اتالعان حيكاياتتان سىرت ول «مۋراساكي حانىمنىڭ كۇندەلىگى» جانە 128 ولەڭنەن قۇرالعان «پوەتيكالىق ەستەلىكتەر» دەپ اتالعان جيناقتىڭ اۆتورى. ونىڭ شىعارمالارى جاپون ءتىلىنىڭ اۋىز ەكى تىلدەن جازبا تىلگە اۋىسقان كەزەڭىندە جاپون جازۋىنىڭ جاسالۋى مەن دامۋىندا ماڭىزدى ءرول اتقارعان.
ءبىز ءسوز ەتىپ وتىرعان الەمدەگى ەڭ العاشقى رومان 1100 بەت, 54 تاراۋدان تۇرادى. اۆتور بۇل شىعارماسىن تاپجىلماي ون جىل جازىپتى. زەرتتەۋشىلەر بۇل ەڭبەكتىڭ العاشقى تاراۋلارىن قالامگەر نەكەدە تۇرعاندا نەمەسە كۇيەۋى قايتىس بولعاننان كەيىن, ال كەيىنگى بولىمدەرىن ساراي سوتىندا لاۋازىمدى قىزمەت اتقارىپ جۇرگەندە قاعازعا تۇسىرگەن دەپ جورامالدايدى. قانداي قىزمەت اتقارسا دا, جازۋىن تاستاماعان العاشقى رومان اۆتورى وسىنداي كولەمدى تۋىندىنى جارىققا شىعارۋ ءۇشىن وزگەلەردىڭ كومەگىنە مۇقتاج بولعانى شىندىق. جانكۇيەرلەرى وعان قىمبات قاعاز بەن سيا, سونداي-اق كالليگرافتار الىپ بەرىپ تۇرادى. ال العاشقى قولجازبا تومداردى كۇتۋشى حانىمدار جيناپ, جىپكە تىزگەن ەكەن.
سىنشى كين ءوزىنىڭ «جاپون ادەبيەتىنىڭ عاجايىپتارى» اتتى ەڭبەگىندە مۋراساكي «جاپون فانتاستيكاسىنىڭ ەڭ كەرەمەت تۋىندىسىن» ۆاكا سوت كۇندەلىكتەرىنىڭ داستۇرلەرىنە سۇيەنە وتىرىپ جازدى دەگەندى ايتادى.
اتالعان روماننىڭ ەڭ سوڭعى اعىلشىن تىلىندەگى اۋدارماسى 1300 بەتتى قۇرايدى. «بۇل – ادەبيەتتىڭ مونۋمەنتالدى تۋىندىسى», دەيدى گارۆارد ۋنيۆەرسيتەتىنىڭ جاپون ونەرى مەن مادەنيەتىنىڭ پروفەسسورى مەليسسا ماككورميك. ال بىلىكتى ادەبيەتتانۋشىلار 1000 جىل بۇرىن جازىلعان بۇل شىعارمانى الەمدەگى العاشقى رومان دەپ اتادى.
