قازاق بالۋاندارىنىڭ قارقىنى باسەڭ

گرۋزيندەردىڭ ءداۋىرى ءجۇرىپ تۇر

بۇگىنگى تاڭدا قازاقستاننىڭ دزيۋدوشىلارى اراسىندا ەڭ ۇزدىك كورسەتكىش ماعجان شامشادينگە تيەسىلى. 60 كيلو سالماقتا كۇش سىناسىپ جۇرگەن ول ازيا چەمپيوناتىن قولا مەدالمەن قورىتىندىلادى. سونىڭ ارقاسىندا سىر بويىنىڭ سايىپقىرانى سەگىز ساتىعا جوعارىلاپ, قازىرگى كەزدە سەگىزىنشى ورىندى ولجالاۋدا. ەڭ جەڭىل سالماقتا سىنعا ءتۇسىپ جۇرگەن تاعى ءبىر قان­داسىمىز باۋىرجان نارباەۆتىڭ دا جاع­دايى جامان ەمەس. ماڭعىستاۋ وبلىسى­نىڭ مارقاسقاسى 21-ورىندى يەمدەنۋدە. الايدا بۇل بالۋاندارعا ارقالارىن كەڭگە سالۋعا ءالى ەرتە. ويتكەنى ءبىراز ۋاقىت بويى 66 كيلو سالماق دارەجەسىندە ونەر كورسەتكەن داڭقتى ەلدوس سمەتوۆ ءوزىنىڭ ۇيرەنشىكتى سالماعىنا قايتا ورالدى. ەندى ول دا نامىسىن قامشىلاپ, جىبەرگەن ولقىلىقتارىنىڭ ورنىن تولتىرۋ ءۇشىن بارىن سالادى. ويتكەنى وليمپيا ويىندارىنا ءبىر سالماقتا ءبىر عانا بالۋاننىڭ باق سىنايتىنى ءمالىم. سول سەبەپتى دە شەشۋشى تۇستا ۇشەۋىنىڭ دە ايانىپ قال­ماسى انىق. ولاي بولعان جاعدايدا, ەل­ىشىلىك جارىستاردىڭ وزىندە مىقتى باسە­كەلەستىكتىڭ ورنىعاتىن ءتۇرى بار.

66 كيلو سالماق دارەجەسىندەگى الما­تىلىق عۇسمان قىرعىزباەۆ سارى قۇرلىق بىرىنشىلىگىندە قولا مەدال ولجالادى. سونىڭ ارقاسىندا بىردەن 28 ساتىعا كوتەرىلىپ, 32-ورىنعا تۇراقتادى. وعان قاراعاندا جانساي سماعۇلوۆتىڭ جاعدايى الدەقايدا جاقسى. 73 كيلو سالماقتاعى قاراعاندى وبلىسىنىڭ وكىلى نۇر-سۇل­تانداعى دوداعا قاتىسپاعانىمەن, بۇعان دەيىنگى تابىستارىنىڭ ارقاسىندا ءالى دە توپ-10 دزيۋدوشىنىڭ قاتارىندا ءجۇر. ناقتىلاپ ايتساق, جانساي سەگىزىنشى ورىندى يەمدەنۋدە. وسى سالماقتاعى دانيار شامشاەۆتىڭ دا «شابىسى» قۋانتادى. ول ازيا چەمپيوناتىندا كۇش سىناسقان قازاقستاننىڭ تاتامي شەبەرلەرى اراسىنان جالعىز ءوزى عانا التىن تۇعىرعا كوتەرىلگەن ەدى. سونىڭ ناتيجەسىندە 18 جاستاعى اسا دارىندى دزيۋدوشى 47 ساتىعا ءبىر-اق جوعارىلاپ, بۇل كۇندەرى 39-ورىنعا تابان تىرەدى. دانيار الداعى ۋاقىتتا دا ءدال وسىلاي قارقىندى كۇرەسەتىن بولسا, بۇل جىگىتتىڭ بولاشاعى جارقىن بولارى داۋسىز.

جاسىراتىنى جوق, 81 كيلو سالماقتاعى جاعدايىمىز مۇشكىل. ەڭ ۇزدىك ورەنىمىز ابىلايحان جۇبانازار نەبارى 61-ورىندى قاناعات تۇتۋدا. 90 كيلو سالماق دارەجەسىندە كۇش سىناسىپ جۇرگەن ءۇش جەرلەسىمىز قاتار كەلەدى: ەرسۇلتان مۇزاپاروۆ – 33-ورىن, ديدار حامزا – 35-ورىن جانە يسلام بوز­باەۆ – 38-ورىن. بىراق يسلام جۋىردا عانا 100 كيلو سالماققا اۋىستى. سوندىقتان دا بۇ­دان بىلاي باستى تارتىس ەرسۇلتان مەن دي­دار اراسىندا ءوربيدى. ال بوزباەۆ بولسا, جاڭا سالماقتا ازىرگە 44-ورىندى مىسە تۇتۋدا. الەمدىك رەيتينگتە ايبەك سەرىك­باەۆ 44 جانە نۇرلىحان شارحان 60-ورىندى يەلەنۋدە.

