ساراپتامالىق بريفينگكە قاتىسقان ل.ن.گۋميلەۆ اتىنداعى ەۇۋ-دىڭ مەملەكەت جانە قۇقىق تەورياسى مەن تاريحى, كونستيتۋتسيالىق قۇقىق كافەدراسىنىڭ پروفەسسورى ەرمەك ابدراسۋلوۆ جاڭا تۋىندىنىڭ مازمۇنىنا م.س.نارىكباەۆ اتىنداعى قازمزۋ-نىڭ پروفەسسورى ينديرا اۋباكىروۆا كونستيتۋتسياداعى جاڭاشىلدىقتارعا كەڭىنەن توقتالدى. ەۋروپالىق قۇقىق جانە ادام قۇقىقتارى ساراپشىلىق ينستيتۋتىنىڭ ديرەكتورى مارات ءباشىموۆ بريفينگ بارىسىندا كونستيتۋتسياعا وزگەرىستەر مەن تولىقتىرۋلار ەنگىزىلگەن ەكى اي ىشىندەگى ەلدەگى باستى وزگەرىستەردى اتاپ ءوتتى.
ە.ابدراسۋلوۆتىڭ ايتۋىنشا, وسى ۋاقىت ارالىعىندا زاڭگەر عالىمدار اتا زاڭعا ەنگىزىلگەن وزگەرىستەر مەن تولىقتىرۋلارعا تۇسىنىكتەمە كىتاپ شىعارعان. وسىلايشا ماماندار «قىسقاشا بولسا دا, عىلىمي باعىتتا ءار باپقا ەنگىزىلگەن وزگەرىستەرگە تولىق تۇسىندىرمە بەرۋگە تىرىسقان».
«كونستيتۋتسيا باپتارى وتە قىسقا جازىلادى. كونستيتۋتسيانىڭ كۇشىن, ونىڭ اسەرىن قازىر, زاڭدار قابىلدانعانشا سەزىنۋىمىز كەرەك. ارينە, پارلامەنت دەمالىستان شىققان سوڭ كوپ زاڭ قابىلدانادى. ءبىز كونستيتۋتسيا باپتارىنىڭ جاڭا قازاقستان, ادىلەتتى قازاقستان, ەكىنشى رەسپۋبليكا دەگەن جاڭا نورمالارىن پايدالانۋىمىز كەرەك», دەدى پروفەسسور.
زاڭ عىلىمدارىنىڭ دوكتورى ينديرا اۋباكىروۆا كونستيتۋتسياعا ەنگىزىلگەن تۇزەتۋلەرگە تۇسىنىكتەمە جازۋ كەزىندە اۆتورلىق توپتىڭ نەنى باسشىلىققا العانىن اتاپ ءوتتى. ونىڭ ايتۋىنشا, عالىمداردىڭ باستى جۇمىسى ءبىرىنشى رەسپۋبليكا مەن ەكىنشى رەسپۋبليكا اراسىنداعى الشاقتىقتى انىقتايتىن تۇزەتۋلەردىڭ ماڭىزدىلىق, وزەكتىلىك دارەجەسىمەن بايلانىستى.
«ەڭ الدىمەن مەملەكەت باسشىسىنىڭ يدەياسىن, قۇقىقتىق نورمالارعا ەنگىزىلگەن جۇمىس توبىنىڭ يدەياسىن ءتۇسىندىرۋ قاجەت بولدى. ەكىنشى ماقسات – اتا زاڭعا ەنگىزىلگەن جاڭاشىلدىقتارعا قاتىستى قوعامدا تۋىنداعان ساۋالعا ناقتى جاۋاپ بەرۋ. بۇل باعىتتا اۋقىمدى, قوماقتى جۇمىس اتقارىلدى. وقىرمان بۇل كىتاپقا قاتىستى ءوز پىكىرلەرىن بىلدىرە جاتار.
ال پروفەسسور مارات ءباشىموۆ تۇسىندىرمە كىتاپتى «قولدانۋعا ارنالعان نۇسقاۋلىق» دەپ اتادى. «رەفەرەندۋمدا ءبىز ماڭىزدى ءارى سىندارلى كونستيتۋتسيالىق پرينتسيپتەرگە, ادىلەتتىلىككە داۋىس بەردىك. ماگيسترانتتار مەن دوكتورانتتارعا ارنالعان دارىستەردە مەملەكەت باسشىسى ايتقان نورمالار ءجيى ايتىلدى. ازاماتتاردىڭ مەملەكەتتى باسقارۋعا قاتىسۋى ءۇشىن تەڭدىك پەن ادىلەتتىلىك, اشىقتىق جانە قىزمەتتىڭ ايقىندىعى قاعيداتتارىن اركىم ارقالاي تۇسىنەدى. ال كونستيتۋتسيانىڭ بارلىق نورمالارى, ونى قالاي جۇزەگە اسىراتىنىمىز ەلىمىزدىڭ باستى قۇجاتىمەن تىكەلەي بايلانىستى», دەدى ول.
كىتاپ اۆتورلارى, عالىمدار تۇسىندىرمەلەردى تالقىلاۋسىز بەرگەن دۇرىس دەپ شەشكەن. قۇقىق سالاسىندا بەدەلى بار رەتسەنزەنتتەر دە ولاردىڭ ۇستانىمىمەن كەلىسىپ وتىر. قازىرگى تاڭدا جاڭا تۋىندى ۇلتتىق اكادەميالىق كىتاپحانانىڭ سايتىندا ورنالاستىرىلعان. تۇسىندىرمە جۇمىسىمەن قۇقىققا قىزىعۋشىلىق تانىتقان كەز كەلگەن ادام تانىسا الادى.
