پرەزيدەنت • 15 تامىز، 2022

پرەزيدەنت قارجىلىق مونيتورينگ اگەنتتىگىنىڭ توراعاسىن قابىلدادى

101 رەت كورسەتىلدى

مەملەكەت باسشىسى قارجىلىق مونيتورينگ اگەنتتىگىنىڭ توراعاسى جانات ەليمانوۆتى قابىلدادى، دەپ حابارلايدى Egemen.kz اقورداعا سىلتەمە جاساپ.

قاسىم-جومارت توقاەۆقا اگەنتتىكتىڭ بيىلعى 7 ايداعى قىزمەتى جونىندە ەسەپ بەرىلدى.

پرەزيدەنتكە ۇسىنىلعان مالىمەتتەرگە سايكەس 857 ءىس تەرگەلىپ، 88 ميلليارد تەڭگە كولەمىندەگى زالال وتەلدى. كولەڭكەلى ەكونوميكاعا قارسى كۇرەس اياسىندا 33 ۇيىمداسقان قىلمىستىق توپ ۇستالدى. بيۋدجەت قاراجاتىن جىمقىرۋ بويىنشا 132 ءىس تىركەلىپ، كەلتىرىلگەن زالال 57 ميلليارد تەڭگەدەن اسقان. ونىڭ 53 ميللياردى قايتارىلدى.

ۇكىمەتپەن بىرلەسىپ قابىلدانعان شارالار ارقاسىندا كولەڭكەلى ەكونوميكانىڭ دەڭگەيى سوڭعى 3 جىلدا 23 پايىزدان 19 پايىزعا دەيىن تومەندەدى.

قاسىم-جومارت توقاەۆقا جەكە مەنشىكتى قورعاۋ جانە رەيدەرلىك فاكتىلەرگە جول بەرمەۋ ءۇشىن قابىلدانىپ وتىرعان شارالار جونىندە باياندالدى. قازىرگى ۋاقىتتا 8 ءىس تەرگەلىپ جاتىر. اتاپ ايتقاندا الماتىدا بيزنەستى رەيدەرلىك باسىپ الۋمەن اينالىسقان قىلمىستىق توپ قۇرىقتالدى. ولار 18 ميلليارد تەڭگەدەن استام زالال كەلتىرگەن.

سونىمەن قاتار اگەنتتىك تاراپىنان كوممۋنالدىق قىزمەت سالاسىندا تاريفتەردى نەگىزسىز كوتەرۋ فاكتىلەرى انىقتالىپ، 20 مونوپوليستكە قاتىستى 34 قىلمىستىق ءىس قوزعالدى. تۇتىنۋشىلارعا ءتاريفتى ازايتۋ تۇرىندە 11،6 ميلليارد تەڭگە زالال وتەلدى.

پرەزيدەنتكە جانار-جاعارماي ماتەريالدارىن زاڭسىز شىعارۋدىڭ الدىن الۋعا قاتىستى تاپسىرمالارىنىڭ ورىندالۋ بارىسى تۋرالى دا اقپارات بەرىلدى. جانات ەليمانوۆتىڭ حابارلاۋىنشا، بۇل سالادا 36 ءىس قوزعالدى. اتاپ ايتقاندا پاۆلودار، باتىس قازاقستان جانە تۇركىستان وبلىستارىندا ءىرى سوماداعى جانار-جاعار مايدى زاڭسىز شىعارۋعا جول بەرىلگەن جوق.

قاسىم-جومارت توقاەۆقا ازىق-ت ۇلىك باعاسىن قولدان قىمباتتاتقان جوسىقسىز تاسىمالداۋشىلارعا قاتىستى تەرگەۋ باستالعانى تۋرالى باياندالدى.

مەملەكەت باسشىسىنا قارجى پيراميدالارىنىڭ قىزمەتىن ەرتە كەزەڭدە انىقتاۋ بويىنشا جۇرگىزىلىپ وتىرعان جۇمىس تۋرالى ايتىلدى. زاڭعا قايشى كەلەتىن كونتەنتتى قامتيتىن 3 مىڭنان استام سايت بۇعاتتالدى. 64 ءىس قوزعالىپ، 7،8 ميلليارد تەڭگە كولەمىندە ايىپپۇل سالىندى.

پرەزيدەنت بيزنەستى جانە ەل ازاماتتارىنىڭ مۇددەسىن قورعاۋعا باعىتتالعان بىرقاتار تاپسىرما بەردى.

سوڭعى جاڭالىقتار

جاپونيادا جەر سىلكىندى

الەم • بۇگىن، 10:22

ۇقساس جاڭالىقتار