بۇل جايىندا قالا اكىمى التاي كولگىنوۆ ايتتى.
«بيىل اپاتتى جاعدايداعى ەسكى ۇيلەردىڭ اراسىندا قاۋىپتى كۇيدەگى 18 ءۇيدىڭ تۇرعىندارىن كوشىرەمىز. وندا 300-دەن استام وتباسى تۇرادى. مۇنداي كوپپاتەرلى جانە جەكە ۇيلەردىڭ پروبلەماسى نەگىزىنەن ەلەكتر سىمىمەن, كارىزبەن, سۋمەن, شاتىرمەن, ىرگەتاسىمەن بايلانىستى. ءتىپتى پاتەر ىشىندە پەش تە ورناتىلعان, دارەتحاناسى سىرتتا ورنالاسقان تۇرعىن ۇيلەر دە بار. بىرقاتار اپاتتى ۇيلەردىڭ تۇرعىندارىمەن كەزدەستىم. ماسەلەن سارىارقا اۋدانىندا تۇراتىن تۇرعىندارمەن (راۋان تۇيىق كوشەسى, 15, 16, 17) كەزدەسۋدە كوشۋ ماسەلەسى تالقىلاندى. ولاردىڭ باسپاناسى اپاتتى ەسكى ۇيلەر تىزىمىنە ەنگىزىلگەن: قازىرگى ۋاقىتتا ولارعا ارناپ جاڭا تۇرعىن ءۇي كەشەنى سالىنىپ جاتىر, ونى جىل سوڭىنا دەيىن اياقتاۋدى جوسپارلاپ وتىرمىز. تۇرعىن ءۇي كەشەنىنىڭ قۇرىلىسى اياقتالا سالىسىمەن راۋان تۇيىق كوشەسى 15, 16, 17 مەكەنجايىندا تۇراتىن تۇرعىنداردى كوشىرەمىز», دەپ جازدى اكىم Instagram پاراقشاسىندا.
ونىڭ ايتۋىنشا, قازىرگى ۋاقىتتا ەلوردانى دامىتۋ باعدارلاماسى بويىنشا تۇرعىنداردى قاۋىپتى ۇيلەردەن كوشىرۋ جۇمىسى ءجۇرىپ جاتىر.
سوڭعى 3 جىلدا اپاتتى ۇيلەردەن 700-گە جۋىق وتباسى كوشىرىلدى. باعدارلاما باستالعاننان بەرى شامامەن 4 مىڭ 200 وتباسى قونىس اۋدارعان.
سول سياقتى قالادا 200-دەن استام اپاتتى ءۇي بار. ولار بويىنشا ءتيىستى جۇمىس جوسپارلى تۇردە جۇرگىزىلەدى.
«سونىمەن قاتار, مەملەكەت باسشىسىنىڭ تاپسىرماسى بويىنشا باسپانا جاعدايىن جاقسارتۋ ءۇشىن تۇرعىن ءۇي كەشەنىن جوندەۋ, ليفتىلەردى اۋىستىرۋ, جەڭىلدىكتى الەۋمەتتىك تۇرعىن ءۇي قۇرىلىسى, ۇزاققا سوزىلعان قۇرىلىستاردى اياقتاۋ بويىنشا جۇمىس جالعاسىپ جاتىر», دەدى التاي كولگىنوۆ.