وكىنىشكە قاراي, ءبىراز جىلدان بەرى كەڭ بايتاق قازاق ەلىنەن الىپتارمەن ايقاساتىن بىردە-ءبىر ءاپايتوس تابىلار ەمەس. حالىقارالىق جارىستاردان ۇنەمى جۇلدەسىز ورالىپ جۇرگەنىمىز وسى ءسوزىمىزدىڭ ايقىن دالەلى. وتانداستارىمىزدىڭ اراسىنان +100 كيلو سالماقتاعى ەڭ ءتاۋىر كورسەتكىش ءادىل ورازباەۆقا تيەسىلى. ول 37-ورىندى ەنشىلەۋدە. تۇيە بالۋانىمىز ەراسىل قاجىباەۆ 45-ورىندى قاناعات تۇتۋدا. ءدال وسىنداي وگىز اياڭ جۇرىسپەن الىسقا بارمايتىنىمىز انىق.

بۇگىنگى تاڭدا تورتكۇل دۇنيە جانكۇيەر­لەرى گرۋزيا دزيۋدوشىلارىنىڭ ونەرىنە تامسانۋدا. بۇل ەلدىڭ قوس ورەنى ءوز سالماق­تارىندا الدارىنا جان سالاتىن ەمەس. ولار – لاشا شاۆداتۋاشۆيلي (73 كيلو) مەن توتو گريگالاشۆيلي (81 كيلو). وزگە سالماق دارەجەلەرىندە تايپەيلىك يانگ يۋن ۆەي (60 كيلو), مولدوۆالىق دەنيس ۆيەرۋ (66 كيلو), ازەربايجاندىق ماممادالي مەحديەۆ (90 كيلو), رەسەيلىك ارمان اداميان (100 كيلو) جانە تاجىكستاندىق تەمۋر راحيموۆ (+100 كيلو) توپ باستاپ تۇر. بايىپتاپ قاراساڭىزدار, جەتى سالماقتىڭ التاۋىندا بۇرىندارى كسرو-نىڭ قۇرامىندا بولعان مەملەكەتتىڭ وكىلدەرى توپ باسىندا كەلەدى.

راسىندا دا, گرۋزيالىق بالۋانداردىڭ بارلىق جاعىنان مىقتى ەكەنى ەش داۋ تۋعىزباسا كەرەك. جوعارىداعى تابىسىنان بولەك, ءدال قازىرگى كەزدە توپ-10 بالۋاندار اراسىندا ولاردىڭ 13 وكىلى بار. الەمدىك رەيتينگتە ۇزدىكتەر تىزىمىنە ەنگەن دزيۋدوشىلاردىڭ سانى جاعىنان جەر-جاھانداعى ەشبىر كوماندا قاپ تاۋى قىراندارىمەن تەڭەسە المايدى. ول از دەسەڭىزدەر, 90 جانە 100 كيلو سال­ماق دارەجەلەرى بويىنشا توپ-10 تاتامي شە­بەرلەرى قاتارىنا گرۋزيانىڭ ءۇش-ۇشتەن ءاپايتوسى ەنىپ وتىر. ولار – بەكا گۆينياشۆيلي (90 كيلو, 2-ورىن), لۋكا مايسۋرادزە (90 كيلو, 7-ورىن), لاشا بەكاۋري (90 كيلو, 10-ورىن), يليا سۋلا­مانيدزە (100 كيلو, 6-ورىن), ونيسە سانە­بليدزە (100 كيلو, 7-ورىن) جانە ۆارلام ليپارتەلياني (100 كيلو, 9-ورىن). ەڭ جەڭىل جانە اسا اۋىر سالماقتا ەكى بالۋاننان بار. ولار – لۋحۋمي چحۆيمياني (60 كيلو, 5-ورىن) مەن تەمۋر نوسادزە (60 كيلو, 6-ورىن) جانە گۋرام تۋشيشۆيلي (+100 كيلو, 3-ورىن) مەن گەلا زااليشۆيلي (+100 كيلو, 6-ورىن). قالعان سالماقتار بويىنشا دا ولار قارا جاياۋ ەمەس. مىنە, وسى جايتتىڭ ءوزى-اق الاقانداي عانا گرۋزيانىڭ جىگىتتەرى قانشالىقتى قارۋلى ەكەنىن اڭعارتادى.

