كورەيامەن دوستىق بايلانىستى قولدايدى

پرەزيدەنت پوشتاسىنان مەملەكەت باسشىسىنىڭ اتىنا قازاقستان كورەيلەرى اسسوتسياتسياسى قىزىلوردا فيليالىنىڭ مۇشەلەرى اتىنان ۇجىمدىق حات كەلىپ ءتۇستى, دەپ حابارلادى قازاقستان رەسپۋب­لي­كاسى پرەزيدەنتىنىڭ ءباسپاسوز قىزمەتى. ءوز حاتتارىندا كورەي دياسپورا­سىنىڭ قىزىلوردا وبلىسىندا تۇرا­تىن وكىلدەرى قازاقستان پرەزيدەنتى نۇرسۇلتان نازارباەۆتىڭ كورەيا رەسپۋبليكاسىنا مەملەكەتتىك ساپا­رىن مۇقيات قاداعالاعاندارى ايتىلعان. ء“بىزدىڭ تاريحي وتانىمىزدا ءسىزدى جان جىلۋىمەن قارسى الۋ  كورەي حالقى مەن ەل باسشىلىعىنىڭ سىزگە دەگەن تەرەڭ قۇرمەتىن, ءبىزدىڭ مەملەكەتتەرىمىز اراسىنداعى دوستىق قاتىناستاردى كورسەتەدى. قازىرگى كەزدە كورەيا رەسپۋبلي­كاسىندا قازاقستان كۇندەرىنىڭ ءوتىپ جاتۋى دا  – ورتالىق ازياداعى كوشباسشى رەتىندەگى ءبىزدىڭ رەسپۋبليكاعا, سەنىمدى ىسكەر ارىپتەسكە, باي مادەني مۇراسى جانە زور ەكونوميكالىق الەۋەتى بار ەلگە دەگەن قۇرمەت پەن سەنىمنىڭ بەلگىسى. ءبىز قازاقستان مەن كورەيا اراسىنداعى دوستىق جانە ىسكەرلىك بايلانىستاردىڭ نىعايعانىنا قۋانامىز, الايدا, ءبىزدىڭ وتانىمىز – ءبارىبىر وسى جەردە. رەسپۋبليكا تاۋەلسىزدىگىنىڭ العاشقى قيىن جىلدارىندا, كوپ ادامدار وزدەرىنىڭ تاريحي وتانىنا كەتە باستاعاندا, كورەيلەر وزگە حالىقتاردىڭ وكىلدەرىمەن بىرگە جاڭا قازاقستاندى قۇرۋ ءۇشىن وسىندا قالدى. بۇگىندە, ءبىزدىڭ ەلىمىز اياعىنان نىق تۇرعان كەزدە ءبىز مۇندا ءبىزدىڭ ەڭبەگىمىزدىڭ دە ۇلەسى بار ەكەنىن ماقتان تۇتامىز. قازاقستان كسرو ىدىراعاننان كەيىن سوعىستار مەن ۇلت­ارا­لىق قاقتىعىستارعا ۇرىنعان جوق. بۇگىندە بارشا قازاق­ستاندىقتار بەيبىت جاعدايدا جانە كەلىسىمدە ءومىر ءسۇرىپ وتىر. ءبىز ەرتەڭگى كۇنىمىزگە سەنىمدىمىز. مۇنداي سەنىم ءوز حالقىن سۇيەتىن دانا ساياساتشى باسقارعان باقىتتى ەلدە عانا بولادى. ءبىز ءوزىمىزدىڭ جايلى ۇيىمىزدەگى بەيبىتشىلىك پەن ءبىزدىڭ وتباستارى­مىز­داعى بەرەكە ءۇشىن سىزگە شەكسىز العىسىمىزدى بىلدىرەمىز. مۇنداي بەي­بىتشىلىكتى ءسىز ورناتتىڭىز, نۇرسۇلتان ءابىش ۇلى. قازاقستاننىڭ بارلىق كورەي­لە­رى اتىنان سىزگە قۇرمەت تاعزىمىن بىلدىرەمىز. قازاقستان – ءبىزدىڭ وتانىمىز. كورەيلەردىڭ قازىرگى ۇرپاعى وسىندا تۋعان, سوندىقتان دا ءبىزدىڭ باسقا وتانىمىز جوق. ءبىز قازاقستاننىڭ وركەندەۋى ءۇشىن قولدان كەلگەننىن ءبارىن دە جاسايمىز. سىزگە ەلىمىز بەن حالقىمىزدىڭ يگىلىگى ءۇشىن زور دەنساۋلىق جانە ۇزاق عۇمىر تىلەيمىز”, – دەلىنگەن حاتتا.