ەلىمىزدەگى تۇرمىستىق زورلىق-زومبىلىق پەن بالالارعا قاتىستى جاسالاتىن قىلمىستاردىڭ سانىن ازايتۋعا باعىتتالعان جۇيەلى شەشىمدەر مەن تاپسىرمالار بەرىلىپ-اق جاتىر. الايدا ارناۋلى ورگانداردىڭ بۇدان ساباق الىپ, قانشالىقتى ناتيجە شىعارىپ جاتقانى ۇلكەن سۇراق؟!
قوش, سونىمەن اباي وبلىسىنىڭ پوليتسيا دەپارتامەنتىنىڭ مالىمەتىنە سۇيەنسەك, زارداپ شەككەن بالانىڭ اناسى پوليتسياعا ارىز بەرىپ, سوعان سايكەس كۇدىكتى قۇرىقتالىپتى.
«سوتقا دەيىنگى تەرگەۋ امالدارىنىڭ بارىسىندا كۇدىكتى ادام انىقتالىپ, وعان قىلمىستىق كودەكستىڭ 120 جانە 121-باپتارىنىڭ 4-بولىگىنە سايكەس ايىپ تاعىلىپ, 20 جىل مەرزىمگە دەيىن باس بوستاندىعىنان ايىرۋ جازاسى قاراستىرىلۋى مۇمكىن. سول كۇنى سوتتىڭ قۇزىرەتىمەن كۇدىكتىگە قاتىستى كۇزەتپەن ۇستاۋ تۇرىندەگى بۇلتارتپاۋ شاراسى سانكتسيالاندى», دەلىنگەن جاۋاپتى ۆەدومستۆونىڭ اقپاراتىندا.
جابىرلەنۋشى تاراپتىڭ پىكىرى بويىنشا, وقيعا تامىزدىڭ 13-دە بولعان. سول كۇنى قىزدىڭ اناسى جۇمىسقا كەزەكشىلىككە كەتىپ, 9 جاستاعى بالانى ۇيدە قالدىرۋعا تۋرا كەلگەن. وسى ءساتتى پايدالانىپ, كورشىسى ارام ويىن جۇزەگە اسىرعان دەيدى ۇرجارلىق كەلىنشەك.
وبلىستىق پوليتسيا دەپارتامەنتى قىلمىستىق ءىس بويىنشا ءتيىستى سوت-مەديتسينالىق ساراپتامالار تاعايىندالعانىن, ءىستىڭ بارلىق ءمان-جايىن زەرتتەۋدىڭ جان-جاقتىلىعىن جانە وبەكتيۆتىلىگىن قامتاماسىز ەتۋگە باعىتتالعان قاجەتتى تەرگەۋ ارەكەتتەرى جۇرگىزىلىپ جاتقانىن جەتكىزدى. «بالاعا مەديتسينالىق كومەك كورسەتىلدى», دەدى قۇزىرلى ورگان وكىلدەرى.
اباي وبلىسى,
ءۇرجار اۋدانى
