«شىلدەنىڭ قورىتىندىسى بويىنشا, تەڭگە باعامى 1 دوللار ءۇشىن 477,07 تەڭگەگە دەيىن كوتەرىلىپ, 1,5%-عا وزگەردى. قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى ءبىر ايدا 96,4 ملن اقش دوللارىنان 118,6 ملن اقش دوللارىنا دەيىن ۇلعايدى. شىلدەدە ساۋدا-ساتتىقتىڭ جالپى كولەمى 2,4 ملرد اقش دوللارىن قۇرادى.
ۆاليۋتا نارىعىنا كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى قولداۋ كورسەتتى. ولار شامامەن 543,9 ملن اقش دوللارىن قۇرادى. كۆازيمەملەكەتتىك سەكتور كومپانيالارى ەكىنشى دەڭگەيلى بانكتەر ارقىلى ۆاليۋتا نارىعىندا ساۋدانى دەربەس جۇزەگە اسىرادى.
شىلدەدە ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن شەتەل ۆاليۋتاسىن ساتۋ 599,2 ملن اقش دوللارىن قۇرادى. ۇلتتىق قوردان ساتۋ ۇلەسى ساۋدا-ساتتىقتىڭ جالپى كولەمىنىڭ 25,3% قۇرايدى», دەلىنگەن حابارلامادا.
