2022 جىلى ءاربىر گرانتقا 3 ملن تەڭگەدەن 30 گرانت بەرىلەدى. گرانت بەرۋدىڭ ماقساتى – بەلسەندى شىعارماشىل جاستار قاۋىمداستىعىن قالىپتاستىرۋعا باعىتتالعان جاستاردىڭ جاڭا جانە قولدانىستاعى باستامالارىن مەملەكەتتىك قولداۋ. كونكۋرستىق وتىنىمدەردى قابىلداۋ اياقتالعان كەزدە جاسى 14-تەن كەم ەمەس جانە 29-دان اسپايتىن, كونكۋرسقا قاتىسۋعا ءوتىنىم بەرگەن قازاقستان رەسپۋبليكاسىنىڭ كەز كەلگەن ازاماتى ۇمىتكەر بولا الادى.
گرانتتار قازاقستان رەسپۋبليكاسىنىڭ ازاماتىنا جاڭا يدەيالار مەن باستامالاردى ىسكە اسىرۋ ءۇشىن كونكۋرستىق نەگىزدە مىناداي باعىتتار بويىنشا بەرىلەدى. «عىلىم» اتالىمى عىلىمنىڭ باسىم سەكتورلارىندا جاڭا عىلىمي جوبالاردى جانە زەرتتەۋلەردى ىسكە اسىرۋعا ارنالعان. «مادەنيەت» اتالىمى قازاقستاننىڭ مادەني مۇراسىن تانىمال ەتۋگە, حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرعاندارعا تابىستالادى.
«اقپاراتتىق تەحنولوگيالار» اتالىمى جاڭا IT شەشىمدەر مەن جوبالاردى, ونىڭ ىشىندە جاڭادان باستالعان ستارتاپ جوبالاردى ىسكە اسىرۋعا جانە دايىنداۋعا ارنالعان. «بيزنەس» اتالىمىن ەكونوميكانىڭ باسىم سەكتورلارىندا جاڭا بيزنەس-يدەيالاردى ىسكە اسىرعاندار يەلەنەدى. «مەديا» اتالىمى جاڭا مەديا جوبالاردى, ونىڭ ىشىندە جاستار ءۇشىن تانىمدىق, پايدالى, قىزىقتى كونتەنت قۇرۋ جونىندەگى جوبالاردى ىسكە اسىرعاندارعا بۇيىرادى.
ۇمىتكەرلەردىڭ كونكۋرستىق وتىنىمدەرى (قاعاز نۇسقادا) اعىمداعى جىلعى 14 تامىزعا دەيىن مىنا مەكەنجاي بويىنشا قابىلدانادى: نۇر-سۇلتان قالاسى, ماڭگىلىك ەل داڭعىلى, 8, «مينيسترلىكتەر ءۇيى» اكىمشىلىك عيماراتى (14-كىرەبەرىس); بايلانىس نومىرلەرى: 8(7172)74-12-78, 8(702-000-88-12). ەلەكتروندى نۇسقاسى generation.kaz@gmail.com پوشتاسىنا قابىلدانادى.
كونكۋرستىق وتىنىمدەر مەملەكەتتىك جانە (نەمەسە) ورىس تىلدەرىندە قابىلدانادى جانە نىسان بويىنشا جوبانىڭ سيپاتتاماسى; جوبانىڭ بەينە-تانىستىرىلىمى (60 سەكۋندتان اسپايدى); شىعىستار سمەتاسىنىڭ جوباسى; زياتكەرلىك مەنشىك تۋرالى مالىمەتتەر (بار بولسا) قامتىلۋعا ءتيىس.
