مەملەكەت باسشىسى قاسىم-جومارت توقاەۆ بۇعان دەيىن پايدالانىلماي جاتقان جايىلىمدىق جەرلەردى مەملەكەت مەنشىگىنە قايتارۋ جونىندە ناقتى تاپسىرما بەرگەن بولاتىن.
پارتيا حاتشىسى داۋلەت كارىبەك اۋىل شارۋاشىلىعى تاۋار وندىرۋشىلەرىمەن مەموراندۋم جاسالعانىن اتاپ ءوتتى. سوعان سايكەس, شارۋالار 333 مىڭ گەكتار جەردى بۇدان بىلاي اۋىل تۇرعىندارىمەن بىرلەسىپ پايدالانادى.
«اقمولا وبلىسىنىڭ تۇرعىندارى ءۇشىن جايىلىم جەردىڭ جەتىسپەۋشىلىگى وتە وزەكتى ماسەلە بولىپ وتىر. سوندىقتان كوميسسيا مۇشەلەرى مۇندا بەلسەندى جۇمىس ىستەپ جاتىر. مەملەكەتتىك ورگاندارمەن جانە ءىرى مەنشىك يەلەرىمەن بىرلەسىپ قابىلداعان شەشىمدەردىڭ ورىندالۋ بارىسىنا مونيتورينگ جۇرگىزۋدى جالعاستىرامىز», دەدى كوميسسيا مۇشەسى, قوعام قايراتكەرى عالىم بايتوق.
تانىمال جۋرناليست, كوميسسيا مۇشەسى ماقسات تولىقباي كوميسسيا وكىلدەرىنىڭ 3 ايدان بەرى وڭىرلەردى ارالاپ كەلە جاتقانىن ايتتى. «مەملەكەتتىك ورگانداردىڭ وكىلدەرى مەن پارتيالىقتاردان بولەك, كوميسسيا قۇرامىندا قوعام بەلسەندىلەرى جانە زاڭگەرلەر بار. جايىلىم ماسەلەسى ۇزاق ۋاقىت بويى قوردالانىپ كەلدى. ونى ءبىر كۇندە شەشۋ مۇمكىن ەمەس. سوندىقتان پارتيانىڭ بارلىق تەتىگىن ىسكە قوسىپ, ءار وبلىستاعى ماسەلەنى بىرلەسىپ شەشىپ كەلەمىز», دەدى م.تولىقباي.
كەزدەسۋ بارىسىندا اتباسار اۋدانى سوچينسكوە اۋىلىنىڭ تۇرعىنى اسىلحان تاستەمىروۆ ەلدى مەكەنگە بەكىتىلگەن 6 مىڭ گەكتار جايىلىمنىڭ ازدىق ەتىپ وتىرعانىن جەتكىزدى.
«اۋىلدا 200-گە جۋىق ءۇي بار. تۇرعىنداردىڭ بارلىعى دەرلىك مال شارۋاشىلىعىمەن اينالىسادى. اۋىل حالقى ءىرى قارا, جىلقى ءوسىرىپ جان باعىپ وتىر. جايىلىم ماسەلەسى وتە وزەكتى. كوميسسيا وسى ماسەلەنى شەشۋگە كومەكتەسەدى دەپ ۇمىتتەنەمىز», دەدى اۋىل تۇرعىنى.
وسى كۇنى «جەر اماناتى» كوميسسياسىنىڭ مۇشەلەرى ساندىقتاۋ اۋدانىندا جەر ماسەلەسى بويىنشا ازاماتتاردى قابىلدادى. تۇرعىندار تاراپىنان ايتىلعان بارلىق ماسەلە پارتيالىق باقىلاۋعا الىندى.
ايتا كەتەيىك, سوڭعى بىرنەشە اي ىشىندە كوميسسيا مۇشەلەرى جەتىسۋ, قاراعاندى, قوستاناي, جامبىل, تۇركىستان, اقتوبە جانە سولتۇستىك قازاقستان وبلىستارىندا بولدى. جالپى, «جەر اماناتى» كوميسسياسىنىڭ كومەگىمەن 350 مىڭ گەكتاردان استام جەر مەملەكەتتىك مەنشىككە قايتارىلدى.
جەر ماسەلەلەرىن نەعۇرلىم جەدەل شەشۋ ءۇشىن قازاقستاندىقتار بارلىق زاڭ بۇزۋ فاكتىلەرى تۋرالى پارتيانىڭ «جەدەل جەلى» 8 800 080 44 41 تەلەفونىنا حابارلاي الادى. وتىنىمدەر WhatsApp ارقىلى دا +7 700 800 44 41 ءنومىر بويىنشا قابىلدانادى.
