بۇگىن دۇنيەجۇزىلىك بانكتىڭ ورتالىق ازياداعى وڭىرلىك ديرەكتورى تاتيانا پروسكۋرياكوۆا مەن پرەمەر-ءمينيستردىڭ ورىنباسارى – قر قارجى ءمينيسترى ەرۇلان جاماۋباەۆ جەكە سەكتوردىڭ باسەكەگە قابىلەتتىلىگىن ارتتىرۋ جانە كوروناۆيرۋس پاندەمياسىنان كەيىن قازاقستان ەكونوميكاسىنىڭ تۇراقتى قالپىنا كەلۋىن قامتاماسىز ەتۋ ءۇشىن 345,7 ملن ەۋرو سوماسىنداعى قارىز تۋرالى كەلىسىمگە قول قويدى.
اتالعان كەلىسىمدى دۇنيەجۇزىلىك بانكتىڭ ديرەكتورلار كەڭەسى وتكەن جىلدىڭ جەلتوقسانىندا ماقۇلدادى, ال ءتيىستى جارلىققا مەملەكەت باسشىسى قاسىم-جومارت توقاەۆ 2022 جىلعى 2 شىلدەدە قول قويعان.
«قارىزدىڭ ۇزاق مەرزىمدى سيپاتى جانە نەعۇرلىم تومەن پايىزدىق تولەمدەر سىرتقى بورىشتى وتەۋدىڭ ورتاشا مەرزىمىن ۇلعايتۋ جانە قارىز الۋدىڭ ورتاشا قۇنىن تومەندەتۋ ەسەبىنەن ەل بورىشى بەيىنىنىڭ جالپى قۇرىلىمىن جاقسارتادى. قارىز شەڭبەرىندە ۇسىنىلاتىن قاراجا ۇكىمەتتىڭ بيۋدجەتتىك قاجەتتىلىكتەرىن قارجىلاندىرۋدى قولدايدى», دەلىنگەن دۇنيەجۇزىلىك بانك حابارلاماسىندا.
الىنعان قارىزدى وتەۋ مەرزىمى 11,5 جىلدى قۇرايدى. سونداي-اق جەڭىلدىك كەزەڭىنىڭ قوسىمشا 2,5 جىلى قاراستىرىلعان.
ايتا كەتسەك, قازاقستان دۇنيەجۇزىلىك بانك توبىنا قوسىلعان ساتتەن باستاپ سوڭعى 30 جىل ىشىندە ەلگە ۇسىنىلعان قولداۋ كولەمى 8,6 ملرد اقش دوللارىنان استى.
