سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ حاتشىسى اقىلبەك كۇرىشباەۆ الماتى وبلىسىنا جۇمىس ساپارى بارىسىندا قوناەۆ قالاسىندا بولىپ, ەنەرگەتيكا, كاسىپكەرلىك, اۋىل جانە بالىق شارۋاشىلىعى سالاسىنداعى نىسانداردى ارالادى. سەناتور «لست اگرو» جىلىجاي كەشەنىنىڭ جۇمىسىمەن جانە ءونىم ءوندىرۋ ۇردىسىمەن تانىستى. ول وسى وڭىردە اۋىل شارۋاشىلىعىن دامىتۋعا باعىتتالعان باعدارلاما جۇزەگە اسىپ جاتقانىن ايتا كەلىپ, ايماقتىڭ تابيعاتى كوكونىس داقىلدارىن ءوسىرۋ ءۇشىن وتە قولايلى ەكەنىن جانە سالاعا جاڭا سەرپىن بەرۋ قاجەتىن اتاپ ءوتتى.
اقىلبەك كۇرىشباەۆ وڭىردەگى «وسپانوۆا دەۆەلوپمەنت» جشس بالىق شارۋاشىلىعى كەشەنىندە دە بولدى. ول بالىق ونىمدەرىنىڭ يمپورتىن قىسقارتۋعا جانە يننوۆاتسيالىق جوبانى ىسكە اسقاننان كەيىن ەكسپورت كولەمىن ۇلعايتۋعا مۇمكىندىك بەرەدى. سەناتور سونداي-اق ىلە وزەنىنىڭ قاپشاعاي شاتقالىندا ورنالاسقان سۋ-ەنەرگەتيكا كاسىپورنى جۇمىسىمەن تانىستى.
اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى دۇيسەنعازى مۋسين, مۇحتار جۇماعازيەۆ, ءابدالى نۇراليەۆ جانە سۇلتان دۇيسەمبينوۆ شىعىس قازاقستان وبلىسىنا باردى.
سەناتورلار جۇمىس ساپارى بارىسىندا ۇلان اۋدانىنداعى «OST Fish» جشس بالىق شارۋاشىلىعىنىڭ قىزمەتىمەن تانىستى. بالىق شارۋاشىلىعىنىڭ باسشىلارى بەكىرە بالىقتارىن ءوسىرۋ مەن ازىقتاندىرۋدىڭ ەرەكشەلىكتەرى, ۋىلدىرىق ءوسىرۋ مەن الۋدىڭ تەحنولوگيالىق پروتسەسى تۋرالى سەناتورلاردى حاباردار ەتتى. پارلامەنتشىلەر سونىمەن قاتار التاي وڭىرىندەگى اگروونەركاسىپ كەشەنىنىڭ كاسىپورىندارى مەن ايماقتاعى فەرمەرلىك شارۋاشىلىقتاردى ارالاپ, اۋىل شارۋاشىلىعى تەحنيكاسى پاركىنىڭ جاي-كۇيىن كورىپ شىقتى. سەناتورلار اۋداننىڭ ەلىمىزدىڭ اگرارلىق سەكتورى مەن اۋىل شارۋاشىلىعى ءوندىرىسىن دامىتۋعا قوسقان ۇلەسىن جوعارى باعالادى.
ناريمان تورەعاليەۆ پەن ءلاززات رىسبەكوۆا باتىس قازاقستان وبلىسى تەرەكتى اۋدانىنداعى دوليننوە, العاباس, تەرەكتى اۋىلدارىنىڭ تۇرعىندارىمەن كەزدەستى. دەپۋتاتتار ەلىمىزدە جۇرگىزىلىپ جاتقان رەفورمالاردى زاڭنامالىق قامتاماسىز ەتۋ جۇمىستارى تۋرالى حاباردار ەتتى. دوليننوە جانە العاباس اۋىلدارى تۇرعىندارى الەۋمەتتىك نىسانداردى گازداندىرۋ, بالاباقشا عيماراتىن كۇردەلى جوندەۋ, اۋىلعا اۋىز سۋ تارتۋ ماسەلەسىن قوزعادى. سەناتورلار اۋدان ورتالىعىنىڭ تۇرعىندارىمەن كەزدەسۋدە اۋداندىق ەمحانا مەن كوپقاباتتى تۇرعىن ۇيلەردىڭ قۇرىلىسىن تالقىلادى. جاڭا ءومىر اۋىلى تۇرعىندارى ءۇي قۇرىلىسىنا ارنالعان جەر تەلىمدەرىنە ەلەكتر جەلىلەرىن قوسۋعا, مادەنيەت ءۇيىنىڭ قۇرىلىسىن اياقتاۋعا جانە قوسىمشا جەدەل جاردەم كولىگىن بولۋگە كومەكتەسۋدى سۇرادى.
