«كەزدەسۋ بارىسىندا ەلشىگە بيىلعى 21 تامىزدا قازاقستاندىق بلوگەر دياس قۇزايىرعا بەرگەن سۇحباتىندا ايتقان مالىمدەمەلەرىنە بايلانىستى نارازىلىق ءبىلدىرىلدى.
قازاقستان تاراپى مۇنداي مالىمدەمەلەردىڭ شەت مەملەكەت ەلشىسىنىڭ قىزمەتىنە ساي كەلمەيتىندىگى جانە قولايسىزدىعى تۋرالى ۇستانىمىن ءبىلدىردى. مۇنداي ءىس-قيمىلدار مەملەكەتتەر اراسىنداعى دوستىق قاتىناستارعا نۇقسان كەلتىرمەۋگە ءتيىس», دەلىنگەن قر ءسىم ءباسپاسوز قىزمەتىنىڭ مالىمەتىندە.
ايتا كەتەيىك, قازاقستان حالقى اسسامبلەياسى ۋكراينا ەلشىسى پەتر ۆرۋبلەۆسكيدىڭ بلوگەر دياس قۇزايىرعا بەرگەن سۇحباتىندا رەسەيگە قاتىستى سوزدەرىن ايىپتاعان بولاتىن.
ء«بىز, قازاقستان حالقى اسسامبلەياسىنىڭ مۇشەلەرى, قازاقستان رەسپۋبليكاسىنداعى ۋكراينا ەلشىسى پەتر ۆرۋبلەۆسكي مىرزانىڭ قازاقستاندىق بلوگەرلەردىڭ بىرىنە بەرگەن سۇحباتىندا ايتقان سوزدەرىن قاتاڭ ايىپتايمىز جانە ونداي سارىنداعى مالىمدەلەرگە جول بەرۋگە بولمايدى دەپ سانايمىز. بەيبىتشىلىك پەن بىرلىك ءبىزدىڭ مەملەكەتتىك ساياساتتىڭ جانە قوعامدىق بىرىگۋدىڭ باستى قاعيدالارى. سوندىقتان مۇنداي پىكىردى كىم ايتسا دا ءبىزدىڭ قارسىلىعىمىزعا ۇشىرايدى», دەلىنگەن اسسامبلەيا حابارلاماسىندا.
سونىمەن قاتار ۇيىم ديپلوماتيا – وشپەندىلىك پەن ارازدىقتى قوزدىرۋ ءۇشىن ەمەس, بەيبىتشىلىك پەن ىنتىماقتاستىق يدەالدارىنا قىزمەت ەتۋى ءتيىس ەكەنىن جەتكىزگەن ەدى.
