وتىرىستا ايگۇل قۇسپان بيىل ەكى ەل اراسىندا ديپلوماتيالىق قاتىناستاردىڭ ورناعانىنا 30 جىل تولعانىن اتاپ ءوتىپ, قازاقستان مەن كورەيا اراسىنداعى ىنتىماقتاستىق وسى جىلدار ىشىندە ءوزارا تۇسىنىستىك پەن دوستىق رۋحىندا دامىپ كەلە جاتقانىنا توقتالدى.
سونىمەن قاتار تاراپتار قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتىڭ وتكەن جىلعى كورەياعا مەملەكەتتىك ساپارى بارىسىندا ەكى ەل كوشباسشىلارى كەڭەيتىلگەن ستراتەگيالىق ارىپتەستىكتى نىعايتۋدى جالعاستىرۋعا نيەتتى ەكەندەرىن ايتتى.
«ەكى ەل پارلامەنتتەرى اراسىنداعى ءوزارا ءىس-قيمىل كەڭەيتىلگەن ستراتەگيالىق ارىپتەستىكتىڭ ماڭىزدى قۇرامداس بولىگى. پارلامەنت زاڭ شىعارۋ قىزمەتىنىڭ ءتۇرلى ماسەلەلەرى بويىنشا كورەي ارىپتەستەرىمەن سەرىكتەستىكتى تەرەڭدەتۋگە دايىن», دەدى ايگۇل قۇسپان.
ءوز كەزەگىندە ۋ ۆون شيك جىل وتكەن سايىن كورەيا مەن قازاقستان اراسىندا پارلامەنتارالىق بايلانىس نىعايىپ كەلە جاتقانىن ايتتى. سونىمەن قاتار قازاقستان وڭتۇستىك كورەيا ءۇشىن ورتالىق ازياداعى ءىرى ءارى ماڭىزدى ساۋدا سەرىكتەسى ەكەنىنە نازار اۋداردى.
وتىرىسقا ءماجىلىس دەپۋتاتتارى, كورەيا رەسپۋبليكاسىمەن ىنتىماقتاستىق توپ مۇشەلەرى ايدوس سارىم, جۇلدىز سۇلەيمەنوۆا مەن امانجول ءالتاي قاتىستى.
سوڭىندا تاراپتار قازاقستان مەن كورەيا اراسىنداعى ىنتىماقتاستىقتى نىعايتۋ, سونىڭ ىشىندە پارلامەنتارالىق بايلانىستى ودان ءارى دامىتۋ تۋرالى كەلىستى.
