«قازمۇنايگاز» كومپانياسى قازاقستاندىقتاردى ينتەرنەت الاياقتاردان ساق بولۋعا جانە رەسمي اقپاراتقا سەنۋگە شاقىرادى.
ينتەرنەتتە, اتاپ ايتقاندا, Google, Yandex ىزدەۋ جۇيەلەرىندە, YouTube جانە وزگە دە الەۋمەتتىك جەلىلەردە «قازمۇنايگازعا» ينۆەستيتسيا سالىپ, جوعارى تابىسقا كەنەل» دەگەن جەلەۋمەن جارنامالار جاپپاي تاراتىلا باستاعان, ول سىلتەمەلەر الاياقتار قۇرعان ارنايى سايتتارعا باعىتتايدى. حالىقتى قۇرىعىنا ءتۇسىرۋ ءۇشىن الاياقتار جاساقتاعان سايتىن «قازمۇنايگازدىڭ» رەسمي سايتى» سونداي-اق «قارجىلىق» نەمەسە «ينۆەستيتسيالىق» كومپانيالاردىڭ ۆەب-رەسۋرستارى رەتىندە كورسەتەدى. بۇل جالعان قارجىلىق كومپانيالار بەلگىلى ءبىر سوماعا «قازمۇنايگازدىڭ» اكتسيالارىن ساتىپ الۋدى ۇسىنىپ (ماسەلەن, 127 مىڭ تەڭگە), ءبىر-ەكى ايدا «اي سايىن 8500 دوللارعا دەيىن ينۆەستيتسيالىق تابىس الىپ تۇر» دەگەن جەلەۋمەن قىزىقتىرۋعا تىرىسادى.
ال بۇل ارەكەتتەرى نانىمدى بولۋى ءۇشىن ولار «قازمۇنايگازدىڭ» وسىعان دەيىن جاريالانعان رەسمي بەينەروليكتەرىن قايتا دىبىستاپ قولدانادى. ناتيجەسىندە, الاياقتاردىڭ سايتىنا وتكەندەر كومپانيا اتاۋى بىرنەشە رەت قايتالاناتىن, كاسىبي دىبىستالعان جالعان بەينەروليك تاماشالايدى.
الاياقتىق سايتتاردىڭ الگوريتمدەرى ۇقساس. ادەتتە ولاردىڭ دەرەكقورى جوق جانە تۇراقتى HTML سايتتار بولىپ كەلەدى. بۇل ولاردى USB ديسكىنە كوشىرىپ, ءبىر دومەننەن ەكىنشىسىنە وڭاي تاسىمالداۋعا مۇمكىندىك بەرەدى. دەگەنمەن ماقساتتى اۋديتوريانىڭ سۇرانىسىنا بايلانىستى ءماتىندى جىلدام اۋىستىرا الاتىن, دەرەكقوردى كەڭ, زاماناۋي باعدارلامالىق قۇرالداردى قولداناتىن ديناميكالىق سايتتار دا كەزدەسەدى.
بۇل جالعان سايتتاردىڭ اتاۋى .com سەكىلدى حالىقارالىق ايماقتاردا تىركەلەدى. مىسالعا kazmynai-gaz.com, kz-finvesting.com جانە butterflyexpect.com سايتتارىن كەلتىرۋگە بولادى. ودان بولەك الاياقتار سايتتارىن تاقىرىپتىق دومەندەردە دە تىركەۋى مۇمكىن: tiddley.work, kz.dahod.shop, investor-test.top, trainman.store, delaying.store/kz.
سايتتاردان بولەك, الاياقتار قولدانعان 6 ءموبيلدى قوسىمشا انىقتالعان. ولار دا ۇلتتىق كومپانيا اتىن جامىلىپ, «KazMunay Invest», «كازمۋنايگاز», «KazMunay Club Invest», «كازينۆەست» سەكىلدى ءتۇرلى اتاۋمەن جۇمىس ىستەگەن.
قازاقستاننىڭ قۇقىق قورعاۋ جانە باسقا دا قۇزىرەتتى ورگاندارى وسى سەكىلدى الاياقتىق جولمەن اشىلعان رەسۋرستاردى انىقتاپ, ولاردىڭ جولىن كەسۋ بويىنشا جۇمىس اتقارىپ جاتقانىن ايتادى. دەگەنمەن ينتەرنەتتەگى الاياقتاردىڭ ىزىنە ءتۇسىپ, كىنالىنى انىقتاۋ قيىن. ول سايتتار كوپ جاعدايدا شەتەلدىك مەكەنجايلارعا تىركەلگەن بولىپ شىعادى. سوندىقتان قۇقىق قورعاۋ ورگاندارى, قارجىلىق ۇيىمدار, ۇلتتىق كومپانيالار ازاماتتارعا الاياقتاردان ساق بولۋدى ەسكەرتەدى.
«قازمۇنايگاز» بۇل ماسەلە بويىنشا قارجى مونيتورينگى اگەنتتىگىنە (افم) جانە ۇلتتىق بانككە ءوتىنىش جولدادى. ءوتىنىش ىشكى ىستەر مينيسترلىگىنە بەرىلدى. ناتيجەسىندە, نۇر-سۇلتان قالاسى پوليتسيا دەپارتامەنتىنىڭ ەسىل اۋداندىق پوليتسيا باسقارماسى قىلمىستىق ءىس قوزعادى. «قازمۇنايگاز» وسى قىلمىستىق ءىس بويىنشا جابىرلەنۋشى رەتىندە بارلىق دەرەكتەردى ۇسىندى. قازىرگى ۋاقىتتا اتالعان قۇقىق بۇزۋشىلىققا قاتىستى كۇدىكتىلەردى انىقتاۋعا باعىتتالعان تەرگەۋ ارەكەتتەرى مەن جەدەل-ىزدەستىرۋ شارالارى ءجۇرىپ جاتىر.
كومپانيانىڭ قىزمەتى تۋرالى سەنىمدى اقپارات تەك www.kmg.kz سايتىندا جانە الەۋمەتتىك جەلىلەردەگى رەسمي اككاۋنتتاردا جاريالانادى: YouTube: KazMunaiGas, Facebook: kazmunaygaspress, Instagram: kazmunaygaspress, Telegram: kmgpress.
