سۋرەتتى تۇسىرگەن يۋري بەككەر
جەر-جاھاننىڭ جالىندى جاستارىنىڭ باسىن قوسقان جارىستا قازاقستان قۇراماسى جەتى جۇلدە العانى جايىندا ءبىز بۇعان دەيىن دە حابارلاعانبىز. تارقاتىپ ايتساق, ەركىن كۇرەستەن وتكەن دودادا مەرەي بازارباەۆ (57 كيلو) قولا مەدال يەلەندى. ايەلدەر كۇرەسى سايىسىندا التىن شاعاەۆا (53 كيلو) مەن اناستاسيا پاناسوۆيچ (72 كيلو) كۇمىسپەن كۇپتەلسە, ءمادينا امان (59 كيلو) قولاعا قول سوزدى. گرەك-ريم كۇرەسى شەبەرلەرىنىڭ باسەكەسىندە يۋسۋف ماتسيەۆ (97 كيلو) ەكىنشى ورىن السا, ماقسات سايلاۋ (87 كيلو) مەن دىنمۇحامەد قوشقار (67 كيلو) ءۇشىنشى ساتىعا تابان تىرەدى.
– بولگاريا جارىستى وتە جوعارى دەڭگەيدە ۇيىمداستىردى. ەلىمىزدىڭ جاستار قۇراماسى دا جاقسى ونەر كورسەتتى. بىراق ءبىز التىن الۋدى كوزدەگەن ەدىك. وكىنىشكە قاراي, بۇل جولى بالۋاندارىمىزعا باس جۇلدە بۇيىرمادى. الداعى ۋاقىتتا جاتتىقتىرۋشىلارمەن بىرلەسە وتىرىپ, وسى ولقىلىقتاردىڭ ورنىن تولتىرۋ ءۇشىن بارىنشا كۇش سالامىز. جالپى العاندا, جاستاردىڭ جەڭىسكە دەگەن ەرەكشە قۇلشىنىستارى كوڭىلىمنەن شىقتى. ەندى وسى جارىستا جۇلدە العان جىگىتتەردى ۇلتتىق قۇراما ساپىنا قابىلدايمىز. ءسوز ورايى كەلگەندە, ولقى سوعىپ تۇرعان تۇستارىمىزعا توقتالا كەتكىم كەلەدى. شىنى كەرەك, وليمپيا مەن ازيا ويىندارى جانە باسقا دا بايراقتى باسەكەلەردە ولجاعا كەنەلەمىز دەپ ءجۇرىپ بىزدەر جاستارعا ءتيىستى كوڭىل بولمەگەن ەكەنبىز. رەزەرۆ ماسەلەسىن نازارىمىزدان تىس قالدىرىپپىز. باپكەرلەردىڭ دە جاعدايى ءماز ەمەس. ولار جارىسقا نەمەسە جاتتىعۋ جيىنىنا بارۋ ءۇشىن اركىمنىڭ الدىندا الاقان جايۋعا ءماجبۇر. بارلىعى دا قاراجات ماسەلەسىنە كەلىپ تىرەلەدى. سپورتشىنىڭ شەبەرلىك دەڭگەيى ءوسۋ ءۇشىن وقۋ-جاتتىعۋ جيىنى تولىققاندى ءوتۋى كەرەك. ءار سالماقتا كەمىندە بەس-التى بالۋان ءبىر-بىرىمەن كۇش سىناسۋعا ءتيىس. ال بىزدە بارلىق وبلىس جيىندارعا تولىق قۇرامدا قاتىسا المايدى. جارىستاردىڭ جاعدايى دا سولاي. ماسەلەن, تاياۋدا تۇركيادا اياقتالعان يسلام ىنتىماقتاستىعى ويىندارىندا گرەك-ريم كۇرەسىنەن باسەكەلەر 10 سالماق دارەجەسى بويىنشا وتسە, ءبىزدىڭ ەلدەن ءتورت بالۋان عانا قاتىستى. بۇل دۇرىس ەمەس. بۇقارالىق پەن باسەكەلەستىك بولعان جەردە عانا ناتيجە بولاتىنىن قاپەردەن شىعارماعان ءجون. قازىرگى كەزدە بارلىق وبلىس ورتالىقتارىندا زامان تالابىنا ساي سپورت عيماراتتارى سالىنىپ, وليمپيادالىق دايارلاۋ ورتالىقتارى مەن سپورتتاعى دارىندى بالالارعا ارنالعان مامانداندىرىلعان مەكتەپ-ينتەرناتتار جۇمىس ىستەپ جاتىر. ول جەرلەردە قولايلى جاعدايدىڭ بارلىعى جاسالعان. سوعان قاراماستان, ءبارى بىردەي جاقسى ناتيجە كورسەتە الماي ءجۇر. وسىعان بايلانىستى مەن قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ پەن مادەنيەت جانە سپورت ءمينيسترى داۋرەن اباەۆپەن كەزدەسۋدى كوزدەپ وتىرمىن. سپورت كوميتەتى مەن وڭىرلەردە وسى سالاعا بولىنەتىن قاراجاتتىڭ قالاي جۇمسالىپ جاتقانى جايىندا ماسەلە كوتەرگىم كەلەدى. سوعان ارنايى رەۆيزيا جاساۋدى سۇرايمىن. بارلىق جاعدايدى تەكسەرىپ, اق-قاراسىن انىقتاپ الۋعا ءتيىسپىز, – دەيدى داۋلەت بولات ۇلى.
سونىمەن قاتار داۋلەت تۇرلىحانوۆ بيىل وزدەرى وتكىزگەن جانە قازاقستاندىق بالۋاندار قاتىسقان جارىستار جايىندا تولىق ەسەپ بەردى. جاسوسپىرىمدەر مەن جاستار بۋىنى اراسىنداعى ەڭ ءىرى ەلىشىلىك دودالار مەن قۇرلىق جانە الەم بىرىنشىلىكتەرى ءوز مارەسىنە جەتتى. ەندى جەرلەستەرىمىز 10-18 قىركۇيەك ارالىعىندا سەربيانىڭ استاناسى – بەلگرادتا جالاۋى جەلبىرەيتىن الەم چەمپيوناتىنا قاتىسۋدى كوزدەپ وتىر. سول جارىستا قازاقستاننىڭ بالۋاندارى تابىستى ونەر كورسەتىپ, جەڭىس تۇعىرىنىڭ ەڭ بيىك ساتىسىنا كوتەرىلەدى دەپ ۇمىتتەنەمىز.
