شىۇ ەلدەرىنىڭ سىرتقى ساياسي ۆەدومستۆولارىنىڭ باسشىلارى بيىل قىركۇيەكتە سامارقاند قالاسىندا وتەتىن شىۇ-عا مۇشە مەملەكەتتەر باسشىلارىنىڭ سامميتىنە دايىندىق شەڭبەرىندە ۇيىم قىزمەتىنىڭ ءتۇرلى باعىتتارىنداعى ءوزارا ءىس-قيمىلدىڭ اعىمداعى جاي-كۇيى مەن دامۋ پەرسپەكتيۆالارىن, ونىڭ حالىقارالىق جانە وڭىرلىك ىستەردەگى ءرولى مەن ورنىن ارتتىرۋدى تالقىلادى.
تاراپتار شىۇ-نىڭ ءوزارا سەنىم مەن پايدانى, تەڭدىكتى, ءوزارا كونسۋلتاتسيالاردى, مادەنيەتتەردىڭ الۋان تۇرلىلىگىن قۇرمەتتەۋدى جانە بىرلەسىپ دامۋعا ۇمتىلىستى ىسكە اسىراتىن «شانحاي رۋحىنا» سۇيەنە وتىرىپ, قۇرىلعان ساتىنەن باستاپ 21 جىل ىشىندە قازىرگى حالىقارالىق قاتىناستار جۇيەسىنىڭ ىقپالدى قاتىسۋشىلارىنىڭ ءبىرى رەتىندە ورنىققانىن اتاپ ءوتتى.
ءوز سوزىندە سىرتقى ىستەر مينيسترلىگىنىڭ باسشىسى قازاقستان ۇيىم مەملەكەتتەرىمەن ىنتىماقتاستىقتىڭ بارلىق باعىتى بويىنشا جان-جاقتى ءوزارا ءىس-قيمىل بويىنشا بەلسەندى جۇمىستى جالعاستىرۋعا نيەتتى ەكەنىنە توقتالدى.
«وتكەن جۇمىس جىلدارىندا ۇيىمنىڭ نەگىزگى ماقساتتارى مەن مىندەتتەرىنە قول جەتكىزۋگە باعىتتالعان بىرلەسكەن ءىس-شارالاردى جۇيەلى تۇردە جۇزەگە اسىردىق. شانحاي ىنتىماقتاستىق ۇيىمى ءوزىنىڭ ءۇشىنشى ونجىلدىعىندا وتە كۇردەلى الەمدىك پروتسەستەردىڭ اياسىندا كىرەدى. وسىنىڭ اياسىندا شىۇ تۇراقتىلىق پەن دامۋ كەڭىستىگى بولىپ قالا بەرەتىنىن اتاپ ءوتۋ قۋانتادى», دەدى م. تىلەۋبەردى.
قازاقستان, قىتاي, قىرعىزستان, پاكىستان, وزبەكستان, رەسەي, تاجىكستان جانە ءۇندىستان سىرتقى ىستەر مينيسترلەرى سامارقاند دەكلاراتسياسى ساياسي قۇجاتىنىڭ جوباسىن قاراپ, نەگىزگە الدى, سونداي-اق ۇيىمنىڭ اعىمداعى قىزمەتى بويىنشا بىرقاتار باسقا شەشىمگە قول قويدى.
شىۇ ەلدەرىنىڭ سىرتقى ساياسي ۆەدومستۆولارىنىڭ باسشىلارى شىۇ-عا مۇشە مەملەكەت مارتەبەسىن الۋ ماقساتىندا يران يسلام رەسپۋبليكاسىنىڭ مىندەتتەمەلەرى تۋرالى مەموراندۋمعا قول قويۋ تۋرالى ماسەلەنى مەملەكەتتەر باسشىلارى كەڭەسىنىڭ قاراۋىنا ەنگىزۋ تۋرالى شەشىم قابىلدادى.
مينيسترلەر شىۇ-نىڭ مىسىر اراب رەسپۋبليكاسىمەن, ساۋد ارابياسى كورولدىگىمەن جانە قاتار مەملەكەتىمەن ديالوگ بويىنشا ارىپتەس مارتەبەسىن بەرۋ تۋرالى مەموراندۋمدارعا قول قويىلۋىن قۇپتادى.
جيىننان كەيىن شىۇ ەلدەرى دەلەگاتسيالارىنىڭ باسشىلارىن وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ قابىلدادى. سۇحبات بارىسىندا وڭىردەگى احۋال مەن شىۇ اياسىنداعى ءوزارا ءىس-قيمىل جونىندەگى وزەكتى ماسەلەلەر, سونداي-اق ۇيىمنىڭ الداعى سامميتىنە دايىندىق بارىسى قوزعالدى.
ءىس-شارا اياسىندا قازاقستان ءسىم باسشىسى م.تىلەۋبەردى قىتاي سىرتقى ىستەر ءمينيسترى ۆان ي, ءۇندىستان سىرتقى ىستەر ءمينيسترى سۋبرامانيان دجايشانكار, پاكىستان سىرتقى ىستەر ءمينيسترى بيلاۆال زارداريمەن ەكىجاقتى بولەك كەزدەسۋلەر وتكىزدى. سونداي-اق شىۇ باس حاتشىسى چجان مينمەن دە كەلىسسوزدەر وتكىزىلدى.
تاراپتار ەكىجاقتى ىنتىماقتاستىقتىڭ جاي-كۇيى مەن پەرسپەكتيۆالارىن جانە كوپجاقتى قۇرىلىمدار اياسىنداعى ءوزارا ءىس-قيمىلدى تالقىلادى. حالىقارالىق كۇن تارتىبىندەگى وزەكتى ماسەلەلەرگە ەرەكشە نازار اۋدارىلدى.
قىتاي سىرتقى ىستەر ءمينيسترى ۆان يمەن كەزدەسۋ بارىسىندا م.تىلەۋبەردى بىرقاتار ماسەلەنى تالقىلاعان. سينحۋا اگەنتتىگىنىڭ حابارلاۋىنشا, بەيجىڭ بيلىگى قىتاي-قازاقستان ىنتىماقتاستىعىن ودان ءارى نىعايتىپ, بەلدەۋ مەن جولدىڭ جوعارى ساپالى قۇرىلىسىن باستى مىندەت ەتىپ قويۋعا دايىن ەكەنىن بىلدىرگەن.
ۆان ي بيىلعى اقپاندا قحر توراعاسى سي تسزينپين مەن قازاقستان پرەزيدەنتى قاسىم-جومارت توقاەۆتىڭ جەمىستى كەزدەسۋ وتكىزگەنىن جانە قىتاي-قازاقستان قارىم-قاتىناسىنىڭ تاعى دا 30 جىلدىق التىن كەزەڭىن قۇرۋعا, ەكىجاقتى بايلانىستاردى ۇزاق مەرزىمدە دامىتۋ ءۇشىن بىرلەسىپ جۇمىس ىستەۋگە مۇددەلى ەكەنىن جەتكىزگەن.
