«بىزگە ەل بىرلىگى اۋاداي قاجەت. ەرەۋىلگە قاتىسقاندار دا, كۇشتىك قۇرىلىم قىزمەتكەرلەرى دە – ءوز ازاماتتارىمىز. ولار سوت ءادىل وتەدى دەپ قانا ەمەس, قوعام كەشىرىمدى بولادى دەپ ۇمىتتەنىپ وتىر. مەملەكەت قاڭتار وقيعاسىنا قاتىسقان, بىراق اۋىر قىلمىس جاساماعان ازاماتتاردىڭ جازاسىن جەڭىلدەتتى. زاڭ بۇزعانداردىڭ بىرقاتارى كىناسىن ءتۇسىنىپ, وتكەن ىسكە وكىنىپ وتىر. ولارعا كەشىرىممەن قاراعان دۇرىس دەپ ويلايمىن. سوندىقتان مەن قاڭتار وقيعاسىنا قاتىسۋشىلارعا ءبىر رەتتىك راقىمشىلىق جاريالاۋ تۋرالى شەشىم قابىلدادىم», دەدى پرەزيدەنت.
بىراق مۇنداي راقىمشىلىق قاڭتار وقيعاسىنا قاتىسقانداردىڭ بارلىعىنا بىردەي بەرىلمەيدى.
«ارينە, راقىمشىلىق تارتىپسىزدىكتەردى ۇيىمداستىرۋعا قاتىسى بار نەگىزگى ايىپتالۋشىلارعا, سونداي-اق مەملەكەتكە وپاسىزدىق جاساپ, بيلىكتى كۇشپەن اۋىستىرۋعا ارەكەت جاسادى دەپ ايىپتالعاندارعا اسەر ەتپەيدى», دەدى ول.
