200-گە جۋىق ءورت ءسوندىرۋشى مەن ورمانشىلار, ەرىكتى ءورت ءسوندىرۋ قۇرامالارى, ازاماتتىق قورعاۋ اكادەمياسىنىڭ كۋرسانتتارى زەرەندى اۋدانىنداعى ورمان ءورتىن سوندىرۋدە. اقمولا وبلىسىنىڭ اكىمى ەرمەك مارجىقپاەۆ پەن تجد باستىعى پولكوۆنيك نۇرلان اتىعاەۆ توتەنشە جاعداي ورنىندا.
«3 قىركۇيەك 20 ساعات 05 مينۋتتا «كوكشەتاۋ» مۇتپ زەرەندى فيليالىندا ءورت شىققانى تۋرالى حابارلاما كەلىپ ءتۇستى. وبلىس اكىمى ەرمەك بورانباي ۇلىنىڭ نۇسقاۋى بويىنشا وبلىستىق جەدەل شتاب قۇرىلدى. وقيعا ورنىنا دەرەۋ اتباسار, ساندىقتاۋ جانە زەرەندى ءورت ءسوندىرۋ بولىمدەرىنىڭ كۇشتەرى مەن قۇرالدارى جىبەرىلدى. سونداي-اق كوكشەتاۋ قالاسىنىڭ ءورت ءسوندىرۋ بولىمدەرىنەن جيىنتىق جاساق جاساقتالىپ, 30 ادامنان تۇراتىن جەكە قۇرام جىبەرىلدى. 15 م/س ەكپىندى جەل كەزىندە ءورتتى ازايتۋ مۇمكىن بولدى. ءورت تۇنگى ساعات 00:00-دە اۋىزدىقتالدى. قازىر ورمان ىشىندەگى ءشوپتى سوندىرەمىز. جاعداي باقىلاۋدا», دەدى ءوڭىردىڭ تجد باستىعى نۇرلان اتىعاەۆ.
الدىن الا اقپارات بويىنشا, ءورت دالا جولىنان تاراعان. ءورتتى جويۋ جۇمىستارى جالعاسۋدا. ءورتتىڭ ەلدى مەكەندەرگە ءوتۋ قاۋپى جوق. ادام شىعىنى مەن جاراقات العاندار تىركەلمەدى.
