بۇل تۋرالى ءۇندىستان پرەمەر-ءمينيسترى نارەندرا مودي ءوزىنىڭ Twitter پاراقشاسىندا: «شىعىس ءۇندىستاننىڭ شالعاي بولىگىندە تۋعان, تايپالىق قاۋىمنان شىققان ءۇندىستاننىڭ قىزى ءبىزدىڭ پرەزيدەنت بولىپ سايلاندى», دەگەن جازبامەن ءبولىستى.
ءۇندىستاندا پرەزيدەنت جالپى حالىقتىق سايلاۋ ارقىلى تاڭدالمايدى. ەل پارلامەنتىنىڭ جوعارعى جانە تومەنگى پالاتالارىنىڭ دەپۋتاتتارى, سونداي-اق 28 شتات پەن ەكى وداقتىق اۋماقتىڭ زاڭ شىعارۋشى وكىلدەرى, شامامەن 4 896 ادامدى قامتيتىن سايلاۋ وكرۋگى سايلايدى. وسىلايشا, دراۋپادي مۋرمۋ 25 شىلدە كۇنى انت بەرىپ, رەسمي تۇردە ءۇندىستاننىڭ حV پرەزيدەنتى بولىپ سايلاندى.
«تاۋەلسiزدiكتiڭ 75 جىلدىعىندا ماعان وسى قىزمەتكە كەلۋ باقىتى بۇيىردى. بىزگە, تاۋەلسىز ءۇندىستان ازاماتتارىنا ازاتتىق جولىنداعى كۇرەسكەرلەرىمىزدىڭ ءۇمىتىن اقتاۋ ءۇشىن كۇش-جىگەردى ارتتىرۋعا تۋرا كەلەدى», دەدى مۋرمۋ انت قابىلداۋ راسىمىندە سويلەگەن سوزىندە.
الەمنىڭ تۇكپىر-تۇكپىرىنەن مەملەكەت باسشىلارى ءۇندىستاننىڭ جاڭا پرەزيدەنتى مۋرمۋنى قۇتتىقتاپ ارنايى حاتتار جولداپ جاتىر. مۋرمۋ – ءۇندىستان تاريحىندا ەكىنشى ايەل پرەزيدەنت. سونداي-اق الەۋمەتتىك ساتىدا تومەن تۇرعان تايپالاردان شىققان العاشقى مەملەكەت باسشىسى.
1958 جىلى وديشا شتاتىنداعى مايۋربحاندج اۋدانىنىڭ بايداپوسي اۋىلىندا دۇنيەگە كەلگەن مۋرمۋدىڭ ءۇندىستان تاۋەلسىزدىگىن العاننان كەيىن تۋعان العاشقى پرەزيدەنت بولعانىن دا ەرەكشە اتاپ وتكەن ءجون. سونىمەن قاتار ول – 2015-2021 جىلدار ارالىعىندا دجاركحاند گۋبەرناتورى قىزمەتىن اتقارعان العاشقى ايەل.
ەستەرىڭىزگە سالا كەتەيىك, بۇعان دەيىن پراتيبحا پاتيل ءۇندىستاننىڭ 60 جىلدىق تاريحىندا 2007 جىلى پرەزيدەنت بولىپ سايلاندى. ول 2012 جىلعا دەيىن ەل باسقارىپ, العاشقى ايەل پرەزيدەنت رەتىندە تاريحتا قالدى.
ءۇندىستان پرەزيدەنتىن ەل پارلامەنتى ەكى پالاتاسىنىڭ مۇشەلەرى مەن بارلىق شتاتتاردىڭ زاڭ شىعارۋشى مۇشەلەرىنەن تۇراتىن سايلاۋشىلار القاسى بەسجىلدىق مەرزىمگە سايلايدى. سايلاۋ پروپورتسيونالدى وكىلدىك جۇيەسىنە سايكەس جاسىرىن داۋىس بەرۋ ارقىلى وتكىزىلەدى. بۇدان الدىڭعى پرەزيدەنت رام ناتح كوۆيند 2017 جىلى سايلانىپ, بەسجىلدىق قىزمەتىن تولىقتاي اتقارعان.
جالپى, ءۇندىستاندا پرەزيدەنتتىڭ ەلدەگى ۇستانىمى نەگىزىنەن سيمۆولدىق سيپاتقا يە. ءۇندىستان كونستيتۋتسياسىنا سايكەس, ەلدەگى اتقارۋشى بيلىك پرەمەر-ءمينيستردىڭ قولىندا, بىراق پرەزيدەنت فەدەرالدى جانە ايماقتىق دەڭگەيدە ۇكىمەتتەردىڭ قۇرىلۋىنا اسەر ەتە الادى.
ەندىگى كەزەكتە ءۇندىستاننىڭ جاڭا پرەمەر-ءمينيسترى سايلانباق. سايلاۋ تامىز ايىندا وتەدى دەپ جوسپارلانىپ
وتىر.
