جارىستىڭ اشىلۋ سالتاناتىنا الماتى وبلىسى دەنە شىنىقتىرۋ جانە سپورت باسقارماسىنىڭ باستىعى نۇرباقىت تەڭىزباەۆ, «دينامو» سپورت قوعامى توراعاسىنىڭ ءبىرىنشى ورىنباسارى اسقار ومارقۇلوۆ, وليمپيادا چەمپيونى ەرماحان ىبىرايىموۆ, وليمپيا ويىندارىنىڭ كۇمىس جۇلدەگەرى مۇحتارحان دىلدابەكوۆ جانە تاعى باسقا اتاعى الىسقا جايىلعان بوكسشىلار مەن سپورت ارداگەرلەرى قاتىستى.
تۇرسىنعالي نۇرجاقىپ ۇلى كەزىندە ەلىمىزدەگى تانىمال بوكسشىلاردىڭ ءبىرى بولدى. رەسپۋبليكالىق جانە بۇكىلوداقتىق تۋرنيرلەردە جۇلدە الىپ, كسرو سپورت شەبەرىنىڭ كۇمىس بەلگىسىن كەۋدەسىنە تاقتى. توقسانىنشى جىلداردىڭ باسىندا ەرماحان ىبىرايىموۆتى جاتتىقتىرىپ, ءوز شاكىرتىنىڭ اتلانتا وليمپياداسىندا قولا جانە سيدنەي وليمپياداسىندا التىن مەدال الۋىنا سۇبەلى ۇلەس قوستى. سونىمەن قاتار ەرماحاننىڭ الەم چەمپيوناتىنىڭ كۇمىس پەن قولا جۇلدەگەرى, ەكى دۇركىن قۇرلىق چەمپيونى, ازيا ويىندارىنىڭ جەڭىمپازى دەگەن اتاقتارى بار.
1997 جىلى ەدىلوۆ ۇلتتىق كوماندامىزدىڭ تىزگىنىن ۇستادى. سول تۇستا وتاندىق بىلعارى قولعاپ شەبەرلەرى حالىقارالىق ارەنادا زور تابىستارعا قول جەتكىزدى. ەڭ باستى تابىسىمىز – عاسىرلار توعىسىندا الاۋى تۇتانعان سيدنەي وليمپياداسىندا قازاقستان قۇراماسىنىڭ ءتورت بىردەي بوكسشىسىنىڭ فينالعا شىعۋى. ناتيجەسىندە, بەكزات ساتتارحانوۆ پەن ەرماحان ىبىرايىموۆ باس جۇلدەنى ولجالاسا, بولات ءجۇمادىلوۆ پەن مۇحتارحان دىلدابەكوۆ كۇمىس مەدال يەلەندى. ءبىر وكىنىشتىسى, ارادا 22 جىل وتسە دە, جاسىل قۇرلىقتاعى سول ناتيجەنى ءبىزدىڭ جۋان جۇدىرىقتى جىگىتتەرىمىز ءالى دە قايتالاي العان جوق.
سودان كەيىنگى جىلدارى دا تۇرسىنعالي ەدىلوۆ جاتتىقتىرۋشىلىق قىزمەتتە ءجۇرىپ, زور بەدەل جيدى. ونىڭ شاكىرتتەرى اراسىندا وليمپيا ويىندارى مەن الەم چەمپيوناتتارىنا قاتىسىپ, حالىقارالىق جارىستاردا جۇلدە العاندارى دا بار. ال تالعاردا ايگىلى باپكەردىڭ قۇرمەتىنە ءوتىپ جاتقان تۋرنيردە قازاقستاننىڭ بىرقاتار ايماقتارى جانە وزبەكستان مەن قىرعىزستاننان كەلگەن 150-دەن اسا بالعىن بىلعارى قولعاپ شەبەرى باق سىناۋدا.
