ەشكى سۇتىنە دە ەلەپ قارايىق

بەيبىت بەيسەكەش – استانالىق كاسىپكەر. ول قازاق جاستارى ارا­سىن­دا سيرەك كەزدەسەتىن اتومشى ما­ماندىعىن يگەرگەن, بۇگىنگى نا­رىق­تىق دامۋ زاڭدىلىقتارىن تە­رەڭ زەردەلەي بىلەتىن ازامات. ءاسى­رە­سە, ونىڭ ەلگە ءبىر پايدامدى تي­گىز­سەم ەكەن دەگەن جاناشىرلىق كوز­قاراسى وزگەلەرگە دە ۇلگى بو­لارلىقتاي. وسى ماقساتتا ول زەلەنوۆ اۋدا­نىنداعى ششاپوۆ اۋىلىندا ءوز قا­راجاتىنا ەشكى ءسۇتىن وندىرەتىن شا­عىن زاۋىت قۇرىلىسىن باستاپ كەت­كەنىن دە ءبىلۋشى ەدىك. جوبانى ىسكە اسىرۋ ءۇشىن بەيبىت تۇركيادان ءسۇتتى مول بەرەتىن اسىل تۇقىمدى انگور ەش­كىلەرىن ساتىپ الۋ جونىندە كەلى­سىم-شارتتار دا جاساپ قايتقان بولاتىن. دەگەنمەن, كەيىنگى كەزدە ونىڭ وسى باستاعان تاماشا جوباسىن تو­لىق­تاي اياقتاي الماي قينالىپ ءجۇر­گەنىنەن دە حابارىمىز بار ەدى. مۇنداعى باستى قيىندىق زاۋىت قۇرىلىسىن تولىقتاي ىسكە قوسۋعا قاجەتتى قاراجات كوزدەرىنىڭ جەتكى­لىك­سىزدىگى بولاتىن. وسى تۇرعىدا تىلشىلەر قوسىنىنا ارنايى كەلگەن كاسىپكەرگە كوڭىلدى الاڭداتىپ ءجۇر­گەن ماسەلە جونىندە ساۋال قويۋعا تۋرا كەلدى. جوباڭىز وتە تاماشا. ونى ىسكە قوساتىن ۋاقىتىڭىز ءال­دە­قاشان جەتىپ ەدى عوي, سونشاما نەگە تۇيىققا تىرەلىپ قالدىڭىز دە­گەن ساۋالىمىزعا كاسىپكەردىڭ قاي­تارعان جاۋابى تومەندەگىدەي بولدى. بۇل جەردە باستى ماسەلە, ءسىز ويلاعانداي مەملەكەت تاراپىنان جاسالاتىن قاراجات كوزدەرىنىڭ تاپ­شى­لىعىندا نەمەسە جەتكىلىكسىز­دى­گىن­دە ەمەس. كەرىسىنشە, قازىر مەم­لەكەتتە قاراجات كوزدەرى جەتكىلىكتى. قىسقاسى, بۇگىندە مەملەكەتىمىز كەز كەلگەن وندىرىستىك جوبانى قار­جىلىق تۇرعىدان قولداي الادى. تەك ءبارى ءتيىستى زاڭدىلىقتارعا سايكەس بولۋى كەرەك. ايتايىن دەگەنىم, تاۋارلى ءسۇت وندىرۋگە قاتىستى قولدانىلىپ ءجۇر­گەن بۇگىنگى زاڭ نورمالارى تەك ءمۇيىزدى ءىرى قارا وسىرۋشىلەرگە عانا لايىقتالعان. بۇل باياعى كەڭەستىك زامانداعى زاڭ تارماقتارىنىڭ كو­شىرمەسىندەي كورىنەدى. ياعني ول ەس­كىرگەن, بۇگىنگى زامان تالاپتارىنا ءساي­كەس كەلمەيدى. سوندىقتان وعان ءتيىستى وزگەرتۋلەر مەن تولىق­تى­رۋلار قاجەت دەپ ويلايمىن. بۇگىندە تۇتاستاي ەۋروپا ەلدەرى ەشكى ءسۇتىن وندىرۋگە باعىت ۇستاپ وتىر. ونى تەكتەن-تەك دەۋگە بول­مايدى. ارينە, پايداسى بولماسا ولاي ىستەمەس ەدى. بۇل ءجايت ءبىزدى دە وي­لاندىرۋعا ءتيىس. اۋىل شارۋا­شى­لىعىن ءارتاراپتاندىرۋدىڭ باستى جولدارىنىڭ ءبىرى دە وسى دەپ تۇسىنەمىن. استانالىق كاسىپكەر بەيبىت بەيسەكەشتىڭ بۇل پىكىرى قالاي دەسەك تە كوڭىلگە قوناتىن سەكىلدى. تەك سيىر ءسۇتىن عانا ەمەس, سونىمەن بىرگە, قوي-ەشكى سۇتتەرىن دە تاۋار تۇرىندە ءوندىرۋدى نازاردا ۇستاساق , ودان ەش ۇتىلماسىمىز كامىل. اي­تايىن دەگەنىمىز, بۇل ماسەلە پار­لامەنت دەپۋتاتتارىنىڭ نازا­رىن­دا بولسا ەكەن دەگەن تىلەك ەدى. تەمىر قۇسايىن, ورال.