ەندى, مىنە, ارادا ءبىرشاما ۋاقىت وتكەن سوڭ, قولادان مەدال تاعىنعان ءتورت سپورتشى – ايان ءابدىراش, نۇرداۋلەت جاقىپ, ايجومول ابدىكاتوۆا, ۆيكتور ءفرۋنديندى جانە ولاردىڭ جاتتىقتىرۋشىلارىن وبلىس اكىمى جەڭىس قاسىمبەك قابىلداپ, سىي-قۇرمەت كورسەتتى.
ەمەن-جارقىن اڭگىمە جاعدايىندا وتكەن كەزدەسۋ بارىسىندا كوماندا كاپيتانى ايان ءابدىراش ءوزىنىڭ سپورتتىق ومىرىنەن سىر شەرتتى. ول سپورتتىڭ بۇل تۇرىمەن توعىز جاسىنان بەرى شۇعىلدانعان ەكەن.
– بۇل مەنىڭ ونەر كورسەتكەن ءۇشىنشى سۋردليمپيادام بولدى. العاشقى قاتىسقان سۋردليمپيا ويىندارىندا بەسىنشى ناتيجە كورسەتتىم. بولگاريادا وتكەن دودادا مەن 18 جاستا بولدىم. ال 2017 جىلى تۇركيادا وتكەن سۋردليمپيادادا چەمپيون اتاندىم, – دەدى ايان ءابدىراش.
سونىمەن قاتار كاپيتان سپورت سەكتسياسىنا ءوزىن الىپ كەلگەن اناسىنا, ودان كەيىن وسىنداي دارەجەگە جەتكىزگەن جاتتىقتىرۋشىلارىنا ءدان ريزا ەكەنىن ايتتى. جاتتىقتىرۋشى دەمەكشى, سپورتشىلاردى بيىك بەلەسكە شىعارعان تالىمگەرلەر – قازاقستاننىڭ ەڭبەك سىڭىرگەن جاتتىقتىرۋشىلارى رۋسلان يششانوۆ پەن حابدۋللا تولەگەنوۆ تە وبلىس باسشىسى تاراپىنان سىي-قۇرمەتكە بولەندى.
كەزدەسۋ بارىسىندا سۋردليمپيادالىق سپورت تۇرلەرىن دامىتۋعا كەدەرگى بولىپ وتىرعان كەمشىلىكتەر جايى دا نازاردان تىس قالمادى. ماسەلەن, سپورتشىلاردىڭ قارقىندى جاتتىعۋلارعا ارنالعان جەكە الاڭدارى جوق ەكەنىن جەتكىزدى جاتتىقتىرۋشىلار. ماسەلەن, قازىرگى ۋاقىتتا سپورتشىلار ITF تاەكۆوندو مەكتەبىندە جاتتىعادى ەكەن. ال بۇل جەردەگى كىلەم توسەنىشى جاڭارتۋدى قاجەت ەتەتىن كورىنەدى. سودان كەيىن باعالاۋدىڭ جاڭا ەلەكتروندى جۇيەسى دە قاجەت ەكەنى باياندالدى. ءوز كەزەگىندە وبلىس باسشىسى بۇل ماسەلە اتاۋلىنىڭ شەشىم تابۋىنا كومەكتەسەتىنىن ايتىپ, ۋادە بەردى.
سۋردليمپيا ويىندارىندا, ياعني قۇلاعى مۇكىس جاندار اراسىنداعى ءدۇبىرلى دودادا جۇلدەگەر اتانعان ساڭلاق سپورتشىلارعا 1,5 ملن تەڭگە مولشەرىندە بىرجولعى تولەم بەرىلدى. ال وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ ءار تاەكۆوندوشىعا اي سايىن 800 مىڭ تەڭگە كولەمىندە ستيپەنديا تولەنەتىنىن ءمالىم ەتتى.
قاراعاندى
