قوعام • 16 تامىز، 2022

«تالگوداعى» تالان-تاراج

387 رەت كورسەتىلدى

تەمىر جول كولىگى سالاسىنداعى تەپسە تەمىر ۇزەتىن ازاماتتاردىڭ جەم­قور­لىق­تىڭ جەتەگىندە كەتكەنى بەلگىلى. ونى قويشى، كەيدە ءوزىمىز دە بيلەت بولماسا اقشا قىستىرىپ، قىستىرىلماي دىتتەگەن جەرىمىزگە جەتۋگە اسىقپىز. ەندى ەركىندىككە جول جوق. انتيكور «قازاقستان تەمىر جولى» ۇك» اق قىزمەتىندە سىبايلاس جەمقورلىق قاۋپى بار-جوعىن انىقتاۋعا مىقتاپ كىرىستى.

سىبايلاس جەمقورلىققا قار­سى ءىس-قيمىل اگەنتتىگىنىڭ ءباس­پا­سوز قىز­مە­تى­نىڭ حابارلاۋىنشا، قۇزىرلى ورگان وكىلدەرى قتج قىز­مەتىندەگى سىبايلاس جەم­قور­لىق تاۋەكەلدەرىنە سىرت­قى تالداۋدى باستاپ كەتكەن. تالداۋدى اگەنتتىكتىڭ، ۇلتتىق كومپانيانىڭ، مۇددەلى مەملەكەتتىك ورگانداردىڭ ماماندارى جانە ازاماتتىق قوعام وكىلدەرى جۇرگىزبەك. تالداۋ بارىسىندا تەمىر جول سالاسىندا سىبايلاس جەمقورلىق قۇقىق بۇزۋشىلىقتاردىڭ جاسالۋ سەبەپ­تە­رى مەن جاعدايلارى زەردە­لە­نەتىن بولادى. بۇل ۇلتتىق وپەراتور قىزمەتىنىڭ تيىمدىلىگىنە، بۇرىن مەملەكەتتىك بيۋدجەتتەن جانە ۇلتتىق قوردان الىنعان قاراجاتتىڭ جۇمسالۋىنا اسەر ەتەدى دەپ كۇتىلۋدە.

ايتىپ اۋىز جيعانشا بولعان جوق، جاقىندا «جولاۋشىلار تاسىمالى» باسشىلارى «تۇلپار-تالگو» پو­يىز­دا­رىنىڭ باسشى­لارىنان سىياقى الىپ وتىر­عانى اشكەرەلەندى. اتاپ ايت­ساق، قارجىلىق مونيتورينگ اگەنتتىگىنىڭ ەلوردالىق دەپار­تا­مەنتى «ەكسپرەسس» فيليا­لى­نىڭ «جولاۋشىلار تاسىمالى» اكتسيونەرلىك قوعامىنىڭ نۇر-سۇلتان قالاسى بويىنشا ۋچاس­كەسىنىڭ باسشىسى مەن ونىڭ ورىن­با­سارىنىڭ «تۇلپار-تالگو» پو­يىزدارىنىڭ باسشىلارىنان جۇيەلى تۇردە اقشالاي سىياقى الۋ فاكتىلەرىن انىقتادى.

بەلگىلى بولعانداي، «ەكسپرەسس» فيليالىنىڭ «جولاۋشىلار تاسىمالى» اكتسيونەرلىك قوعامىنىڭ ەلوردالىق ۋچاسكەسىنىڭ باسشىسى مەن ونىڭ ورىنباسارى تەكسەرۋ جۇرگىزبەگەنى ءۇشىن ءار رەيستەن زاڭسىز اقشا تالاپ ەتىپ، الىپ وتىرعان. بۇل ءىس بويىنشا بارلىعى 27 ەپيزود انىقتالىپ وتىر. كىنالىلەر كوممەرتسيالىق ۇيىمداردا باسشىلىق قىزمەت اتقارۋ قۇقىعىنان ايىرىلىپ، 6 ميلليون تەڭگەگە جۋىق ايىپپۇل تولەۋگە ءتيىس. «قازىرگى ۋاقىتتا اتال­عان ۇيىمعا قىلمىستىق قۇ­قىق بۇزۋشىلىق جاساۋعا ىقپال ەتكەن ءمان-جايلاردى جويۋ تۋرالى ۇسىنىس ەنگىزىلدى»، دەلىن­گەن قارجىلىق مونيتورينگ اگەنت­تى­گى­نىڭ ءباسپاسوز قىز­مەتى ۇسىنعان حابارلامادا.

سوڭعى جاڭالىقتار

ۇقساس جاڭالىقتار