اباتتاندىرىلعان اۋداندار مەن تۇرعىن الاپتار اراسىنداعى تەڭسىزدىكتى جويۋ ءۇشىن قالا اكىمى شالعاي اۋداندارعا بارىپ, تۇرعىندارىمەن كەزدەستى.
قالا باسشىسى ءوزىنىڭ الەۋمەتتىك جەلىدەگى پاراقشاسىندا قازىرگى وزەكتى ماسەلەلەردىڭ ءبىرى – ينجەنەرلىك جەلىلەر ەكەنىن اتاپ ءوتتى. قالانىڭ تۇرعىن ءۇي الاپتارىندا 50 كم ينجەنەرلىك جەلىلەر, ونىڭ ىشىندە 11 كم كارىز, 20,7 كم سۋمەن جابدىقتاۋ جەلىلەرى, 3 كم استام نوسەر كارىزى سالىندى. بيىل تاعى 10 شاقىرىم ينجەنەرلىك جەلىلەردىڭ قۇرىلىسى اياقتالادى دەپ كۇتىلۋدە.
«ەلدى مەكەندەردى جەكە-جەكە ارالاپ, جەرگىلىكتى تۇرعىندارمەن كەزدەسۋ وتكىزەمىز. ءوندىرىس تۇرعىن الابىنىڭ تۇرعىندارىمەن كەزدەستىم. وسىعان دەيىن قالا تۇرعىندارى وقۋ ورىندارىنا بايلانىستى, ناقتىراق ايتقاندا №12 مەكتەپ بويىنشا وزەكتى ماسەلە قوزعاعان ەدى. بۇل مەكتەپ وسىدان 60 جىل بۇرىن سالىنعان, قازىر اپاتتى جاعدايدا. ال ىشىندەگى قۇرىلىمدارى جارامسىز كۇيدە تۇر. ونىڭ عيماراتىن بۇزدىق, قازىر ورنىنا جاڭا, جايلى مەكتەپ سالۋ جۇمىسى باستالدى. ونى 2023 جىلى اياقتاۋدى جوسپارلاپ وتىرمىز», دەپ جازدى التاي كولگىنوۆ.
سونداي-اق اكىم جەكە ينۆەستور ەسەبىنەن بالاباقشانىڭ قۇرىلىسى جۇرگىزىلىپ جاتقانىن حابارلادى.
«جەكە ينۆەستور ەسەبىنەن بالاباقشانىڭ قۇرىلىسى ءجۇرىپ جاتىر. بۇدان بولەك, چەحوەۆ كوشەسىندەگى ء(وندىرىس ەلدى مەكەنى) اپاتتى ۇيلەردىڭ تۇرعىندارىمەن كەزدەستىم. ونداعى ۇيلەردىڭ ءبىر بولىگىن 2024 جىلعا ارنالعان بۇزۋ تىزىمىنە ەنگىزەمىز. بەينەباقىلاۋ كامەرالارىن ورناتۋ, جول ماسەلەسى, اۋلا كلۋبتارى, اباتتاندىرۋ سەكىلدى ءتۇرلى پروبلەمالار قوزعالدى. بۇل ماسەلەلەردى شەشۋ جۇمىسى قولعا الىندى», دەپ اتاپ ءوتتى قالا باسشىسى.
ايتا كەتسەك, تۇرعىن ءۇي الاپتارىندا 680 كم گاز تاراتۋ جەلىسى سالىنىپ ءبىتتى. بۇگىنگى تاڭدا الماتى جانە سارىارقا اۋداندارى گازعا قول جەتكىزۋمەن قامتاماسىز ەتىلگەن. بايقوڭىر جانە ەسىل اۋداندارىندا گاز قۇبىرىن تارتۋ جۇمىستارى جۇرگىزىلۋدە.
سوڭعى جىلدارى تەك تۇرعىن الاپتارىندا عانا 250 كوشە سالىنىپ, جوندەۋ جۇمىستارىنان ءوتتى. اكىمنىڭ ايتۋىنشا, بيىل تاعى 70-كە جۋىق كوشە اسفالتپەن جابىلادى, جۇمىستاردىڭ باسىم بولىگى اياقتالىپ ۇلگەردى. تۇرعىن الاپتارىندا 300-دەن استام اۋلالار مەن قوعامدىق كەڭىستىكتەر اباتتاندىرىلدى, دەنە شىنىقتىرۋ-ساۋىقتىرۋ كەشەندەرى, بىرقاتار وقۋ ورىنى سالىندى.
«مەملەكەت باسشىسى قالانىڭ شەت اۋماقتارىن دامىتۋعا ەرەكشە كوڭىل بولەدى. ءبىزدىڭ ماقساتىمىز – ەلدى مەكەندەرگە قاجەتتى ينفراقۇرىلىم جۇرگىزىپ, تۇرعىن ۇيلەر, الەۋمەتتىك نىساندار, دەمالىس ورىندارىن سالۋ», دەپ قورىتىندىلادى اكىم.
