جارقىن جوبا ەل فۋتبولىنىڭ وتانى سانالاتىن سەمەي قالاسىنان باستاۋ الىپ, پاۆلودار, اقتوبە, اقتاۋ, تاراز, شىمكەنت, نۇر-سۇلتان, الماتى قالالارىندا جالعاستى. جوبا جەتەكشىلەرى ءۇش ايعا جۋىق ۋاقىت ىشىندە ۇمىتكەرلەردىڭ اياق الىسىن بايقاپ, ۇزدىكتەردىڭ ەسىمىن كۇندەلىگىنە ءتۇرتىپ وتىردى. شىن مىقتىلار اۋىلدان شىعادى دەيمىز عوي. دەي تۇرعانمەن جوبا بيىل العاش رەت قولعا الىنعاندىقتان ازىرگە شالعاي ەلدى مەكەندەردى قامتۋ الداعى ۋاقىتتىڭ ەنشىسىنە قالدىرىلىپتى. سونىڭ وزىندە وبلىس ورتالىعىندا وتكەن ىرىكتەۋلەرگە 400 شاقىرىم جولدى ارتقا تاستاپ, اۋىلدىق جەرلەردەن ارنايى ات باسىن بۇرعاندار كوپ بولىپتى. ماسەلەن, باياناۋىل اۋدانى مايقايىڭ كەنتىنەن كەلگەن ورەندەر الىستان بەكەرگە كەلمەگەنىن دالەلدەپ, ۇزدىكتەردىڭ قاتارىنان تابىلدى.
ىرىكتەۋدەن ىركىلمەي وتكەندەر سوڭعى ءبىر اي بويى تالعارداعى ۇلتتىق قۇرامانىڭ بازاسىندا شەبەرلىكتەرىن شىڭدادى. ءار اپتا سايىن ازۋلى كوماندالارمەن جولداستىق كەزدەسۋلەر وتكىزىپ تۇردى. ءتىپتى ءوز «زامانىندا» قازاقستان ۇلتتىق قۇراماسىنىڭ نامىسىن قورعاعان تانىمال ارداگەر فۋتبولشىلارمەن شەبەرلىك بايقاسىپ, مول تاجىريبە جيناقتاعان ەدى. اتاپ ايتساق, سامات سماقوۆ, داۆيد لوريا, نۇربول جۇماسقاليەۆ, اندرەي كارپوۆيچ, اعايىندى ازوۆسكيلەر, فارحادبەك يريسمەتوۆ, دميتري بياكوۆ, الەكساندر كۋچما, ماكسيم جالماعامبەتوۆ, قايرات اشىربەكوۆ, دانيار مۇقانوۆ, سەرگەي بويچەنكو, يۋري نوۆيكوۆ, يگور سولوشەنكو, رۋسلان بالتيەۆ, ەدۋارد سەرگيەنكو سەكىلدى فۋتبولشىلارمەن دوپ تەبۋ باقىتى بۇيىردى. سونداي-اق جولداستىق كەزدەسۋگە كەزىندە يسپانيانىڭ «رەال مادريد», يتاليانىڭ «ينتەر» كلۋبىندا جاسىنداي جارقىلداعان ەستەبان كامبياسسو ارنايى شاقىرىلعان بولاتىن.
«Super Bol» جوباسىنىڭ «استانا ارەنا» ستاديونىندا وتكەن شەشۋشى ءساتى تارتىسقا تولى بولدى. جوبا قاتىسۋشىلارى قورىتىندى كەزدەسۋدى ەلىمىزدىڭ ءبىرىنشى ليگاسىندا باق سىنايتىن «جەڭىس» كومانداسىنا قارسى وتكىزدى. شەشۋشى دەپ ويىپ تۇرىپ كورسەتكەنىمىز تەگىن ەمەس. سەبەبى بۇل ماتچقا شەتەلدەن, الىس-جاقىننان 60-تان استام سكاۋت كەلىپ, شەبەرلىگىمەن كوزگە تۇسكەن ويىنشىلاردى ءوز كومانداسىنىڭ قاتارىنا قوسۋعا نيەت تانىتتى. ولاردىڭ اراسىندا ازۋلى دەگەن يتاليالىق «تورينو» مەن ماسكەۋلىك «سپارتاكتىڭ» ماماندارى, «چەلسي» كومانداسىنىڭ تەحنيكالىق ديرەكتورى كلود ماكەلەلە بولدى. قىسقاسى, بۇل كەزدەسۋدە «Super Bol» جوباسى قاتىسۋشىلارىنىڭ تاعدىرى شەشىلدى.
كەزدەسۋگە توقتالساق, قوس كوماندانىڭ ويىنشىلارى دا بارىنشا مىقتىلىعىن كورسەتۋگە تىرىستى. «جەڭىس» كومانداسى تومەنگى ليگادان ەندى عانا كوتەرىلىپ, «ابىروي جيناپ» جۇرگەندىكتەن جانكۇيەرلەردىڭ ىستىق ىقىلاسىنا بولەنۋگە بارىن سالدى. كەزدەسۋدىڭ العاشقى جارتى ساعاتى سۋپەربولدىقتاردىڭ شابۋىلىمەن ەستە قالدى. اسىرەسە كوماندا كاپيتانى ايانحان دۋنايبەكتىڭ بەلسەندى ۇمتىلىسىن اتاپ وتكەن ءجون. «جەڭىس» كومانداسىنىڭ اياقدوپشىلارى دا قاراپ قالعان جوق. تاكتيكالىق شابۋىلدارىن ۇيىمداستىرىپ, قارسىلاستىڭ اپتىعىن باسۋعا تىرىسىپ باقتى. دەسە دە ايانحاننىڭ شيراق قيمىلى ءوز ناتيجەسىن بەردى. قاقپاشىمەن بەتپە-بەت قالعان ساتتە قورعاۋشىلاردىڭ ءبىرى ايانحاندى سۇلاتىپ ءتۇسىرىپ, كەزدەسۋدىڭ باس تورەشىسى راۆشان يرماتوۆ پەنالتي بەلگىلەدى. ءيا, قالىس ەستىگەن جوقسىز. بۇل كەزدەسۋگە 2015 جىلى الەمنىڭ ەڭ ۇزدىك تورەشىسى اتانعان وزبەك مامانى قازىلىق ەتتى. پەنالتيدى الىبەك جاردەموۆ ءساتتى ورىنداپ, كومانداسىن العا شىعاردى.
