پرەزيدەنت • 06 قىركۇيەك، 2022

مەملەكەت باسشىسى گەرمانيانىڭ ەكونوميكالىق دەلەگاتسياسىن قابىلدادى

76 رەت كورسەتىلدى

بۇل تۋرالى اقوردانىڭ ءباسپاسوز قىزمەتى ءمالىم ەتتى، دەپ حابارلايدى Egemen.kz.

كەزدەسۋ بارىسىندا قازاقستان مەن گەرمانيا اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى تالقىلاندى.

مەملەكەت باسشىسى گەرمانيا ۇكىمەتى مەن بيزنەسى وكىلدەرىنە ءىلتيپات بىلدىرە وتىرىپ، ەلىمىز ەنەرگەتيكا، ونەركاسىپ، اۋىل شارۋاشىلىعى، كولىك جانە لوگيستيكا، ءبىلىم، عىلىم جانە تەحنيكالىق باعىتتاعى كادرلاردى دايارلاۋ سياقتى نەگىزگى سالالار بويىنشا سەرىكتەستىكتى تەرەڭدەتۋگە مۇددەلى ەكەنىن اتاپ ءوتتى.

قازىرگى ۋاقىتتا ۇكىمەت 800 الەۋەتتى ينۆەستيتسيالىق جوبادان قۇرالعان جوبالار پۋلىن دايىندادى. سونداي-اق قازاقستان گەرمانيا كومپانيالارىن ەلىمىزگە تارتۋ ءۇشىن قولايلى جاعداي جاساۋعا دايىن.

«گەرمانيا – قازاقستاننىڭ ەۋروپا وداعىنداعى ەڭ ماڭىزدى سەرىكتەسى. قازاقستاندا گەرمانيا كاپيتالىنىڭ ۇلەسى بار 600-دەن استام كاسىپورىن تابىستى جۇمىس ىستەپ جاتىر. ساۋدا-ساتتىقتى ارتتىرىپ، ينۆەستيتسيا كولەمىن ۇلعايتۋ ءۇشىن مول الەۋەت بار»، دەدى قاسىم-جومارت توقاەۆ.ا

سونىمەن قاتار پرەزيدەنت گەرمانيانىڭ تەحنيكالىق ماماندىقتار بويىنشا كادر دايارلاۋ تاجىريبەسىنە قىزىعۋشىلىق ءبىلدىردى. اتاپ ايتقاندا، قازاقستان وتاندىق مامانداردىڭ دەڭگەيىن كوتەرۋ ءۇشىن گەرمانيانىڭ تەحنيكالىق ينستيتۋتتارى وكىلدىكتەرىن، زەرتحانالارىن، عىلىمي جانە قۇزىرەت ورتالىقتارىن اشۋ مۇمكىندىگىن قاراستىرىپ جاتىر.

دەلەگاتسيا باسشىسى قازاقستان مەن گەرمانيانىڭ ۇكىمەتارالىق كوميسسياسىنىڭ تەڭ توراعاسى دومينيك شنيحەلس ەكى ەلدىڭ مەملەكەتتىك ورگاندارى مەن بيزنەس قۇرىلىمدارى اراسىنداعى ءىس-ارەكەت دەڭگەيىنە جوعارى باعا بەردى. سونداي-اق ول گەرمانيالىق كومپانيالارمەن جۇمىس ىستەيتىن ۇكىمەتتەگى ارناۋلى توپتىڭ تيىمدىلىگىن اتاپ ءوتتى.

دەلەگاتسيا وكىلدەرى نەمىس بيزنەسى ترانسكاسپي كولىك ءدالىزىن دامىتۋعا، كەن ورىندارىن يگەرۋگە جانە ەنەرگەتيكالىق سەكتورداعى ىنتىماقتاستىقتى نىعايتۋعا قىزىعۋشىلىق بىلدىرەتىنىن جەتكىزدى.

 

سوڭعى جاڭالىقتار

ۇقساس جاڭالىقتار