شەتەلدىك كولىك مىنگەندەر vip ءنومىر تاعۋعا قۇمار. بىراق سىرت كوزگە قىمبات ماشينە ءمىنىپ, شىكىرەيگەندەردىڭ اراسىندا كولىك سالىعىن تولەمەيتىندەر كەزدەسەدى. ماسەلەن, وبلىستىق مەملەكەتتىك كىرىستەر دەپارتامەنتىنىڭ باسقارما باسشىسى نۇربولات سارمانوۆتىڭ مالىمەتىنشە, قازىر 9 مىڭعا جۋىق تۇرعىن كولىك سالىعىن تولەمەي ءجۇر. قازىر سونداي كولىك جۇرگىزۋشىلەرىنىڭ بەرەشەگى 355 ملن تەڭگەنى قۇراپ وتىر. ونىڭ ىشىندە تولەنبەگەن كولىك سالىعىنىڭ قارىزى 283 ملن تەڭگەگە جۋىقتاسا, 72 ملن تەڭگەدەن استامى – ءوسىمپۇل.
– ەڭ قوماقتى قارىز سوماسى اتىراۋ قالاسىندا تىركەلىپ وتىر. مۇنايلى شاھار تۇرعىندارىنىڭ كولىك سالىعىنا 278 ملن تەڭگە كولەمىندە بەرەشەگى بار. ال جىلىوي اۋدانىنداعى اۆتوكولىك يەلەرى 37 ملن تەڭگە كولەمىندە سالىق تولەمەگەن. قۇرمانعازى اۋدانى جۇرگىزۋشىلەرىنىڭ قارىزى 16,5 ملن تەڭگەگە جەتتى, – دەيدى نۇربولات سارمانوۆ.
ونىڭ ايتۋىنشا, كولىك يەلەرىنىڭ كوبى سالىق تولەۋگە سالعىرت قارايدى. سول سەبەپتەن, كولىك سالىعى ايلىق ەسەپتىك كورسەتكىش نەگىزىندە ەسەپتەلەتىندىكتەن, جىل سايىن ءوسىپ وتىرادى. ونىڭ ۇستىنە جەڭىل اۆتوكولىك 2013 جىلدىڭ 31 جەلتوقسانىنان كەيىن قۇراستىرىلسا نەمەسە وسى ۋاقىتتان كەيىن قازاقستان اۋماعىندا تىركەلگەن بولسا, وندا سالىق كولەمى تىپتەن ۇلعايادى. سالىقتىڭ مولشەرىن مەملەكەتتىك كىرىستەر ورگاندارىنا بارماي-اق, ە-Salyq Azamat موبيلدىك جانە ەكىنشى دەڭگەيلى بانكتەردىڭ قوسىمشالارى ارقىلى تولەۋ مۇمكىندىگى بار.
اتىراۋ وبلىسى
