«شىلدەدە قازاقستاندا ايلىق ينفلياتسيانىڭ ءوسۋ قارقىنى بۇرىنعىسىنشا جوعارى دەڭگەيدە بولعانىمەن, ءبىر اي بۇرىنعى 1,6%-دان 1,1%-عا دەيىن تومەندەدى. ورتاشا العاندا, سوڭعى بەس جىلدا شىلدەدە ايلىق ينفلياتسيا 0,3%-دى قۇرادى. باعا ءوسىمىنىڭ باسەڭدەۋى جەمىس-كوكونىس ونىمدەرى قۇنىنىڭ ماۋسىمدىق تومەندەۋىنىڭ اسەرىنەن بولدى. تۇتىنۋ باعاسىنىڭ ءوسۋ قارقىنىنىڭ اناعۇرلىم ەلەۋلى باسەڭدەۋى جالعاسىپ جاتقان ىنتالاندىرۋشى فيسكالدىق ساياسات اياسىندا ەكونوميكاداعى سۇرانىستىڭ جالعاسۋى, جالعاسىپ جاتقان گەوساياسي شيەلەنىس جانە سوعان بايلانىستى نارىقتىق تەڭگەرىمسىزدىك جاعدايىندا ەكونوميكانىڭ سىرتقى جانە ىشكى سەكتورلارىنداعى قىسىم كەدەرگى كەلتىرەدى. وسىنىڭ اياسىندا شىلدەدە جىلدىق ينفلياتسيا 14,5%-دان 15%-عا دەيىن ءوستى», دەدى ۇلتتىق بانك توراعاسىنىڭ ورىنباسارى اقىلجان بايماعامبەتوۆ.
ونىڭ ايتۋىنشا, ينفلياتسياعا ۇلەستىڭ جارتىسىنان استامى ازىق-ت ۇلىك باعاسىنىڭ ءوسۋى ەسەبىنەن جالعاسۋدا.
«وسىلايشا, ازىق-ت ۇلىك ينفلياتسياسى 19,2%-دان 19,7%-عا, ازىق-ت ۇلىككە جاتپايتىن تاۋارلار – 13,2%-دان 14,2%-عا دەيىن ءوستى. اي سايىنعى سالىستىرمالى تۇردە جوعارى ءوسۋ قارقىنىنا قاراماستان اقىلى قىزمەتتەرگە ينفلياتسيا 2021 جىلى جوعارى بازانىڭ اسەرىنەن 9,2% دەڭگەيىندە وزگەرىسسىز قالدى. وسىلايشا, ەكونوميكاداعى ينفلياتسيالىق قىسىم جوعارى دەڭگەيدە قالىپ وتىر. ينفلياتسيا مەن ينفلياتسيالىق كۇتۋلەردىڭ ۇدەۋىن, ولاردىڭ تۇراقتىلىعىن, سۇرانىستىڭ فيسكالدىق ىنتالاندىرىلۋىن جانە سىرتقى ينفلياتسياعا قارسى فوندى ەسكەرە وتىرىپ, وسى جىلى 25 شىلدەدە قازاقستان رەسپۋبليكاسىنىڭ ۇلتتىق بانكى بازالىق مولشەرلەمەنى 14%-دان 14,5%-عا دەيىن كوتەردى. بۇل الداعى جىلى ينفلياتسياعا بىرتىندەپ اسەر ەتەدى», دەدى ا. بايماعامبەتوۆ
ءوز كەزەگىندە قازاقستان رەسپۋبليكاسىنىڭ پرەمەر-ءمينيسترى ءاليحان سمايىلوۆ جاۋاپتى مەملەكەتتىك ورگاندارعا ينفلياتسيانى تەجەۋدىڭ قولدانىستاعى قۇرالدارىن بەلسەندىرەك پايدالانۋدى تاپسىردى.
«شىلدە ايىندا ەلدەگى جىلدىق ينفلياتسيا 15 پايىزدى قۇرادى. ماسەلەن, وتكەن اپتادا مەن مونوپولياعا قارسى اگەنتتىككە كومپانيانىڭ قىزمەتىن تەكسەرۋدى تاپسىردىم, بۇل قىمباتشىلىق پەن قانت تاپشىلىعىنا بايلانىستى بولۋى مۇمكىن. بۇل ماسەلە كوپتەن بەرى كوتەرىلىپ كەلەدى. سوندىقتان مۇنداي جاعدايلاردى جاۋاپتى مەملەكەتتىك ورگاندار ەرتە كەزەڭدە انىقتاپ, الدىن الۋى كەرەك. ينفلياتسيانى تەجەۋگە قاجەتتى قۇرالدار بار, مەملەكەتتىك ورگاندار مەن اكىمدىكتەر ولاردى ءتيىمدى پايدالانۋى كەرەك», دەدى ءاليحان سمايىلوۆ.
ۇكىمەت باسشىسى دەلدالدىق سحەمالاردى تەكسەرۋ جونىندەگى كوميسسيا جۇمىسىن جانداندىرۋ, وڭىرلەردە الەۋمەتتىك ماڭىزى بار ازىق-ت ۇلىك تاۋارلارىنا باعانىڭ 15 پايىزدىق ۇستەمە باعاسىنا باقىلاۋدى كۇشەيتۋ جانە اكىمدىكتەردىڭ فورۆاردتىق ساتىپ الۋ بويىنشا كەلىسىمشارتتاردى ۋاقتىلى جاساسۋ قاجەتتىلىگىنە نازار اۋداردى.
