كوللاجدى جاساعان قونىسباي شەجىمباي, «EQ»
ءبىرشاما ۋاقىت بۇرىن ىشكى ىستەر مينيسترلىگى ەلىمىزدە 245 كولىك ۇرلانعانىن مالىمدەگەن بولاتىن. بۇل ساندارعا قاراپ وتىرىپ, ەرىكسىز باسىڭدى شايقايسىڭ. جىل ورتاسىنان ەندى عانا اسقاندا 245 كولىك ۇرلانسا, جىل سوڭىنا دەيىن جاعداي قالاي بولماق؟
«وسى جىلى 245 كولىك ۇرلىعى تىركەلىپ, ونىڭ 158-ءتىڭ ءىزى سۋىماي اشىلدى. اتالعان قىلمىستىق ىستەر سوتقا جولدانىپ, ۇرلانعان كولىكتەردىڭ 54-ءى يەلەرىنە قايتارىلدى. ۇرلانعان كولىكتەردى كورشى ەلدەر ارقىلى قازاقستانعا كىرگىزۋ فاكتىلەرى دە تىركەلدى. ماسەلەن, كورشىلەس ەلدەر ارقىلى ەل اۋماعىنا كىرگەن 32 كولىكتىڭ ۇرلانعانى انىقتالىپ وتىر», دەگەن بولاتىن ىشكى ىستەر مينيسترلىگىنىڭ وكىلى ءباسپاسوز قىزمەتى ماسەلەنىڭ مانىسىنە ءۇڭىلىپ.
كولىك ۇرلىعى دەرەكتەرى جامبىل وبلىسىندا دا تىيىلماي تۇر. بىرەر كۇن بۇرىن تاراز قالاسىنداعى جەدەل باسقارۋ ورتالىعىنا حابارلاسقان شاھار تۇرعىنى شاعىن اۋدانداردىڭ بىرىندەگى تۇراقتان «ۆاز» ماركالى اۆتوكولىگىنىڭ جوعالعانىن ايتىپ حابارلاسقان.
اتالعان دەرەك بويىنشا جۇدىرىقتاي جۇمىلىپ جۇمىس ىستەگەن پوليتسيا قىزمەتكەرلەرى كۇدىكتى رەتىندە 33 جاستاعى بايزاق اۋدانىنىڭ تۇرعىنىن ۇستاعان. تەرگەپ-تەكسەرۋ بارىسىندا كۇدىكتى رەسەي ەلىنىڭ تىركەۋىندە تۇرعان «ۆاز» ماركالى كولىكتەردى ءتۇن قاتىپ ۇرلاپ, وزگە وڭىرلەردىڭ تۇرعىندارىنا تومەن باعامەن ساتىپ كەلگەنى بەلگىلى بولدى. دەرەكتەرگە سەنسەك, ول وسى كۇنگە دەيىن 13 اۆتوكولىك ۇرلاعان ەكەن.
تەرگەۋ بارىسىندا كۇدىكتى ازامات ءوزىنىڭ كىناسىن تولىعىمەن مويىندادى. بۇگىندە ول ۋاقىتشا ۇستاۋ يزولياتورىنا قاماققا الىنعان. اتالعان دەرەك بويىنشا قىلمىستىق كودەكستىڭ 200-بابى 1-تارماعىمەن (اۆتوموبيلدi نەمەسە وزگە دە كولiك قۇرالىن جىمقىرۋ ماقساتىنسىز قۇقىققا سىيىمسىز يەلەنىپ الۋ) سوتقا دەيىنگى تەرگەۋ امالدارى جۇرگىزىلىپ جاتىر.
جامبىل وبلىسى
