قازاقستان • 16 تامىز، 2022

مال دارىگەرلەرىنىڭ جالاقىسى وسەدى

56 رەت كورسەتىلدى

ۆەتەرينارلىق سەكتور جالاقىنىڭ تومەن بولۋىنا بايلانىستى جاس جانە جوعارى بىلىكتى كادرلاردىڭ جەتىسپەۋشىلىگىن سەزىنۋدە. بۇل تۋرالى بريفينگتە اۋىل شارۋاشىلىعى ۆيتسە-ءمينيسترى رۇستەم قۇرمانوۆ ءمالىم ەتتى، دەپ حابارلايدى Egemen.kz.

«اگرارلىق سەكتورداعى جالاقىسى تومەن ماماندىقتاردىڭ ءبىرى – ۆەتەرينارلىق دارىگەرلەر ەكەنى انىقتالدى. سونىمەن قاتار ەلدەگى ۆەتەرينارلاردىڭ ورتاشا جاسى 40-50 جاستى قۇرايدى. ءبىز سەكتوردىڭ جاس جانە جوعارى بىلىكتى كادرلار جەتىسپەيتىنىن بايقادىق. بۇعان ەڭبەك جاعدايلارىنىڭ قيىندىعى، جالاقىنىڭ تومەندىگى، اۋىلدىق جەرلەردە ينفراقۇرىلىمنىڭ دامىماۋى ىقپال ەتەدى. مۇنىڭ ءبارى ۆەتەرينار ماماندىعىنىڭ جاستار ءۇشىن تارتىمسىز بولۋىنا اكەلەدى»، دەدى قر اۋىل شارۋاشىلىعى ۆيتسە-ءمينيسترى رۇستەم قۇرمانوۆ.

ونىڭ ايتۋىنشا، 2022 جىلدىڭ ءبىرىنشى توقسانىنان باستاپ ەلىمىز بويىنشا ۆەتەرينارلىق مامانداردىڭ جالاقىسى ورتاشا ەسەپپەن 33،4%-عا ءوستى، ال 2022 جىلدىڭ سوڭىنا دەيىن ونى تاعى 60%-عا ۇلعايتۋ جوسپارلانىپ وتىر.

ونىڭ ايتۋىنشا، ورتاشا ايلىق جالاقى قىزىلوردا وبلىسىندا 98 مىڭ تەڭگەدەن پاۆلودار وبلىسىندا 206 مىڭعا دەيىن وزگەرەدى.

«بۇل جەتكىلىكسىز. ماسەلەلەردى شەشۋ ءۇشىن ءبىز باسەكەلەس سەكتور جوق وكرۋگتەردە كورسەتىلەتىن قىزمەتتەردىڭ اقىلى كولەمىن ۇلعايتۋ بويىنشا جۇمىس جۇرگىزەمىز. كەلەسى جىلدان باستاپ كوممۋنالدىق ۆەتەريناريالىق كاسىپورىنداردىڭ ۆەتەريناريالىق ماماندارىنىڭ ايلىقاقىسىنا 50%-دىق جانە مەملەكەتتىك، كوممۋنالدىق مەكەمەلەردىڭ لاۋازىمدىق جالاقىلارىنا 140%-دىق قوسىمشا اقى تولەۋدى جۇزەگە اسىرۋ كوزدەلەدى. قوسىمشا اقىلار زياندى ەڭبەك جاعدايلارى، 1-2 پاتوگەندى بيواگەنتتەرمەن جۇمىس ىستەگەنى ءۇشىن تولەنەدى»، دەپ ناقتىلادى ر.قۇرمانوۆ.

سونداي-اق ۆيتسە-مينيستر ۆەتەرينارلىق دارىگەردىڭ جۇكتەمەسىن تەڭەستىرۋ ءۇشىن اگرارلىق ۋنيۆەرسيتەتپەن بىرلەسىپ ءبىر ۆەتەرينارلىق دارىگەرگە نورماتيۆتىك جۇكتەمەنىڭ ەسەبى جۇرگىزىلىپ جاتقانىن ايتتى.

بۇدان سوڭ ول كەلەسى جىلدان باستاپ ۆەتەرينارلىق دارىگەرلەردى ساۋىقتىرۋعا ارنالعان جاردەماقى رەتىندە ەكى لاۋازىمدىق جالاقى ءبولۋ قاراستىرىلعانىن

/ايتتى.

سوڭعى جاڭالىقتار

ۇقساس جاڭالىقتار