سپورت • 19 تامىز، 2022

جاستار سپورتى قولداۋدى قاجەت ەتەدى

89 رەت كورسەتىلدى

جاستار – ەلدىڭ ەرتەڭى. ەندەشە، ولاردىڭ اماندىعى مەملەكەتتىڭ ساۋلىعى دەگەن قورىتىندى شىعارساق قاتەلەسپەيمىز. وسى ورايدا جەتكىنشەكتەردىڭ دەنساۋلىعىن جاقسارتۋ، سونىڭ ىشىندە سپورتپەن اينالىسۋعا باۋلۋ وزەكتى ماسەلە ەكەنىن ەشكىم جوققا شىعارمايدى.

رەسمي دەرەكتەر بالالار مەن جاسوسپى­رىم­دەردىڭ ۇشتەن ءبىرى عانا بەلسەندى ءومىر سالتىن ۇستاناتىنىن كورسەتەدى. وتان ال­دىنداعى بورىشىن وتەۋگە ءتيىس جاستاردىڭ 40 پايىزى اسكەري قىزمەتكە جارامسىز. ونىڭ ۇستىنە، دەنساۋلىق ساقتاۋ سالاسى ماماندارى كەي اۋرۋ تۇرلەرىنىڭ جاسارىپ بارا جاتقانىن ايتىپ دابىل قاعىپ ءجۇر.

قۋانىشىمىزعا وراي، جاستار اراسىندا سپورتپەن شۇعىلدانىپ، بەلسەندى ءومىر سالتىن ۇستاناتىندار سانى بىرتىندەپ ارتىپ كەلەدى. ورەندەرىمىز فيزيكالىق جانە پسيحيكالىق ساۋلىقتىڭ كەپىلى سپورتپەن جۇيەلى شۇعىلدانۋ كەرەك دەگەن يدەيانى تۇسىنگەنى، مۇنىڭ قازىرگى تىلمەن ايتساق ترەندتە ەكەنىن اڭعارا الامىز.

رەسمي مالىمەتتەرگە سۇيەنسەك، جاستاردى دەنە شىنىقتىرۋمەن جانە سپورتپەن اينالىسۋعا تارتۋ پروتسەسىندە وڭ ديناميكا بار. كەيىنگى جىلدارى بۇل كورسەت­كىش تۇراقتى وسكەنى بايقالادى. ماسە­لەن، 2013 جىلى 2،3 ملن جەتكىنشەك دەنە شىنىقتىرۋمەن شۇعىلدانعان. ال 2020 جىلى بۇل كورسەتكىش 2،5 ملن-عا جەتكەن. ارينە، 7 جىلدا سپورتتى سەرىك ەتكەن جاس­تار كۇرت ارتپادى. دەگەنمەن وڭ ناتيجە بايقالادى.

«جاستار» عىلىمي-زەرتتەۋ ورتا­لى­عى جۇرگىزگەن «جاستاردىڭ نەگىزگى ستراتا­لا­رىنىڭ پروبلەمالارى مەن قاجەتتىلىكتەرى» الەۋ­مەتتىك ساۋالداماسىنان قىزىق مالىمەت بايقادىق. جاس ەرەكشەلىگىنە قاراي سپورتپەن شۇعىلداناتىندار سانى دا وزگەرەدى ەكەن. مىسالى، 14-18 جاستاعىلاردىڭ 25 پايىزى بوس ۋاقىتىن دەنە شىنىقتىرۋعا ارنايدى. الايدا ەسەيگەن سايىن جاستار سپورتقا اسا دەن قويمايتىن كورىنەدى. 19-23 جاستاعىلاردىڭ – 22،8 پايىزى، 24-28 جاستاعىلاردىڭ 18 پايىزى عانا سالاماتتى ءومىر سالتىن ۇستانادى.

اتالعان ورتالىق جۇرگىزگەن ساۋالداماعا جاۋاپ بەرگەندەر قۇرداستارى اراسىندا سپورت پەن سالاماتتى ءومىر سالتىن ناسيحاتتاۋ قاجەتىن اتاپ وتكەن ەكەن. جالپى، قازىرگى تاڭدا بۇل باعىتتا اتقارىلىپ جاتقان شارۋالار از ەمەس. مەملەكەت باسشىسى­نىڭ «حالىق بىرلىگى جانە جۇيەلى رەفورمالار – ەلدىڭ وركەندەۋىنىڭ بەرىك نەگىزى» اتتى جولداۋىندا بۇقارالىق جانە بالالار سپورتىن دامىتۋ بويىنشا بىرقاتار مىندەت قويىلدى. اتاپ ايتقاندا، وبلىس اكىمدەرىنە سپورت ينفراقۇرىلىمىن كەزەڭ-كەزەڭمەن سالۋدى قامتاماسىز ەتۋدى تاپسىردى. پرەزيدەنت 2019 جىلعى 2 قىركۇيەكتەگى قازاقستان حالقىنا جولداۋىندا دا بالالار ءۇشىن سپورت عيماراتتارىن بارىنشا قول­جەتىمدى ەتۋ ماسەلەسىن كوتەردى. وسىنىڭ اياسىندا دەنە شىنىقتىرۋ مەن سپورتتى دامىتۋدىڭ 2020-2025 جىلدارعا ارنالعان كەشەندى جوسپارى ازىرلەنگەن بولاتىن.

كەيىنگى جىلدارى تۇششىمدى ناتيجەگە قول جەتتى دەپ ايتا الامىز. ماسەلەن، قازىرگى تاڭدا ەلىمىزدە جالپى ءبىلىم بەرەتىن 5 428 مەكتەپتە سپورت زالى بار. مادەنيەت جانە سپورت مينيسترلىگى 101 سپورت فەدەراتسياسىنا اككرەديتاتسيا بەرگەن. 2 393 اۋىلدىق وكرۋگتە ءۇش مىڭنان استام سپورت نۇسقاۋشى جۇمىس ىستەيدى.

مينيسترلىك 2025 جىلعا قاراي بالالار-جاسوسپىرىمدەر كلۋبتارىنىڭ سانىن 579-دان 718-گە دەيىن، بالالار مەن جاسوسپىرىمدەرگە ارنالعان دەنە شىنىقتىرۋ كلۋبتارىنىڭ سانىن 107-دەن 282-گە دەيىن، سپورت عيما­راتتارىن 23،9 مىڭنان 30 مىڭ بىرلىككە دەيىن كوبەيتۋدى جوسپارلاپ وتىر.

سوڭعى جاڭالىقتار

ەل بىرىنشىلىگى باستالدى

بوكس • بۇگىن، 07:42

دۋبايدا دايىندالادى

تەننيس • بۇگىن، 07:40

«بارىس» تاعى جەڭىلدى

حوككەي • بۇگىن، 07:39

كىشكەنتاي قۇتقارۋشى

قوعام • بۇگىن، 07:38

جاساندى جۇرەك تە ءومىردى ۇزارتادى

مەديتسينا • بۇگىن، 07:37

كارديولوگتەر ەنگىزگەن تەحنولوگيا

مەديتسينا • بۇگىن، 07:35

جىلۋ قۇبىرىنداعى اپات

ايماقتار • بۇگىن، 07:32

مۇز قۇرسانعان ەكىباستۇز

ايماقتار • كەشە

ءۇمىت ساۋلەسى

ساياسات • كەشە

ساڭلاقتىڭ سوڭعى سامعاۋى

قازاقستان • كەشە

ۇقساس جاڭالىقتار