ANTIKOR • 16 تامىز، 2022

ەلىمىزدە 500-گە جۋىق شەتەلدىك كولىك زاڭسىز تىركەلگەن

35 رەت كورسەتىلدى

نۇر-سۇلتان قالاسى بويىنشا سىبايلاس جەمقورلىققا قارسى ءىس-قيمىل قىزمەتى سوتقا دەيىنگى تەرگەپ-تەكسەرۋ شارالارى كەزىندە ارنايى حالىققا قىزمەت كورسەتۋ ورتالىقتارى مەن پوليتسيا قىزمەتكەرلەرىنىڭ مەملەكەتتىك تىركەۋدەن وتكەن كولىك قۇرالدارىن تىركەۋ كەزىندە زاڭسىز بايۋدىڭ قىلمىستىق سحەماسىن اشكەرەلەپ، جولىن كەستى، دەپ حابارلايدى Egemen.kz انتيكوردىڭ الەۋمەتتىك جەلىدەگى پاراقشاسىنا سىلتەمە جاساپ.

تەرگەۋ بارىسىندا نۇر-سۇلتان قالاسىنىڭ №2 ارناۋلى حالىققا قىزمەت كورسەتۋ ورتالىعىنىڭ مامانى – ت-نىڭ جانە الماتى وبلىسى بويىنشا دپپ پروتسەسسينگ ورتالىعىنىڭ مەملەكەتتىك اۆتوينسپەكتورىنىڭ زاڭسىز ارەكەتتەرگە قاتىسى بار ەكەنى انىقتالدى.

اتالعان تۇلعالار جۇيەلى نەگىزدە كولىك قۇرالدارىن، ونىڭ ىشىندە شەت مەملەكەتتەردەن اكەلىنگەن كولىك قۇرالدارىن كادەگە جاراتۋ تولەمىن جانە بيۋدجەتكە كوزدەلگەن باسقا دا تولەمدەردى تولەمەي، اقشالاي سىياقىعا زاڭسىز تىركەگەن.

وسى جىلدىڭ 14 تامىزىندا تەرگەۋ سوتىنىڭ سانكتسياسىمەن كۇدىكتىلەر قاماۋعا الىندى.

تەرگەۋدىڭ وسى كەزەڭىندە رەسپۋبليكا بويىنشا كولىك قۇرالدارىن زاڭسىز تىركەۋدىڭ 500-گە جۋىق فاكتىسى انىقتالىپ، وسىعان بايلانىستى ارنايى حالىققا قىزمەت كورسەتۋ ورتالىقتارى قىزمەتكەرلەرىنىڭ جانە باسقا وڭىرلەردەن پوليتسيا قىزمەتكەرلەرىنىڭ قاتىسۋى تەكسەرىلۋدە.

سوتقا دەيىنگى تەرگەپ-تەكسەرۋ قورىتىندىسى بويىنشا بارلىق قاتىسى بار تۇلعالارعا قۇقىقتىق باعا بەرىلەدى.

تەرگەۋ مۇددەسىن كوزدەيتىن باسقا اقپارات جاريا ەتىلمەيدى.

سوڭعى جاڭالىقتار

ۇقساس جاڭالىقتار