جىل باسىنان بەرى مەملەكەت باسشىسىنىڭ تاپسىرمالارىن ورىنداۋ ءۇشىن پروكۋرورلار كۇشىن «قاڭتار تراگەدياسىنىڭ» سەبەپتەرى مەن ەگجەي-تەگجەيىن انىقتاۋعا, تەررورلىق شابۋىلدار مەن جاپپاي تارتىپسىزدىكتەردىڭ ۇيىمداستىرۋشىلارى مەن بەلسەندى قاتىسۋشىلارىن انىقتاۋعا باعىتتادى. بۇگىندە وسى وقيعالاردى تەرگەۋ ناتيجەلەرى بويىنشا سوتقا 474 قىلمىستىق ءىس جولداندى, 717 ادام سوتتالدى. قىلمىستىق پروتسەستى كەزەڭ-كەزەڭىمەن جاڭعىرتۋ جالعاسۋدا.
ءۇش بۋىندى مودەلدى ەنگىزۋ اياسىندا پروكۋرورلار 189 مىڭ پروتسەسسۋالدىق شەشىمدى تەكسەردى. جىل باسىنان باستاپ پروكۋرورلار ەرەكشە ءتارتىپ نەگىزىندە اسا اۋىر قىلمىستار بويىنشا 570 ايىپتاۋ اكتىسىن تولتىردى. جالپى, «پروكۋرورلىق سۇزگىنىڭ» قورىتىندىسىندا تەرگەۋدىڭ سوتقا دەيىنگى ساتىسىندا ازاماتتاردىڭ كونستيتۋتسيالىق قۇقىقتارىنىڭ بۇزىلۋ فاكتىلەرىنىڭ سانى ازايدى.
قىلمىستىق وربيتاعا تارتىلعان ازاماتتاردىڭ كونستيتۋتسيالىق قۇقىقتارىن قورعاۋعا ەرەكشە نازار اۋدارىلىپ وتىر. جىل باسىنان بەرى 1 077 تۇلعاعا قاتىستى نەگىزسىز قىلمىستىق قۋدالاۋ توقتاتىلدى. قىزمەتتىك ءۇي-جايلاردان جانە ۋاقىتشا ۇستاۋ يزولياتورلارىنان 512 ادام بوساتىلدى. پروكۋرورلاردىڭ باستاماسى بويىنشا 634 ادامعا قاتىستى سوت ۇكىمدەرى زاڭعا سايكەستەندىرىلدى, 130 سوتتالۋشىنىڭ جاعدايى جاقساردى, 15-ءى اقتالدى.
الەۋمەتتىك-ەكونوميكالىق سالادا پروكۋرورلاردىڭ اكتىلەرى بويىنشا 8 مىڭنان استام زاڭ بۇزۋشىلىق جويىلدى. بيۋدجەتكە 15 ملرد تەڭگەدەن استام قاراجات قايتارىلدى. ءارتۇرلى جاۋاپكەرشىلىككە 14,5 مىڭ ادام تارتىلدى. كەدەندىك رەتتەۋ جانە سۇيىتىلعان مۇناي گازى نارىعى سالاسىندا ءتارتىپ ورناتىلدى. ەلەۋلى بۇزۋشىلىقتار, ۇرلىق پەن سىبايلاس جەمقورلىقتىڭ «كولەڭكەلى» سحەمالارى اشىلدى.
مۇگەدەكتىگى بار ادامداردىڭ قۇقىقتارىن قورعاۋ, مەديتسينالىق بۇيىمدارعا باعا بەلگىلەۋ ماسەلەلەرى, ءىرى كوتەرمە ساۋدا بازارلارىنىڭ قىزمەتى بويىنشا تەكسەرۋلەر جۇرگىزىلدى. 184 مىڭنان استام ادامنىڭ ەڭبەك قۇقىقتارى قالپىنا كەلتىرىلدى, 1,1 ملرد تەڭگەدەن استام سوماعا جالاقى بويىنشا بەرەشەك وتەلدى.
ازاماتتىق, اكىمشىلىك جانە اكىمشىلىك قۇقىق بۇزۋشىلىق تۋرالى ىستەر بويىنشا 2,1 مىڭنان استام سوت اكتىلەرى تۇزەتىلدى, 6,7 ملرد تەڭگەگە بيۋدجەت شىعىندارىنىڭ الدى الىندى. قاداعالاۋدىڭ باسىم باعىتتارىنىڭ ءبىرى – بيزنەستى قورعاۋدا ايتارلىقتاي ناتيجەلەرگە قول جەتكىزىلدى.
ماسەلەن, كاسىپكەرلىك سالاسىنداعى بۇزۋشىلىقتار بويىنشا 845 قاداعالاۋ اكتىسى ەنگىزىلدى, 212 ملن تەڭگەدەن استام سوماعا 5,5 مىڭ اكىمشىلىك ءوندىرۋ توقتاتىلدى, 6,2 مىڭنان استام زاڭسىز تەكسەرۋلەر مەن باقىلاۋدىڭ وزگە دە نىساندارىنىڭ جولى كەسىلدى جانە كۇشى جويىلدى, 650-دەن استام ادام جاۋاپكەرشىلىككە تارتىلدى.
قاداعالاۋشى ورگان الدىندا تۇرعان مىندەتتەردىڭ اۋقىمى مەن ماڭىزىنا نازار اۋدارا وتىرىپ, بەرىك اسىلوۆ پروكۋرورلاردان ازاماتتاردىڭ كونستيتۋتسيالىق قۇقىقتارىن, بيزنەس پەن مەملەكەت مۇددەسىن كەشەندى قورعاۋعا, سونداي-اق قىلمىستىلىقپەن كۇرەستە ۇيلەستىرۋشى ءرولىن كۇشەيتۋ كەرەگىن تاپسىردى.
