جىل سايىن ەلىمىزدە 36 مىڭعا جۋىق ادام ونكولوگيالىق اۋرۋلارعا شالدىعىپ, 14 مىڭنان استام ناۋقاس كوز جۇمادى. وتكەن جىلدىڭ وزىندە-اق نۇر-سۇلتان قالاسىندا قاتەرلى ىسىككە شالدىعۋدىڭ 2 178 جاعدايى انىقتالعان ەدى. وسىلايشا, 2021 جىلى سىرقاتتانۋشىلىق 9,8%-عا وسكەنى بايقالدى.
ونكولوگيالىق اۋرۋلار قۇرىلىمىندا ءبىرىنشى ورىندا – ءسۇت بەزى وبىرى, ەكىنشى ورىندا – كولورەكتالدى قاتەرلى ىسىك, ءۇشىنشى ورىندا – وكپە وبىرى, ءتورتىنشى ورىندا – اسقازان وبىرى, بەسىنشى ورىندا جاتىر موينى وبىرى تۇر. ونكولوگيالىق اۋرۋلارعا تاپ بولاتىنداردىڭ 60,1%-ى ەڭبەككە قابىلەتتى جاستاعى ادامدار ەكەنى قىنجىلتادى.
بۇگىندە مەملەكەتتىك باعدارلامالار اياسىندا ەرتە دياگنوستيكالاۋ شارالارىن دامىتۋ ماقساتىندا اتى جامان اۋرۋدىڭ پروفيلاكتيكاسىن جەتىلدىرۋگە باعىتتالعان ءىس-شارالار ءجيى وتكىزىلىپ تۇرادى. قازاقستاندىقتار ءۇشىن سكرينينگتىك تەكسەرىستىڭ ءۇش ءتۇرى جۇرگىزىلەدى. ولار: 30-70 جاس ارالىعىنداعى ايەلدەر ءتورت جىلدا ءبىر رەت وتەتىن جاتىر موينى قاتەرلى ىسىگىنىڭ سكرينينگى, 40-70 جاستاعى ايەلدەر ەكى جىلدا ءبىر رەت وتۋگە ءتيىس ءسۇت بەزى قاتەرلى ىسىگىنىڭ سكرينينگى جانە 50-70 جاستاعى ازاماتتاردىڭ بارلىعى ءوتۋى مىندەتتى توقىشەكتىڭ قاتەرلى ىسىگىنە سكرينينگ. ءبىر ايتا كەتەرلىگى, بۇل پروفيلاكتيكالىق تەكسەرىستەردەن ءوزىڭىز تىركەلگەن ەمحانادان اقىسىز تۇردە وتۋگە بولادى.
جىل سايىن 2,5 ميلليوننان استام قازاقستاندىق سكرينينگتىك زەرتتەۋدەن ءوتىپ تۇرادى. ال 2019 جىلدان باستاپ ونكولوگيالىق اۋرۋلاردىڭ بەلگىلەرى انىقتالعان ناۋقاستارعا كت جانە مرت تەگىن جۇرگىزىلىپ كەلەدى. وتكەن جىلى 62 660 ناۋقاس زاماناۋي ءارى قىمبات مەديتسينالىق قوندىرعىلاردى ءبىر تيىن جۇمساماي پايدالانا العانى قۋانتادى.
قازىرگى مەديتسينادا راديونۋكلەيدتىك دياگنوستيكانىڭ تاعى ءبىر ءتۇرى – پوزيتروندى-ەميسسيالىق توموگرافيا بەلسەندى دامىپ جاتىر. وتكەن جىلى 10,5 مىڭنان استام ناۋقاس پەت زەرتتەۋلەرمەن قامتىلعان. وعان قوسا, ەلىمىزدە زاماناۋي مولەكۋليارلىق-گەنەتيكالىق, يممۋنوگيستوحيميالىق زەرتتەۋلەر, تارگەتتىك تەراپيا مينيمالدى ءينۆازيۆتى, لاپوروسكوپيالىق وپەراتسيالار قولدانىلادى. 2021 جىلعى دەرەكتەر بويىنشا جوعارىدا اتالعان تاسىلدەرمەن بارلىعى 143 014 ناۋقاس ەمدەلسە, 28 928 ناۋقاس حيرۋرگيالىق ەم العان ەكەن.
وسى ورايدا ەلوردانىڭ ۇلتتىق عىلىمي ونكولوگيا ورتالىعىندا وڭەش پەن اسقازان اۋرۋلارى بار ناۋقاستارعا ارنالعان اشىق ەسىك كۇنى وتەتىنى – جاعىمدى جاڭالىق. بۇل 18 جاستان اسقان بارلىق قىزىعۋشىلىق بىلدىرگەن ازاماتتاردىڭ ۇعوو-نىڭ جوعارى بىلىكتى دارىگەرلەرىنەن كەڭەس الۋ مۇمكىندىگى بار دەگەن ءسوز. ول ءۇشىن ءىس-شاراعا قاتىسۋعا نيەتتەنگەن ءار ناۋقاس 30 شىلدە كۇنى ۇعوو-نىڭ كونسۋلتاتيۆتى-دياگنوستيكالىق ورتالىعىنا كەلدى. اشىق ەسىك كۇنىنە قاتىسۋ ءۇشىن الدىمەن ونكولوگ ماماننىڭ, ابدومينالدى حيرۋرگتىڭ قابىلداۋىنا جازىلۋ قاجەت ەكەنىن ايتا كەتكەن ءجون.
اتالعان ورتالىق ماماندارى بىرنەشە جىل بويى ەمدەلۋشىلەرگە راديونۋكلەيدتى, پروتوندى, ساۋلەلى, لازەرلىك تەراپيا, سونداي-اق جاسۋشالىق يممۋنوتەراپيا سياقتى دياگنوستيكا جانە ەمدەۋ ادىستەرىن ۇسىنىپ كەلەدى. مۇنداعى بارلىق زاماناۋي تەحنولوگيالار ۇعوو دارىگەرلەرىنە پاتسيەنتتەردىڭ ءومىر ءسۇرۋ ساپاسىن جاقسارتۋعا جانە قاتەرلى ىسىك كەزىندە ءومىر ءسۇرۋ دەڭگەيىن ارتتىرۋعا مۇمكىندىك بەرەتىنى ءسوزسىز.