ەكىنشى تايمدا دا الما-كەزەك شابۋىل تولاستاعان جوق. دەسە دە تابلوداعى ەسەپ كەزدەسۋدىڭ اياعىنا قاراي ءجيى وزگەردى. كەزدەسۋدىڭ 81 جانە 84-مينۋتتارىندا «جەڭىس» كومانداسىنىڭ ويىنشىسى سايان مۇقانوۆ ءدۋبلدىڭ اۆتورى اتاندى. ال كەزدەسۋدىڭ 90 مينۋتىندا ايانحان اقىرى دەگەنىنە جەتىپ, ەسەپتى تەڭەستىردى. كەزدەسۋدەن كەيىنگى پەنالتي سەرياسىندا 6-5 ەسەبىمەن «Super Bol» كومانداسى جەڭىسكە جەتىپ, جوبانىڭ نۇكتەسىن تاماشا قويدى.
كەزدەسۋدەن كەيىن كوپشىلىكتىڭ اسىعا كۇتكەنى ترانسفەردىڭ بارىسى ەدى. ارينە, كەزدەسۋ اياقتالا سالا بارىنە بىردەي كەلىسىمشارت ۇسىنىلا بەرمەس. ماماندار جاقسىلاپ ويلانىپ, ارىپتەستەرىمەن اقىلداسىپ, ءبىر توقتامعا كەلەتىنى تۇسىنىكتى. دەي تۇرعانمەن, العاشقى ترانسفەر كوپ كۇتتىرگەن جوق. باياناۋىلدىق جاس تالانت جاقسىلىق كەنجەباەۆقا «اقسۋ» (پاۆلودار) كومانداسى «قۇدا ءتۇستى». جاقسىلىق بۇل جوباعا قاتىسۋ ءۇشىن زاۋىتتاعى جۇمىسىن تاستاۋعا بەل بۋعان. بالا كۇنگى ارمانىنا قول جەتكىزۋ ءۇشىن وسىنداي قادامدارعا بارعان ول ماقساتىنا جەتتى دە. كەزدەسۋدەن كەيىن كوزىنە ەرىك بەرگەن ول: «اتا-انامنىڭ ءۇمىتىن اقتادىم» دەپ قۋانىشتىڭ جاسىن ءسۇرتتى.
ودان كەيىن الىبەك جاردەموۆكە «اقتوبە» كومانداسى ۇسىنىس جاساعانى حابارلاندى. ال ايانحان دۋنايبەككە «ماقتاارال» كومانداسى قىزىعۋشىلىق تانىتقان كورىنەدى. «جەڭىس» كومانداسىنىڭ باس باپكەرى رينات اليۋەتوۆ تە كەزدەسۋگە دەيىن «Super Bol» جوباسى قاتىسۋشىلارىنىڭ ىشىنەن 2 ويىنشىعا كوز تۇسكەنىن ايتقان بولاتىن. باستىسى, جوبانىڭ ماقساتى ورىندالىپ كەلەدى. جاقىن كۇندەرى جوبا قاتىسۋشىلارىنا جان-جاقتان ۇسىنىستار ءتۇسىپ, ءسۇيىنشى حابارلار كوپ بولادى دەگەن سەنىم مول.
ەستەرىڭىزگە سالساق, «Super Bol» جاس فۋتبولشىلار جوباسىن پرەزيدەنت جانىنداعى «Dara» دارىندىلاردى قولداۋ قورى جانە Freedom Broker ينۆەستيتسيالىق كومپانياسى قولعا الدى. جوبانىڭ حەدلاينەرلەرى – داۆيد لوريا مەن سامات سماقوۆ.
– ناعىز مىقتىلار اۋىلدان شىعادى. بىراق كوبى سول جاقتا قالىپ قويادى. ءبىزدىڭ جوبانىڭ ماقساتى – سولاردى انىقتاپ, باپتاپ, ۇلكەن ويىندارعا قوسۋ. ارينە, قالالىق جەرلەردەگى جاستار دا نازاردا, – دەدى «Super bol» جوباسىنىڭ باس مەنەدجەرى داۆيد لوريا.
ارينە, جوبا العاش رەت ۇيىمداستىرىلعاندىقتان ازدى-كەم ولقىلىقتاردىڭ ورىن الۋى زاڭدىلىق. «Super bol» جوباسىنىڭ كرەاتيۆتىك پروديۋسەرى ايدىن قوجاحمەت الداعى ۋاقىتتا ءالى تالاي ورەنگە ۇلكەن مۇمكىندىكتەر بەرىلەتىنىن جەتكىزدى. كوپشىلىكتىڭ كۇتكەنى دە سول. ەندەشە, ىسكە ءسات!
