە اسىرۋ كەزىندە جاۋاپ بەرمەۋىن بەلگىلەيدى. بۇدان بىلاي ۋاكىلدىڭ قۇقىقتىق مارتەبەسى مەن قىزمەتىن ۇيىمداستىرۋ كونستيتۋتسيالىق زاڭمەن ايقىندالادى. ايتا كەتەيىك, ۋاكىل تۋرالى قولدانىستاعى زاڭ جاقىندا, وتكەن جىلدىڭ 29 جەلتوقسانىندا قابىلدانعان بولاتىن. ول قازىردىڭ وزىندە ۋاكىلدىڭ قىزمەتى تۋرالى نەگىزگى ەرەجەلەردى قامتيدى. وسىعان بايلانىستى پارلامەنت ماجىلىسىنە ۇسىنىلعان ۋاكىل تۋرالى كونستيتۋتسيالىق زاڭ جوباسى قولدانىستاعى نورمالار نەگىزىندە ماقساتتى تولىقتىرۋلار مەن زاڭ قۇرىلىمىن قايتا قاراۋ ارقىلى ازىرلەندى», دەپ ءتۇسىندىردى قانات مۋسين.
ءمينيستردىڭ ايتۋى بويىنشا, كونستيتۋتسيالىق زاڭ جوباسى 6 تاراۋ, 23 باپتان تۇرادى.
«مەن قولدانىستاعى زاڭدا قاراستىرىلماعان نەگىزگى جاڭا ەرەجەلەرگە تولىعىراق توقتالعىم كەلەدى. جاڭا ەرەجەلەردى ەكى توپقا بولۋگە بولادى. ءبىرىنشىسى – ۋاكىلدىڭ قۇزىرەتىن كۇشەيتۋ, ەكىنشىسى – ونىڭ قىزمەتىن ۇيىمداستىرۋدىڭ تيىمدىلىگىن ارتتىرۋ», دەپ قوستى ق.مۋسين.
ونىڭ ايتۋىنشا, ۋاكىلدىڭ قۇزىرەتىن كۇشەيتۋ بولىگىندە: بىرىنشىدەن, كونستيتۋتسيا نورمالارىن ىسكە اسىرۋ ماقساتىندا زاڭ جوباسىندا ۋاكىلدىڭ قازاقستان رەسپۋبليكاسى كونستيتۋتسياسىنىڭ تالاپتارىن ساقتاۋ ماسەلەسى بويىنشا كونستيتۋتسيالىق سوتقا جۇگىنۋ قۇقىعى قاراستىرىلعان.
ەكىنشىدەن, باسقا مەملەكەتتەردە ولاردىڭ شاقىرۋى بويىنشا ادام قۇقىقتارى مەن بوستاندىقتارىنىڭ ساقتالۋىن باقىلاۋشى رەتىندە ارەكەت ەتۋ قۇقىعىن بەرۋ ۇسىنىلادى.
ۇشىنشىدەن, ۋاكىلدىڭ قۇزىرەتىن كۇشەيتۋ ماقساتىندا ونىڭ ارناۋلى الەۋمەتتىك قىزمەتتەر كورسەتەتىن ۇيىمدارعا جانە قىلمىستىق-اتقارۋ جۇيەسى مەكەمەلەرىنە كەدەرگىسىز بارۋ قۇقىعى بەكىتىلگەن.
«ۋاكىلدىڭ قىزمەتىن ۇيىمداستىرۋ تيىمدىلىگىن ارتتىرۋ زاڭ جوباسىندا ادام قۇقىقتارى جونىندەگى ۇلتتىق ورتالىق باسشىسىنىڭ ورىنباسارى لاۋازىمىن, سونداي-اق ۇلتتىق ورتالىقتىڭ قوسىمشا فۋنكتسيالارىن ەنگىزۋ ۇسىنىلادى. كونستيتۋتسيالىق زاڭ جوباسىنىڭ قابىلدانۋى ادام قۇقىقتارى جونىندەگى ۋاكىلدىڭ قىزمەتىنە, وعان قازاقستان رەسپۋبليكاسىنىڭ كونستيتۋتسياسىمەن بەرىلگەن وكىلەتتىكتەردى جۇزەگە اسىرۋعا نەگىز جاسايدى دەپ ويلايمىز», دەپ قورىتىندىلادى مينيستر.