ناريمان تورەعاليەۆ پەن ءلاززات رىسبەكوۆا ءبورلى اۋدانىنا دا اتباسىن بۇردى. سەناتورلار جارسۋات, پريۋرالنوە جانە وبلاۆكا اۋىلدارىنىڭ تۇرعىندارىمەن كەزدەسۋدە اۋىز سۋ, جەر قاتىناستارى, كەنتىشىلىك جولداردى جوندەۋ, ەلەكتر جەلىلەرىنىڭ توزۋى, وبلاۆكا اۋىلىندا فەلدشەرلىك-اكۋشەرلىك پۋنكت پەن مەكتەپ سالۋ ماسەلەلەرىن تالقىلادى. دەپۋتاتتار اۋىلداعى وزەكتى ماسەلەلەر ءتيىستى شارالار قابىلداۋ ءۇشىن ۋاكىلەتتى مەملەكەتتىك ورگانداردىڭ نازارىنا جەتكىزىلەتىنىن اتاپ ءوتتى. پارلامەنتشىلەر سونىمەن قاتار قۇس جانە ەگىنشىلىكپەن اينالىساتىن «جارسۋات» جشس قىزمەتىمەن, مەكتەپ پەن جەلكەندى انتەننا قۇرىلىسىنىڭ بارىسىمەن تانىستى. دەپۋتاتتار سونداي-اق امانگەلدى – ۋسپەنسكايا جانە پودستەپنوە – فەدوروۆكا – رەسەي فەدەراتسياسى شەكاراسى جولدارىنىڭ قۇرىلىسىن ساپالى سالۋ قاجەتتىگىن اتاپ ءوتتى.
ءلاززات سۇلەيمەن جەتىسۋ وبلىسىنا جۇمىس ساپارى بارىسىندا سارقان جانە الاكول اۋداندارىندا بولىپ, جەرگىلىكتى حالىقپەن جانە اكىمدىكتەرىنىڭ وكىلدەرىمەن كەزدەستى. سەناتور سارقان اۋدانىنىڭ وكىلدەرىمەن كەزدەسۋدە اۋىل شارۋاشىلىعى ماقساتىنداعى جەرلەردى ازاماتتارعا ۋاقىتشا پايدالانۋعا بەرۋ, تۇرعىن ۇيلەر مەن تەحنيكالىق جانە كاسىپتىك ءبىلىم بەرۋ ۇيىمدارىنىڭ عيماراتتارىن كۇردەلى جوندەۋگە قارجى ءبولۋ ماسەلەلەرىن تالقىلادى. ال اۋدان تۇرعىندارىمەن كەزدەسۋدە بوس تۇرعان «قازپوشتا» اق عيماراتىن جاستار سپورت سەكتسياسىن اشۋ ءۇشىن اۋداندىق كوممۋنالدىق مەنشىككە بەرۋ, جايىلىمدىق جانە سۋارمالى جەرلەردى ءبولۋ, قوقىس جيناۋ جانە قايتا وڭدەۋ, مەديتسينالىق كومەك كورسەتۋ جانە الەۋمەتتىك قولداۋ ماسەلەلەرى كوتەرىلدى. دەپۋتات الاكول اۋدانىندا «ديپلوممەن اۋىلعا» جانە «اۋىل – ەل بەسىگى» باعدارلامالارىنىڭ جۇزەگە اسۋى جانە مادەنيەت ءۇيىنىڭ سالىنۋ بارىسىمەن, سونداي-اق وبلىستىڭ شالعاي اۋىلدارىنداعى شارۋا قوجالىقتارىنىڭ قىزمەتىمەن تانىستى.
سەناتورلار نۇرلان بەكنازاروۆ پەن ايگۇل قاپباروۆا شىمكەنت قالاسىنا ساپارى بارىسىندا قايتا جوندەۋدەن وتكەن «مەتاللۋرگ» ستاديونىندا بولىپ, اتقارىلىپ جاتقان جۇمىستاردىڭ بارىسىمەن تانىستى. زاماناۋي ستاديوندا اكىمشىلىك عيمارات, اسحانا, كوماندالىق ويىندارعا ارنالعان سپورت زالدارى, سپورتتىق ترەناجەرلار مەن ويىن الاڭدارى قاراستىرىلعان. جوبالىق جوسپارعا سايكەس, «مەتاللۋرگ» ستاديونىن قايتا جوندەۋ جۇمىستارى اعىمداعى جىلدىڭ جەلتوقسان ايىندا اياقتالادى دەپ جوسپارلانۋدا. سەناتورلار سونداي-اق جەرگىلىكتى ءماسليحات دەپۋتاتتارىمەن كەزدەسىپ, سەناتقا شىمكەنت تۇرعىندارىنان كەلىپ تۇسكەن وتىنىشتەردى تالقىلادى.
سەنات دەپۋتاتى اندرەي لۋكين نۇر-سۇلتان قالاسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى مەن قالالىق اكىمدىكتىڭ «قامقور» الەۋمەتتىك قىزمەت كورسەتۋ ورتالىعى» كمم-دە بولىپ, باسقارما جانە ورتالىق قىزمەتكەرلەرىمەن كەزدەستى. جەرگىلىكتى پوليتسيا قىزمەتى باسقارماسىنىڭ باسشىلىعى مەن قىزمەتكەرلەرى سەناتورعا قۇقىق بۇزۋشىلىقتاردىڭ الدىن الۋ, قوعامدىق ءتارتىپتى ساقتاۋ, جول قوزعالىسى قاۋىپسىزدىگىن قامتاماسىز ەتۋ, قىلمىستىق جانە اكىمشىلىك قۇقىق بۇزۋشىلىقتاردىڭ جولىن كەسۋ جونىندە جۇرگىزىلىپ جاتقان جۇمىستار تۋرالى ايتىپ بەردى. اندرەي لۋكين ءوز كەزەگىندە پالاتانىڭ زاڭنامالىق جۇمىسى تۋرالى كەزدەسۋگە قاتىسۋشىلاردى جان-جاقتى حاباردار ەتتى. دەپۋتات سونىمەن قاتار «قامقور» ورتالىعىندا كورسەتىلەتىن قىزمەتتەرمەن, ونىڭ ماتەريالدىق جانە تەحنيكالىق جابدىقتالۋىمەن
تانىستى.
