كوميسسيا ەل بويىنشا جانارمايدىڭ جەتىسپەۋشىلىگىنە اسەر ەتكەن فاكتورلاردى انىقتاۋمەن اينالىسادى. ماسەلەن, نەگىزگى سەبەپتەردىڭ ءبىرى - وتىن تۇتىنۋدىڭ, ءبىرىنشى كەزەكتە ترانزيتتىك شەتەلدىك كولىكتىڭ ايتارلىقتاي ءوسۋى. ەكىنشى سەبەپ - باعانىڭ ايتارلىقتاي ايىرماشىلىعىنا بايلانىستى قازاقستاننان تىس كورشىلەس ەلدەرگە ديزەل وتىنىنىڭ اعىنى. قازاقستانداعى ديزەلدىڭ قۇنى ليترىنە 230-260 تەڭگەنى قۇرايدى, ال وزبەكستان, قىرعىزستان جانە رەسەي جانار-جاعارماي بەكەتتەرىندە باعا 440 تەڭگەگە دەيىن جەتەدى.
وتاندىق مۇناي بازالارى ديزەل وتىنىن بولشەك ساۋدا قۇنىنان جوعارى باعامەن ساتقان, بۇل وڭىرلەردە وتىن ساتۋ كولەمىنىڭ قىسقارۋىنا اكەلدى, ويتكەنى ونى ساتىپ الۋ جانارماي بەكەتتەرى ءۇشىن ءتيىمسىز بولدى.
كوميسسيا وتىرىسى بارىسىندا «قازمۇنايگاز», Petrosun كومپانيالارى, سونداي-اق مۇناي وڭدەۋ زاۋىتتارى تاراپىنان ءوندىرۋ, ماركەتينگ جانە لوگيستيكادا جۇيەلى كەمشىلىكتەر مەن ولقىلىقتار انىقتالعانى ايتىلدى.
ۋاقىتىلى شارالار قابىلداماعانى ءۇشىن «قازمۇنايگاز» ۇك» اق باسقارما توراعاسى ماعزۇم مىرزاعاليەۆ پەن ەنەرگەتيكا ۆيتسە-ءمينيسترى اسەت ماعاۋوۆقا قاتاڭ سوگىس جاريالاندى. سونداي-اق ەنەرگەتيكا مينيسترلىگى مەن قمگ جاۋاپتى قىزمەتكەرلەرىمەن تارتىپتىك جازالاۋ شارالارى قابىلدانىپ, ەڭبەك قاتىناستارى بۇزىلدى.
«جاعدايدى قالىپقا كەلتىرۋ جانە جانار-جاعارماي ماتەريالدارىنىڭ ىشكى نارىعىن تولىق قامتاماسىز ەتۋ ءۇشىن بىرقاتار جەدەل جانە ۇزاق مەرزىمدى شارا قابىلداندى:
- ديزەل وتىنى ءوندىرىسىنىڭ كولەمى بيىل 5,2 ملن تونناعا دەيىن ۇلعايدى, بۇل 2021 جىلعا قاراعاندا 340 مىڭ تونناعا جوعارى;
- مۇناي وڭدەۋ زاۋىتتارىنان ديزەل وتىنىن جونەلتۋ كولەمى ۇلعايتىلدى;
- «سامۇرىق-قازىنا» قورى جانە «قازمۇنايگاز» ۇك اق-مەن ديزەل وتىنىنىڭ قوسىمشا كولەمىن جەتكىزۋ تۋرالى كەلىسىمگە قول جەتكىزىلدى;
- شىمكەنت ءموز-ءدىڭ وندىرىستىك قۋاتىن كەڭەيتۋ جوسپارلانعان;
- 2023 جىلدان باستاپ ءموز جۇمىسىنىڭ جاڭا سحەماسىنا كەزەڭ-كەزەڭمەن كوشۋ جوسپارلانىپ جاتىر, ونىڭ اياسىندا مۇنايدى زاۋىتتارعا تىكەلەي جەر قويناۋىن پايدالانۋشىلاردىڭ ءوزى جەتكىزەدى نەمەسە مۇناي ءموز-ءدى تىكەلەي ساتىپ الۋ جولىمەن جەتكىزىلەدى», دەلىنگەن حابارلامادا.
كوميسسيا جۇمىسىنىڭ اياسىندا ەنەرگەتيكا مينيسترلىگىندە جانە جمقس-نىڭ ءىرى جەلىلەرىندە قازاقستاندىقتار باعانى نەگىزسىز كوتەرۋ جانە ججم وتكىزۋدەن باس تارتۋ فاكتىلەرى تۋرالى حابارلاي الاتىن call-ورتالىقتار اشىلعانىن ايتا كەتۋ كەرەك.
