الەم • 15 تامىز، 2022

ەۋروپالىقتار سۋدى ۇنەمدەي باستادى

166 رەت كورسەتىلدى

فرانتسيادا قۇرعاقشىلىق قاۋپى جاريالانىپ، سۋدى پايدالانۋعا شەكتەۋلەر ەنگىزىلدى، دەپ حابارلايدى Egemen.kz ەuronews-كە سىلتەمە جاساپ.

ليون قالاسىنىڭ تۇرعىندارىنا ازىرگە كوگالدى سۋارۋعا، سونداي-اق ماشينا جۋعا بولمايدى. ۋاقىتشا ەرەجەنى بۇزعان ادامعا ايىپپۇل سالىنۋى مۇمكىن. وڭتۇستىكتەگى لازۋرنىي جاعالاۋىندا جۇزگە جۋىق كوممۋنا سۋ تاپشىلىعىنا ۇشىرادى. جەرگىلىكتى جاعاجايلارداعى دۋش باعانالارىندا سۋ مۇلدە توقتاتىلدى.

قۇرعاقشىلىق كورسەتكىشتەرىنىڭ ءبىرى – سۋ قويمالارىنىڭ تارتىلۋى. ساۆويداعى انسي كولىندە جاز باستالعالى بەرى سۋ دەڭگەيى 33 سم-گە تومەندەپ كەتكەن. ازىرگە بۇل جاعداي فلورا مەن فاۋناعا اسەر ەتپەگەن. بىراق ادامدار قازىردىڭ وزىندە اتاپ ايتقاندا، سۋ كولىگىنە بايلانىستى ءبىراز قيىندىققا تاپ بولىپ جاتىر.

سۋ تاپشىلىعى ەۋروپانىڭ كوپتەگەن ايماقتارى ءۇشىن كۇردەلى ماسەلەگە اينالىپ وتىر. ماجارستاندا مەتەورولوگتار 1901 جىلدان بەرى، ياعني ءبىر عاسىردان استام ۋاقىتتا بولماعان ەڭ قۇرعاق جەتى ايدى تىركەدى. سۋ رەسۋرستارى باس باسقارماسىنىڭ ءمالىم ەتۋىنشە، بيىل جاۋىن-شاشىننىڭ ورتاشا مولشەرىنىڭ جارتىسى عانا جاۋعان.

ۇلىبريتانيادا دا بولىپ جاتقان اپتاپ ىستىق اۋىل شارۋاشىلىعىنا قيىندىق تۋعىزدى. فەرمەرلەر مالعا كوك ءشوپتىڭ قالماعانىن جانە ەگىندى سۋارۋ ءۇشىن سۋ جەتكىلىكسىز ەكەنىنە شاعىمدانىپ وتىر. 

بيلىك سۋ تۇتىنۋدى شەكتەپ جاتسا، ەكولوگتار باتپاقتاردى قالپىنا كەلتىرۋدى ۇسىنىپ وتىر. مامانداردىڭ ايتۋىنشا، بۇل شارا قۇرعاقشىلىقپەن ۇزاق مەرزىمدى كۇرەسۋ ءۇشىن جەتكىلىكتى ىلعال جيناۋعا مۇمكىندىك بەرەدى.

سوڭعى جاڭالىقتار

ۇقساس جاڭالىقتار