مەملەكەتتىك گرانت – جاڭا بيزنەستى ىسكە قوسۋ جانە دامىتۋ ماقساتىندا وتەۋسىز بەرىلگەن باستاپقى كاپيتال. گرانت كولەمى 400 اەك-ءتى (1 225 200 تەڭگە) قۇرايدى. ءار قاتىسۋشى ونى تەك ءبىر رەت الا الادى. گرانتتار قاراجاتى ءىسىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشۋعا, ءوندىرىستى جولعا قويۋعا جانە دامىتۋعا, سول ارقىلى ءوزىن تۇراقتى تابىسپەن قامتاماسىز ەتۋگە مۇمكىندىك بەرەدى.
ءوتىنىم بەرۋ ءۇشىن پورتالدا تىركەلۋ, گرانت الۋ شارتتارىنا سايكەستىگىنە تەكسەرۋدەن ءوتۋ, بيزنەس-جوسپار ۇلگىسىن جۇكتەپ الىپ, ونى تولتىرۋ جانە پورتالعا ەنگىزۋ, سونداي-اق ەتسق كىلتىمەن قول قويۋ قاجەت.
ينتەرنەتكە نەمەسە كومپيۋتەرگە قولجەتىمدىلىك بولماعان جاعدايدا, حالىقتى جۇمىسپەن قامتۋ ورتالىقتارىنىڭ وزىنە-ءوزى قىزمەت كورسەتۋ ايماقتارىندا, حقو-دا, كاسىپكەرلەرگە قىزمەت كورسەتۋ ورتالىقتارىندا ءوتىنىم بەرۋگە بولادى.
گرانت الۋ ءۇشىن بىرقاتار شارتتى ساقتاۋ قاجەت. جاڭا بيزنەس-يدەيانى ىسكە اسىرۋعا مەملەكەتتىك گرانت الۋعا ۇمىتكەر بولا الاتىندار – تىركەلگەن جۇمىسسىزدار, جەكە كاسىپكەرلەر (تىركەۋ مەرزىمى 3 جىلعا دەيىن), بىرىڭعاي جيىنتىق تولەمدى تولەۋشىلەر. بۇل رەتتە ۇمىتكەر تومەندەگى الەۋمەتتىك ساناتتاردىڭ بىرىنەن بولۋ كەرەك: مۇگەدەكتىگى بار ادامدار; قولدانىستاعى «كانداس» مارتەبەسى بار ادامدار; وڭىرارالىق قونىس اۋدارۋشىلار; از قامتىلعان وتباسى مۇشەلەرى; كوپبالالى وتباسى مۇشەسى; مۇگەدەكتىگى بار بالانى تاربيەلەپ وتىرعان ادام; اسىراۋشىسىنان ايىرىلۋ بويىنشا جاردەماقى الۋشىلار; جاستار. ۇمىتكەردىڭ «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ تۋرالى ءۇش جىلدان اسپايتىن مەرزىمگە سەرتيفيكاتى بولۋعا ءتيىس.
راسىمدەردىڭ اشىقتىعىن قامتاماسىز ەتۋ, ادامي فاكتوردى ازايتۋ, ءوتىنىش بەرۋشىلەرگە ىڭعايلى بولۋ ءۇشىن گرانتتار بەرۋدىڭ بۇكىل پروتسەسى ەلەكتروندى فورماتقا اۋىستىرىلدى. گرانت الۋعا وتىنىمدەردى قابىلداۋ بىرىڭعاي تەرەزە – Business.enbek.kz پورتالى ارقىلى جۇزەگە اسىرىلادى.
گرانتتى قاجەتتى قۇرال-سايمانداردى, ەڭبەك قۇرالدارىن, تەحنولوگيالىق جابدىقتاردى, مالدى, جانۋارلاردى, قۇستاردى, كوشەتتەردى, بۇتالاردى, تۇقىمداردى ساتىپ الۋعا, ورىن-جايلاردى جالعا الۋ اقىسىن تولەۋگە الۋعا بولادى. سونداي-اق تۇتىنۋشىلىق ماقساتتارعا, كرەديتتىك قارىزداردى وتەۋگە, جىلجىمايتىن تۇرعىن ءۇي ساتىپ الۋعا جانە سالۋعا, جەر ۋچاسكەلەرىن ساتىپ الۋعا, اكتسيزدەلەتىن ونىمدەر وندىرۋگە گرانت بەرىلمەيدى.
گرانتتاردى حالىقتى جۇمىسپەن قامتۋ ورتالىقتارى گرانت الۋعا ۇمىتكەرلەردىڭ وتىنىشتەرىن قاراۋ جونىندەگى اۋداندىق نەمەسە قالالىق كوميسسيانىڭ شەشىمى نەگىزىندە بەرەدى. ۇمىتكەرلەر ءوز بيزنەس-جوباسىن كوميسسيا وتىرىستارىندا تانىستىرادى. بۇل رەتتە كوميسسيانىڭ ءاربىر مۇشەسى بيزنەس-جوسپاردى باعالايدى جانە باعالاۋ پاراعىن مىناداي ولشەمشارتتار بويىنشا تولتىرادى: بيزنەس-يدەيانىڭ باسەكەگە قابىلەتتىلىگى, وتكىزۋ نارىقتارىنىڭ پىسىقتالۋى, بيزنەس-جوبانىڭ قارجىلىق ومىرشەڭدىگى, كاسىپكەرلىك داعدىلاردىڭ دەڭگەيى, جاڭا جۇمىس ورىندارىن قۇرۋ.
وسىلايشا, گرانت بەرۋ تۋرالى شەشىم كوميسسيالىق تۇردە جانە ۇمىتكەرلەردىڭ بيزنەس-جوبالارىنىڭ پىسىقتالۋىن باعالاۋدىڭ ناقتى ولشەمشارتتارى نەگىزىندە قابىلدانادى. كوميسسيا شەشىمى ۇمىتكەردىڭ پورتالداعى جەكە كابينەتىنە جىبەرىلەدى. كوميسسيانىڭ وڭ شەشىمى بولعان جاعدايدا ۇمىتكەر بانك دەرەكتەمەلەرىن ۇسىنادى, شارتقا قول قويادى جانە ودان ءارى توقسان سايىن قاراجاتتىڭ پايدالانىلۋى تۋرالى ەسەپ بەرەدى. مۇنىڭ ءبارى حالىقتى جۇمىسپەن قامتۋ ورتالىقتارىنا بارماي-اق, ەلەكتروندى فورماتتا جاسالادى.
