قازاقستان رەسپۋبليكاسىنىڭ ازەربايجانداعى ەلشىلىگىنىڭ قولداۋىمەن جارىق كورگەن انتولوگيانىڭ اۋدارماشىسى جانە قۇراستىرۋشىسى - بەلگىلى جازۋشى, پۋبليتسيست, اۋدارماشى جانە كينوتانۋشى ناريمان ابدۋلراحمانلى, ال رەداكتورى - ماحير گاراەۆ.
جازۋشى-اۋدارماشى ناريمان ابدۋلراحمانلى تاراپىنان ازەربايجان وقىرماندارىنا ۇلى ابايدىڭ «قارا سوزدەر» تراكتاتى مەن كورنەكتى جازۋشى روللان سەيسەنباەۆتىڭ «الەم كۇيرەگەن كۇن» اتتى پروزالىق جيناعىنان كەيىن ۇسىنىلعان «قازاق پروزاسى» انتولوگياسى, ەكى حالىق پەن ادەبيەتى اراسىنداعى بايلانىستى ودان ءارى نىعايتۋ جولىنداعى ۇلكەن قادامداردىڭ ءبىرى.
انتولوگياعا ۇلى ابايدان باستاپ, 2000-شى جىلدارى ادەبيەتكە كەلگەن جاس ادەبي ۇرپاق وكىلدەرىنەن 54 قالامگەردىڭ تاڭدامالى شىعارمالارى ەنگىزىلگەن. ابايدىڭ «قارا سوزىنەن» ۇزىندىلەر, شاكارىمنىڭ ناقىل سوزدەرى, قۇدىرەتتى ءسوز شەبەرى مۇحتار اۋەزوۆ, ءابىش كەكىلباەۆ, مۇحتار ماعاۋين, قابدەش ءجۇمادىلوۆ, قاليحان ىسقاقوۆ, ساكەن ءجۇنىسوۆ, اكىم تارازي, سايىن مۇراتبەكوۆ, دۋلات يسابەكوۆ, ورالحان بوكەي, دۇكەنباي دوسجانوۆ, ءساتىمجان سانباەۆ, روللان سەيسەنباەۆتىڭ شىعارمالارى ازەربايجان وقىرماندارىنا جول تارتادى.
ايتا كەتسەك, اۋدارماشى ناريمان ابدۋلراحمانلى قازاق دەتەكتيۆ جانرىنىڭ نەگىزىن سالعان كەمەل توقاەۆتىڭ اڭگىمەلەرىن جانە جازۋشىنىڭ ۇلى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «اكە تۋرالى تولعانىس» عۇمىرنامالىق كىتابىن باسپاعا دايىنداۋدا.
