«30 شىلدە كۇنى ساعات 05:15-تە اسكەري بولىمگە كەلىسىمشارت بويىنشا اسكەري قىزمەتشى, اعا سەرجانت ا.س.مەرعاليەۆتىڭ وزىنە قول جۇمساعانى تۋرالى اقپارات تۇسكەن. ءمان-جايدى ناقتىلاۋ كەزىندە ايەلىنىڭ تۇنگى ساعات 03:30 شاماسىندا كۇيەۋىن ءۇيىنىڭ دارەتحاناسىندا اسىلىپ تۇرعان كۇيىندە تاۋىپ العانى بەلگىلى بولدى», دەپ حابارلادى «ورتالىق» وڭىرلىك قولباسشىلىعىنىڭ ءباسپاسوز قىزمەتى.
ۆەدومستۆو اقپاراتىنا سايكەس, ارنايى كومەنداتۋرانىڭ قاراۋىل باستىعى ابىلاي سەرىك ۇلى مەرعاليەۆ 1990 جىلى تۋعان. ۇيلەنگەن, ءبىر قىزى بار.
ۇلتتىق ۇلان قاتارىندا 2015 جىلدان بەرى قىزمەت ەتكەن. قازىر اتالعان وقيعانىڭ ءمان-جايى انىقتالىپ جاتىر. قىلمىستىق-پروتسەسسۋالدىق كودەكستىڭ 201-بابىنا سايكەس, سوتقا دەيىنگى تەرگەپ-تەكسەرۋ دەرەكتەرىن جاريا ەتۋگە تىيىم سالىنعان.
ايتا كەتەيىك, بۇعان دەيىن ستەپنوگور قالاسىنداعى 3517 اسكەري بولىمىندە مەرزىمدى اسكەري مىندەتىن اتقارىپ جۇرگەن جاۋىنگەردىڭ اسىلىپ قالعانىن حابارلاعان ەدىك.
