سونداي كاسىپكەردىڭ قاتارىندا كوز دارىگەرى اسىل احمەتوۆا دا بار. ول 13 جىل بۇرىن كاسىپكەرلىككە بەت بۇرعان. جەتى جىل بۇرىن «جارقىرا» اتاۋىمەن كوزىلدىرىك دايىندايتىن سالون اشقان. اۋىلداستارىنىڭ كوز جانارى سۋالماۋىن ويلاعان دارىگەر كاسىبىنىڭ ماتەريالدىق بازاسىن نىعايتۋ ءۇشىن «بيزنەستىڭ جول كارتاسى-2025» باعدارلاماسىنا قۇجات تاپسىرىپ, 3 ملن تەڭگە كولەمىندە قايتارىمسىز گرانتقا يە بولعان. ءسويتىپ, سالونىن كوزدىڭ قان قىسىمىن ولشەيتىن ارنايى قۇرالمەن تولىقتىردى.
– قازىر كوز اۋرۋى كوبەيىپ تۇر. بۇل اۋرۋ جاس تالعامايدى عوي. اسىرەسە بالالار اراسىندا كورۋ قابىلەتى تومەندەگەنى الاڭداتادى. بالالاردىڭ كوز اۋرۋىن ەرتە ەمدەمەسە, كەيىن اسقىنىپ كەتۋى مۇمكىن. ولار دارىگەرگە كوزىن قاراتىپ, كوزىلدىرىك الۋ ءۇشىن وبلىس ورتالىعىنا, وزگە قالالارعا بارا المايدى. وسىنداي سەبەپپەن, وسى ءىستى قولعا الدىم, – دەيدى اسىل احمەتوۆا.
كاسىبىن باستاعالى بىرنەشە رەت نەسيە الۋىنا تۋرا كەلدى. الدىمەن اۋىل شارۋاشىلىعىن قارجىلاي قولداۋ قورىنىڭ التى پايىزدىق جەڭىلدىگىمەن 6 ملن تەڭگەسىنە قول جەتكىزدى. بۇل قارجىعا كوزدى تەكسەرەتىن زاماناۋي ۇلگىدەگى اپپاراتتاردى, ءتۇرلى كوزىلدىرىكتى دايىندايتىن ستانوكتار اكەلگەن. كەيىن 2020 جىلى «دامۋ» قورىنان بەرىلگەن 20 ملن تەڭگە نەسيەگە بالالاردىڭ كوز اۋرۋىن ەمدەۋگە قاجەتتى قۇرال-جابدىقتار ساتىپ العان. ول اشقان سالوندا مەرەكە كۇندەرى بالالارعا, كوپبالالى انالارعا, مۇمكىندىگى شەكتەۋلى جاندارعا ارنالعان ارنايى جەڭىلدىك جاسالادى. قازىر قۇلسارى قالاسىنداعى ەكى نۇكتەدە التى ادامعا جۇمىس بەرىپ وتىر. ولاردىڭ جالاقىسىن ۋاقتىلى تولەيدى.
بۇل اۋداندا اتالعان باعدارلامامەن مەديتسينا سالاسىنداعى كاسىبىن باستاعان جاننىڭ تاعى ءبىرى – ايزادا قالۋوۆا. ءتىس ەمدەۋ ىسىندە بەسجىلدىق ەڭبەك ءوتىلى بار ول بىلتىر «بيزنەستىڭ جول كارتاسى-2025» باعدارلاماسىنىڭ قارجىلاي گرانتىن العان. قازىر ءۇش ماماندى تۇراقتى جۇمىسقا تارتىپ وتىر.
– ءتىس ەمدەۋدىڭ وزىندىك قيىندىعى, ءتاسىلى بار. جاڭا تەحنولوگيالار دا ەنگىزىلىپ جاتىر. سونداي يننوۆاتسيالىق اپپاراتتى ساتىپ الىپ, ءتىس ەمدەۋدى باستادىم. بۇل اپپاراتتىڭ ەرەكشەلىگىنە توقتالسام, تىستەگى كورىنبەيتىن ينفەكتسيانى 25 ەسەگە ۇلكەيتەدى. كاسىبىمدى باستاۋ ءۇشىن مەملەكەتتىڭ قايتارىمسىز قارجى بەرەتىنى بىزگە ۇلكەن قولداۋ بولىپ وتىر, – دەيدى ايزادا قالۋوۆا.
اتىراۋ وبلىسى
