اۋە قورعانىسى كۇشتەرىنىڭ باس قولباسشىسى اۆياتسيا گەنەرال-لەيتەنانتى نۇرلان ورمانبەتوۆپەن بىرگە ۇشقىش-عارىشكەر اۆياتسيالىق بازانىڭ ۇشۋ قۇرامىمەن جانە مەرزىمدى قىزمەت ساربازدارىمەن كەزدەستى. توقتار اۋباكىروۆكە سۋ-30سم ۇشاعىنىڭ جاتتىقتىرۋ كەشەنى كورسەتىلدى.
حالىق قاھارمانى اۆياتسيالىق بازانىڭ ۇشقىشتارىمەن جويعىشتارداعى ۇشۋ تاجىريبەسىن ءبولىستى, عارىشكەرلەردى دايارلاۋ جونىندە اڭگىمەلەپ بەردى. اۋە قورعانىسى كۇشتەرىنىڭ اسكەري ينستيتۋتىن تاياۋدا بىتىرگەن تۇلەكتەرىنە, جاس لەيتەنانتتارعا نۇسقاۋ بەردى. اسكەري-اۋە كۇشتەرى وفيتسەرلەرىنىڭ جاس بۋىنى ءۇشىن بۇل ەڭبەك سىڭىرگەن ۇشقىش پەن عارىشكەردەن شەبەرلىك ساباعى بولدى. ولار باتىردىڭ ءومىربايانى جايلى جانە كاسىبي قىزمەتى تۋرالى اڭگىمەگە قانىقتى.
– 1969 جىلى مەن ارماۆير جوعارى اسكەري قىزىل تۋ اۆياتسيالىق اشقق ۇشقىشتار ۋچيليششەسىن «ۇشقىش-ينجەنەر» بىلىكتىلىگىمەن ءبىتىردىم. قىزمەت بارىسىندا 50-دەن استام ۇشاقپەن ۇشىپ ۇيرەندىم. 1988 جىلى ماعان كەڭەس وداعىنىڭ باتىرى اتاعى بەرىلدى. اۆيا تاسىمالداۋشىنىڭ قونۋداعى قيىندىقتارى ءوز الدىنا. تەحنيكا مەن اەروديناميكانىڭ قىر-سىرىن مەڭگەرۋگە ءتيىسسىڭ, قانشا جەردەن تالانتىڭ بولسا دا ول كومەكتەسپەيدى. كۇندەلىكتى تىنىمسىز ەڭبەك پەن بىلىمگە دەگەن قۇشتارلىق – ناعىز جەتىستىككە جەتۋدىڭ جولى! – دەدى توقتار اۋباكىروۆ.
مەرزىمدى قىزمەتتەگى اسكەري قىزمەتشىلەر قوناقتىڭ مازمۇندى جانە قىزىقتى اڭگىمەلەرىن ەرەكشە قىزىعىپ تىڭدادى. قاتارداعى جاۋىنگەر جاناربەك اڭسار اتى اڭىزعا اينالعان ۇشقىش-عارىشكەردىڭ سوزدەرى وعان سالماقتى وي سالعانىن ايتتى. مەرزىمدى قىزمەت اياقتالعاننان كەيىن ول اۋە قورعانىس كۇشتەرىنىڭ اسكەري ينستيتۋتىنا ءتۇسىپ, بىرنەشە جىلدان كەيىن سول بولىمگە لەيتەنانت بولىپ ورالىپ, جويعىشتا ۇشۋ ءۇشىن كەلىسىمشارت بويىنشا قىزمەت ەتۋدى جوسپارلاپ وتىر.
– ەلدىڭ تۇتاستىعى مەن ەگەمەندىگى ءبىزدىڭ كونستيتۋتسيالىق پارىزىمىزدى ادال ورىنداۋىمىزعا بايلانىستى ەكەنىن ۇعۋعا ءتيىسپىز. العا «باتىر بولامىن» دەپ ەمەس, «ۇيرەنەمىن» دەگەن ماقسات قويۋ كەرەك. كۇندە ءوزىڭنىڭ ىستەگەن ىسىڭە ەسەپ بەرۋگە ءتيىسسىڭ. جەتىستىككە جەتۋ جولى اسكەري عىلىمدى ۇيرەنۋگە, بىلۋگە بايلانىستى ەكەنىن ءتۇسىنۋ قاجەت, – دەدى اتاقتى قوناق جاۋىنگەرلەرگە.
