اتاقتى جاۋىرىنشىنىڭ ۇرپاعى باۋىرجان ءتاشىموۆ بۇل جادىگەر ونىڭ ۇيىندە جارتى عاسىرعا جۋىق ساقتالىپ كەلگەنىن جەتكىزدى. سوڭعى ۋاقىتتا جاۋىرىنعا سۇراۋ سالۋشىلاردىڭ كوپتىگىنە بايلانىستى ونى مۋزەي قورىنا اكەلىپ تاپسىرۋدى تۋىستارىمەن اقىلداسىپ شەشىپتى.
سارى بايبىشەنىڭ شىن ەسىمى – ءبيبىسارى, اۋىل-ايماق «سارى انا», كەيىن ول كىسىنىڭ ەمشىلىگى مەن اۋليەلىگىنە, ەل اراسىنداعى ابىرويىنا وراي «سارى بايبىشە» اتاپ كەتكەن. بالالىق ءومىرى تابيعاتى اسەم كوكشە وڭىرىندە وتكەن.
بۇقار جىراۋ اتىنداعى ادەبيەت جانە ونەر مۋزەيىنىڭ ديرەكتورى ەربول قايىروۆ قاسيەت يەسىنە قاتىستى اڭىزداردى تەرىپ, زەرتتەپ جۇرگەن ازاماتتىڭ ءبىرى.
– سارى انامىز ەرەيمەنتاۋعا قونىس اۋدارىپ, سوندا سىرقاتتانىپ قالادى. اۋرۋ كۇن سايىن ءورشىپ, ومىردەن تۇڭىلە باستاعان شاقتا, تۇسىنە كۇمىس ساقالدى اۋليە ەنىپ: «بۇل جەر ساعان قۇت بولمايدى. ەلىڭدى جيناپ, كوش باستاپ, سارىارقادان ءارى اسساڭ, قاراعايلى نۋ ورمان بار. سول جەر سەنىڭ مەكەنىڭ بولادى. ءۇرىم-بۇتاعىڭ ءوسىپ-ءونىپ, كوركەيەسىڭ. اۋرۋىڭنان قۇلان-تازا ايىعاسىڭ. كۇندە كەشكىسىن وتاردىڭ سوڭىندا ۇنەمى ماڭىراپ كەلەتىن سارى باس قوي بار, سويىپ, ەتىن ەلگە تارات. وڭ جاق جاۋىرىنى ساعان ومىردە اداسقاندا جول كورسەتەر, ەم ىزدەگەندەرگە شيپا بەرگىزەر قاسيەتىڭ بولماق. جاۋىرىندى قولىڭا العاندا جىبىرلاپ جازۋ بىتەر, ونى تەك سەن عانا وقي الاسىڭ. قويدى كەشكىسىن سويعاندىقتان, جازۋ كۇن باتار الدىندا عانا پايدا بولادى», – دەپ ايان بەرەدى.
سارى بايبىشە اۋليەنىڭ ايتقانىن ورىنداپ, قازىرگى اققۋلى اۋدانىنداعى بايىمبەت الاڭىنا ەلىن ورنالاستىرىپ, كەيىن ءوزى جەرلەنەتىن جەرگە قازىق قاعىپ: «مىنا جەردە مەنىڭ وتاۋىم تىگىلسىن, دۇنيەدەن وتكەندە دە وسى جەرگە جەرلەڭدەر», دەپ امانات ەتكەن», – دەيدى مۋزەي باسشىسى.
سارى بايبىشە جاۋىرىنمەن تىلسىم دۇنيەنىڭ ءتىلىن ءبىلىپ, بولاشاقتى, اۋا رايى قۇبىلىستارىن بولجاپ, حالىققا باعىت-باعدار كورسەتكەن. ءوزىنىڭ اق قۇرانىمەن حالىققا ەم-دوم جاساپ, وڭىردە دومالاق انا اتانعان. انامىزدىڭ الدىنا ءبىر پەرزەنتكە زار بولعان جاس جۇبايلار, بويىن دەرت بۋعان سىرقاتتار كەلەتىن, ءتىپتى دۋالانعان جانداردى دا بارىپ ەمدەگەن.
مۇرات قاپان ۇلى,
جۋرناليست
پاۆلودار وبلىسى
