وقيعا • 10 تامىز، 2022

الماتى وبلىسىندا اسكەري قىزمەتكەر قازا تاپتى

66 رەت كورسەتىلدى

الماتىدا قازاقستان رەسپۋبليكاسى ۇلتتىق ۇلانى 5571 اسكەري ءبولىمىنىڭ مەرزىمدى قىزمەتتەگى اسكەري قىزمەتشىسى قايتىس بولدى، دەپ حابارلايدى Egemen.kz قر ۇۇ «وڭتۇستىك» وڭىرلىك قولباسشىلىعىنىڭ ءباسپاسوز قىزمەتىنە سىلتەمە جاساپ.

جاۋىنگەرلىك دايىندىق جوسپارىنا سايكەس 5571 اسكەري ءبولىمىنىڭ 1 جەدەل ماقساتتاعى باتالون جەكە قۇرامى 2022 جىلدىڭ 8 جانە 13 تامىزى ارالىعىندا 5574 اسكەري ءبولىمىنىڭ وقۋ ورتالىعىندا دالالىق جاتتىعۋدا بولعان.

«2022 جىلعى 9 تامىزدا ساعات 20:55 شاماسىندا قاتتى داۋىل كوتەرىلىپ، جەل سالدارىنان ساربازدار ورنالاسقان شاتىر قالاشىعى ب ۇلىنە باستاعان. قاتارداعى ا.ن. شاحيموۆ ارىپتەستەرىنىڭ قاۋىپسىز ورىنعا شىعۋىنا كومەكتەسىپ ءجۇرىپ شاتىردان سوڭعى بولىپ شىققان كەزدە، شاتىردىڭ تەمىر جاقتاۋى باسىنا ءتيىپ جاراقات العان.

قاتارداعى ا.ن. شاحيموۆقا جەدەل مەديتسينالىق كومەك كورسەتىلىپ، سانيتارلىق كولىكپەن قوناەۆ قالاسىنداعى قالالىق اۋرۋحاناعا جەتكىزىلگەن. قالالىق اۋرۋحانا دارىگەرلەرى ساربازدىڭ قازا بولعانىن راستادى. قاتارداعى ا.ن. شاحيموۆ ءوزىنىڭ جانقيارلىق ارەكەتىمەن جولداستارىن قۇتقارىپ، وكىنىشكە قاراي، ءوزى قاتتى سوققىدان قازا بولدى»، دەلىنگەن حابارلامادا.

ا.ن. شاحيموۆ 2003 جىلى تۋعان. ۇلتتىق ۇلان قاتارىندا 2022 جىلدىڭ كوكتەمىندە اقمولا وبلىسى كوكشەتاۋ قالالىق قورعانىس ىستەرى جونىندەگى دەپارتامەنتىمەن شاقىرىلعان.

«دەرەك تۋرالى كەزەكشى قىزمەت جەلىسى بويىنشا ءتيىستى ورگاندارعا حابارلاندى. وقيعانىڭ ءمان-جايى انىقتالىپ، تەرگەۋ جۇمىستارى جۇرگىزىلىپ جاتىر. قىزمەتتىك تەكسەرىس تاعايىندالدى.

قر ۇلتتىق ۇلاننىڭ باس قولباسشىلىعى جانە «وڭتۇستىك» وڭىرلىك قولباسشىلىعى مەرزىمدىك قىزمەت اسكەري قىزمەتشىسى ا.ن. شاحيموۆتىڭ اتا-اناسى مەن جاقىندارىنا ورنى تولماس قايعىعا ورتاقتاسىپ، كوڭىل ايتادى»، دەلىنگەن حابارلامادا.

 

سوڭعى جاڭالىقتار

ۇقساس جاڭالىقتار