قوعام • 18 تامىز، 2022

جومارت جاننىڭ جاقسىلىعى كوپ

22 رەت كورسەتىلدى

دۋلات تاستەكەەۆ – وڭىرىمىزدەگى ءبىرتۋار ازاماتتارىمىزدىڭ ءبىرى ءارى بىرەگەيى. ول ءوزىنىن ەڭبەگىن تۋعان جەرىنە ارناپ، ەلىنە قايىرىمدىلىق تۇرعىدان كومەك قولىن سوزىپ كەلەدى. ناقتىلاي ايتقاندا، ءوزىنىڭ تۋعان اۋىلىندا، اۋدانىندا، وبلىسىندا مەشىتتەر سالىپ، جاس­تاردى يماندىلىققا تاربيەلەپ ءجۇر. سونداي-اق تۇرمىسى تومەن وتباسىلارعا جاڭادان پاتەرلەر سالىپ بەرىپ، ىزگىلىك تانىتۋدا.

اقسۋات اۋدانىنىڭ ورتالىعىندا جىل سايىن ءداستۇرلى تۇردە ىرعىزباي اتاعا اس بەرىپ، اقىندار ايتىسىن، الامان بايگە، كۇرەس تۇرلەرىنەن جارىس ۇيىمداستىرىپ كەلەدى. مۇنداي تاعىلىمى مول، عيبراتقا تولى ءىس-شارالاردىڭ حالىقتىڭ رۋحىن، كوڭىل كۇيىن كوتەرەتىنى تۇسىنىكتى. ەكىنشى جاعىنان ونى جۇرتشىلىقتىڭ العىسىنا بولەپ ءجۇر. ال العىس ارقالاعاننىڭ ازىپ-توزبايتىنى بارشاعا ءمالىم.

ول سالعان اۋىلدىڭ جولدارى مەن كىرە بەرىس قاقپاسى ەلدى مەكەنىمىزگە ەرەكشە ءار بەرىپ تۇر. جانە دە اۋىلدىڭ جاقسى وقيتىن مەكتەپ وقۋشىلارىنا قارجىلاي جاردەمدەسىپ كەلەدى. «جاقسىنىڭ جاقسىلىعىن ايت، نۇرى تاسىسىن» دەگەن. دۋلات باۋىرىمىزدىڭ ەل ەرتەڭى – دارىندى بالالاردى كولداپ، «بۇلاق كورسەڭ، كوزىن اش» قاعيداتىن ۇستانۋىن مارتتىك پەن جومارتتىقتىڭ بيىك شىڭى دەسەك، اسىرا ايتپاعانىمىز.

د.تاستەكەەۆ – العا قويعان ارمان-ماقساتتارىنا قول جەتكىزگەن ازامات. كوپ نارسەنى كوكىرەگىنە تۇيگەن جان. بولاشاق ۇرپاق ۇلگى الار تۇلعا. ءار كەز جاقسىلىقتىڭ جارشىسى، ىزگىلىكتى دە يگىلىكتى ىستەردىڭ ۇيىتقىسى. مىنە، تاياۋدا دۇبىرلەتىپ ىرعىزباي اتامىزدىڭ اسىن وتكىزدى. الىس-جاقىن شەتەلدەردەن مىقتى دەگەن سپورتشىلار كەلىپ، جارىس كورىگىن قىزدىردى. 150 شاقىرىمدىق الامان بايگە، اقىندار ايتىسى اۋدانىمىزدىڭ بەدەلىنە بەدەل قوستى. وبلىس، اۋدان جۇرتشىلىعى دۋلات باۋىرىمىزدىڭ ەرەن ەڭبەگىن جوعارى باعالاپ قانا قويماي، ارقاشان ماقتان تۇتادى جانە ول قانداي ماقتانعا دا لايىق ازامات!

 

شىنار ءمۇتالىپوۆا

 

اباي وبلىسى،

اقسۋات اۋدانى

سوڭعى جاڭالىقتار

ءوڭىر جانە وركەنيەت

ساياسات • كەشە

اعا بۋىننىڭ قولداۋى

ساياسات • كەشە

ەسىمنەن كەتپەس ەساعاڭ

رۋحانيات • كەشە

بار ءۇمىت – بۋبليكتە

تەننيس • كەشە

وقىرماننىڭ رۋحاني ولجاسى

ەگەمەن قازاقستان • كەشە

ۇقساس جاڭالىقتار