ەكىنشى جانە ءۇشىنشى ورىنداردى جاپونيا مەن ازەربايجان ءوزارا بولىسۋدە. اتالعان مەملەكەتتەردىڭ جەتى بالۋانى ۇزدىك وندىقتىڭ قاتارىندا. كۇنى كەشەگە دەيىن الدىڭعى لەكتە جۇرگەن رەسەي قۇ­راماسى قازىر قارقىنىن ءبىراز باسەڭدەتىپ الدى. بۇل كۇندەرى ولاردىڭ بەس بالۋانى مىقتىلار ساناتىندا. بەسىنشى جانە التىنشى ساتىعا بەلگيا مەن وزبەكستان قۇرامالارى جايعاستى. ولاردىڭ ارقاي­سىسىنىڭ ءتورت جامپوزى ەرەكشە قۇرمەتكە يە. سونداي-اق موڭعوليا, برازيليا, يزرايل, نيدەرلاندتىڭ – 3, وڭتۇستىك كورەيا, قازاقستان, ۋكراينا, كانادا, تاجىك­­ستاننىڭ – 2, تايپەي, يسپانيا, مولدوۆا, تۇركيا, اۋستريا, پورتۋگاليا, ماجار­­ستان جانە كۋبانىڭ 1 وكىلى توپ-10 دزيۋ­دوشىنىڭ قاتارىنا ەندى.

الەمدىك رەيتينگتىڭ ۇزدىكتەرى

(توپ-5)

60 كيلو: 1. يانگ يۋن ۆەي (تايپەي), 2. ريۋدزيۋ ناگاياما (جاپونيا), 3. يوررە فەرسترەتەن (بەلگيا), 4. فرانتسيسكو گار­ريگوس (يسپانيا) جانە 5. لۋحۋم چحۆي­مياني (گرۋزيا).

66 كيلو: 1. دەنيس ۆيەرۋ (مولدوۆا), 2. يوندونپەرەنلەين باسحۋ (موڭعوليا), 3. ان باۋل (وڭتۇستىك كورەيا), 4. ۆاجا مارگۆەلاشۆيلي (گرۋزيا) جانە 5. ريوما تاناكا (جاپونيا).

73 كيلو: 1. لاشا شاۆداتۋاشۆيلي (گرۋزيا), 2. حيدايات گەيداروۆ (ازەربايجان), 3. تسەند-وچيرىن تسوگتبااتار (موڭعوليا), 4. ماحمادبەك ماحمادبەكوۆ (رەسەي) جانە 5. توحار بۋتبۋل (يزرايل).

81 كيلو: 1. توتو گريگالاشۆيلي (گرۋ­زيا), 2. ماتتياس كاسسە (بەلگيا), 3. ۆەدات البايراك (تۇركيا), 4. گيلەرمە شي­ميدت (برازيليا) جانە 5. شاروفيددين بول­تابوەۆ (وزبەكستان).

90 كيلو: 1. ماممادالي مەحديەۆ (ازەر­بايجان), 2. بەكا گۆينياشۆيلي (گرۋ­زيا), 3. داۆلات بوبونوۆ (وزبەكستان),

4. يۆان فيليپپە سيلۆا مورالەس (كۋبا) جانە 5. سانشيرو مۋراو (جاپونيا).

100 كيلو: 1. ارمان اداميان (رەسەي),

2. دجوردج فونسەكا (پورتۋگاليا), 3. مايكل كوررەل (نيدەرلاند), 4. شادي ەلناحاس (كانادا) جانە 5. پەتر پالچيك (يزرايل).

+100 كيلو: 1. تەمۋر راحيموۆ (تاجىك­ستان), 2. يۋر سپەيكەرس (نيدەرلاند),

3. گۋ­رام تۋشيشۆيلي (گرۋزيا), 4. ودحۋ تسە­­تسەنسەنگەل (موڭعوليا) جانە 5. ينال تاسوەۆ (رەسەي).

قازىرگى كەزدە قازاقستاننىڭ ايەلدەر قۇراما كومانداسىنىڭ مۇشەلەرى اراسىندا كاميلا بەرلىقاش پەن ءابيبا ابۋجاقىنوۆانىڭ اياقالىستارى ءتاۋىر. اسا اۋىر سالماقتا كۇرەسەتىن كاميلا 20-ورىندى يەلەنسە, ەڭ جەڭىل سالماقتا بەلدەسەتىن ءابيبا 23-ساتىعا جايعاسقان. سونداي-اق 57 كيلو سالماقتا سىنعا ءتۇسىپ جۇرگەن سەۆارا نىشانباەۆا توپ-30 بالۋاننىڭ ساناتىندا. ول 29-ورىندى ەنشىلەۋدە. وكىنىشكە قاراي, وزگە بۇرىمدىلارىمىزدىڭ قار­قى­نى تىم باسەڭ.

ايەلدەر دزيۋدوسى جايىندا اڭگىمەنى جالعاستىراتىن بولساق, الەمدىك رەيتينگتە ءيزرايلدىڭ ەكى ارۋى كوش باستاپ تۇر. ولار – تيمنا نەلسون-لەۆي (57 كيلو) مەن راز گەرشكو (+78 كيلو). سونداي-اق ءوز سالماق دارەجەلەرىندە فرانتسيالىق شيرين بۋكلي (48 كيلو), ماجارستاندىق رەكا پۋپپ (52 كيلو), ۇلىبريتانيالىق ليۋسي رەنشالل (63 كيلو), حورۆاتيالىق باربارا ماتيچ (70 كيلو) جانە گەرمانيالىق اننا-ماريا ۆاگنەر (78 كيلو) سىندى بۇرىمدىلار الدارىنا جان سالار ەمەس.