مايدانعا بارعان ايشا اپاي

جەڭىس – 65 “سوتسياليستىك قازاقستاندا” (قازىرگى “ەگەمەن قازاقستان”) ەكى ماشينيستكا ايشا اپاي بولعان: سيقىمباەۆا جانە جالەلوۆا. ەكەۋى دە ۇجىمدا ايرىقشا قۇر­مەت­كە بولەنگەن ادامدار. كوز كور­گ­ەندەر ولار تۋرالى جىر قىلىپ اڭگىمە ايتادى. بىراق سول كوز كورگەندەردىڭ وزدەرى دە سيرەك بۇل كۇندە. اسىرەسە, ءبىرىنشى ايشا اپاي­دى, ايشا سيقىمباەۆانى كور­گەندەر جوققا ءتان. جاقىندا گا­زەتتىڭ الماتىداعى بولىمشەسىنە اسىلدىڭ تۇياعى – ءىلياس جان­سۇ­گىروۆتىڭ بالاسى سايات ءىلياس ۇلى جان­سۇگىروۆ كەلىپ, سول ەكى ايشا اپاي­ىمىزدىڭ ۇلكەنى تۋرالى ءبى­راز ماعلۇمات بەردى. سول ماعلۇماتتىڭ ەڭ ءماندىسى, ءدال قازىر جۇرتتىڭ كوڭىلىن كو­بى­رەك اۋداراتىنى – ايشا اپايى­مىزدىڭ مايدانعا بارعانى. ءار ۇجى­منان سول كەزدە مايدانعا ات­تان­عاندار كوپ بولعان عوي. ولار­دىڭ اراسىندا قازاق قىزدارى دا بولدى. باتىر قىزدارىمىز ءاليا مەن مانشۇكتى, ۇشقىش قىزىمىز حيۋازدى ايتساق تا جەتكىلىكتى-اۋ. سويتسە دە, سول مايدانعا كوبىنە ەر-ازاماتتار اتتانىپ, ولاردىڭ ورنىن ايەل ازاماتتار باسقانى بەلگىلى. “سوتسياليستىك قازاقستان” گازەتى رەداكتسياسىنان دا كوپ ازا­مات مايدانعا اتتانىپ, ورىن­دا­رىنا اپايلارىمىز قالعانى بار. ال “سق”-دان مايدانعا اتتانعان ايەل ازاماتتان ايشا اپايىمىز جالعىز بولدى. مايدانعا ءوز ماماندىعى بوي­ىنشا باردى. سوندا گازەت رەداك­تسياسىندا ماشينيستكا بولىپ جۇمىس ىستەپتى. سول سولتۇستىك-با­تىس مايدانىنىڭ “وتان ءۇشىن” گازەتىندە بەلگىلى اقىندارىمىز جۇبان مولداعاليەۆ, ساعىنعالي سەيىتوۆ, سونداي-اق بەلگىلى جۋر­ناليست احمەت ەلشىبەكوۆپەن بىرگە ەڭبەك ەتىپتى. وندا جۇمىسقا تاڭ­ەر­تەڭ بارىپ, كەشكە قايتاتىن ەمەس, ءۇي دە, جۇمىس ورنى دا سول كوش­پەلى رەداكتسيا. ايشا اپايى­مىز ماشينيستكا رەتىندە ماتە­ري­ال باسىپ قانا قويماي, كوررەكتور دا بولىپتى. ءسويتىپ, گازەت رە­داكتسياسىنان مايدانعا اتتانعان ايشا اپايىمىز 65 جىل­دىعىن اتاپ وتكەن ۇلى جەڭىسىمىزگە ءوزىن­شە ۇلەس قوسىپتى. جەڭىستىڭ قۋانىشى ۇلكەن بول­عانمەن, سول تۇستا قيىن­شى­لىق تا, قايعى دا كوپ بولدى عوي. ايشا اپاي جەڭىسپەن ەلگە ورال­عاندا, سۇيىكتى ءسىڭلىسى, ۇلى اقىن ءىلياستىڭ العاشقى جارى فاتيما دا دۇنيەدەن وزعان ەدى. ونى دا ء(تو­رەباەۆا فاتيما) ءوزى “سق”-عا كور­رەكتور ەتىپ ورنالاستىرىپ كەت­كەن بولاتىن. ودان قالعان سايات پەن سايدا جانە ءوزىنىڭ شا­را­سى الدىنان شىققان. سولاردىڭ ءبارىن ازامات ەتىپ جەتكىزۋ تاۋقىمەتىن ارقالاۋعا تۋرا كەلدى. ايشا اپايىمىز سول بورىشتىڭ ۇدەسىنەن شىقتى. با­لالاردىڭ ءبارى دە جەتىلدى, ازامات بولدى. حالىق جاۋىنىڭ بالاسى دەگەن كۇيە جاعىلعان سايات تا باسقالاردان كەم بولماي, ءماس­كەۋدە وقۋ ءبىتىرىپ, ەلگە ەسىمى بەلگىلى مامانعا اينالدى, تەحنيكا عىلىمدارىنىڭ كانديداتى. وسىلاي مايدانعا بارىپ, جە­ڭىسپەن ورالعان ايشا اپاي ءومىر­دە دە جەڭىسكە جەتكەن ادام ەدى. ماماديار جاقىپ.