قورعانىس مينيسترلىگىندە ۆەدومستۆو باسشىسى ادىلبەك جاقسىبەكوۆ تۇرىك رەسپۋبليكاسى باس شتابىنىڭ باستىعى, ارميا گەنەرالى يلكەر باشبۋگپەن كەزدەستى. كەزدەسۋ بارىسىندا تاراپتار اسكەري جانە اسكەري-تەحنيكالىق سالاداعى قارىم-قاتىناستاردىڭ دامۋ قارقىنىنا قاناعاتتانارلىق نيەت ءبىلدىردى. قازىرگى تاڭدا قازاقستان مەن تۇركيا اراسىنداعى قاتىناس تۇراقتى جانە سەنىمدى ارىپتەستىك سيپاتقا يە.
– تۇركيا قازاقستاننىڭ باسىم ارىپتەستەرىنىڭ ءبىرى بولىپ تابىلادى, – دەپ اتاپ ءوتتى قازاقستان قورعانىس ءمينيسترى. – ەكى ەل قارۋلى كۇشتەرى اراسىنداعى اسكەري ىنتىماقتاستىقتىڭ دەڭگەيىن وتە جوعارى دەپ ايتۋعا بولادى. ارىپتەستىكتىڭ نەگىزگى باعىتتارى ەلىمىزدىڭ اسكەري قىزمەتشىلەرىن تۇركيانىڭ اسكەري وقۋ ورىندارىندا وقىتۋ, قازاقستاندىق ارنايى ماقساتتاعى بولىمشەلەردى دايىنداۋ مەن ولاردى جاراقتاندىرۋ, قازاقستان رەسپۋبليكاسى قارۋلى كۇشتەرىن رەفورمالاۋ ۇدەرىسىنە جاردەم كورسەتۋ بولىپ تابىلادى. قازىرگى تاڭدا قازاقستان قورعانىس ءمينيسترى مەن تۇرىك باس شتابى باستىعىنىڭ وتكەن جىلعى كۇزدە انكاراداعى كەزدەسۋىندە قول جەتكىزىلگەن نەگىزگى كەلىسىمدەرى جۇزەگە اسىرىلۋدا. بۇگىنگە دەيىن تۇرىك اسكەري ماماندارىنىڭ كومەگىمەن “كوماندوس”, “ارنايى ماقسات”, “مەرگەندەر دايىنداۋ”, “ىشكى قاۋىپسىزدىك” باعدارلامالارى بويىنشا 500-دەن استام قازاقستاندىق اسكەري قىزمەتشى دايىندىقتان ءوتتى. 2007 جىلدان بەرى اەروۇتقىر اسكەرلەرىنىڭ ارنايى ماقساتتاعى بولىمشەلەرىنىڭ 400 جاۋىنگەرى “كوماندوس” كۋرسى بويىنشا تاجىريبەدەن ءوتتى. قازاقستان قورعانىس ءمينيسترى تۇركيا وقۋ ورىندارىندا قازاقستان اسكەري قىزمەتشىلەرىن وقىتۋداعى مۇمكىندىككە ريزاشىلىعىن ءبىلدىردى. كەزدەسۋدەن سوڭ تاراپتار بۇگىنگى كەزدەسۋ ەكى مەملەكەت قورعانىس ۆەدومستۆولارىنىڭ اراسىنداعى ەكىجاقتى ىنتىماقتاستىققا جاڭاشا سەرپىن بەرەتىنىن اتاپ ءوتتى. ساپار شەڭبەرىندە تۇرىك اسكەري دەلەگاتسياسى استاناداعى اتاتۇرىك ەسكەرتكىشىنە گۇل قويىپ, تاعزىم ەتتى, دەپ حابارلادى ەلىمىز قورعانىس مينيسترلىگىنىڭ ءباسپاسوز قىزمەتى.
